ئەڤرۆ:

ئەندامەکێ ھەڤپەیمانیا کوردستانێ و پەرلەمانتارێ خۆلا بۆری یا جڤاتا نوونەرێن عیراقێ راگەھاند کو دستوورێ عیراقێ ئاماژە دایە وێ چەندێ کو دەستھەلاتا ھەرێما کوردستانێ یا تایبەتمەندە ب پرسا پێشمەرگەی ڤە و پێدڤی بوو بەغدا و ھندەک سەرکردێن نەرازی ژ ھنارتنا پێشمەرگەی بۆ کۆبانێ، پێشوازی ل بریارا سەرۆکێ ھەرێمێ و پەرلەمانێ کوردستانێ کربا ل دۆر ھنارتنا ھێزێن پێشمەرگەی بۆ کۆبانێ.

محەمەد سەیھود ئەندامێ دەولەتا قانوونێ ب سەرۆکاتیا نوری مالکی بۆ (سومەریە نیۆز) دبێژیت” بریارا پەرلەمانێ کوردستانێ بۆ ھنارتنا پێشمەرگەی بۆ کۆبانێ سەرپێچیە ل دستوورێ عیراقێ و نابیت ھەرێما کوردستانێ رەفتارێ ژ دەف خوە بکەت و ھێزێن خوە بلڤینیت و مایێ خوە د کاروبارێن دەولەتەکا دی دا بکەت بێ ئاگەھداری و رازیبوونا حوکمەت و پەرلەمانێ ناڤەندی”.

ئەندامەکا دی یا دەولەتا قانوونێ پێنگاڤا ھەرێما کوردستانێ بۆ ھنارتنا ھێزێن پێشمەرگەی بۆ کۆبانێ ب (سەرپێچیەکا دستووری) د ھەژمێریت، عالیا نسەیف د نامەکێ دا بۆ فوئاد مەعسووم سەرۆکێ کۆمارا عیراقێ، پرسا ھنارتنا ھەرێما کوردستانێ بۆ ھێزێن پێشمەرگەی بۆ باژێرێ کۆبانێ ب (ھەڤدژ ل گەل دستوورێ عیراقێ) ھژمارت.

ژ لایێ خوەڤە ھەڤپەیمانیا کوردستانی بریارا پەرلەمانێ کوردستانێ ل دۆر ھنارتنا پێشمەرگەی بۆ کۆبانێ ب ئاسایی دبینیت ژ بەرکو پتر بۆ کارەکێ مرۆڤایەتیە و دیاردکەت کو سەرکەفتنا پێشمەرگەی ل کۆبانێ دێ ھەڤسەنگیا ھێزێ ل دەڤەرێ گوھۆریت.

حەمید باڤی پەرلەمانتارێ بەرێ یێ ھەڤپەیمانیا کوردستانی د جڤاتا نوونەرێن عیراقێ دا ژی دبێژیت”د برگا (١١) ژ مادا(١٠) یا قانوونا سەرۆکاتیا ھەرێما کوردستانێ ھاتیە” بۆ سەرۆکێ ھەرێمێ ھەیە ھێزێن پێشمەرگەی بۆ دەرڤەی ھەرێمێ ب لڤینیت ب رازیبوونا پەرلەمانێ کوردستانێ” و د برگا (٥) ژ مادا (١٢١) یا دستوورێ عیراقێ دا ھاتیە”دەستھەلاتا ھەرێمێ یا تایبەتمەندە ب زێرەڤانێن خوە ئانکو ھێزێن پێشمەرگەی”.

دیسا گوت” مادا (١١٥) ژی یا دستووری چو ئاماژان نادەت کو لڤینێن پێشمەرگەی ب دەستھەلاتا ناڤەندیا بەغدا ڤە گرێبدەت، بەلکو ئەڤ چەندە بۆ دەستھەلاتداریا ھەرێمێ ھێلایە ل دووڤ وێ مادا دستووری”.

گوت ژی” تیرۆرستێن داعش یێن ژ پتر ژ ٨٠ وەلاتان ھاتینە عیراقێ و سووریێ و چەندین ھێزێن لەشکری و ئەمنی شکاندینە و رێژەکا مەزن ژ چەکێ گران کەفتیە دبن کونترۆلا وانڤە،دیسا چەندین پارێزگەە و باژێر ل وان ھەردو وەلاتان یێن کەفتینە دبن کونترۆلا وان تیرۆرستان دا و چو رەوشەت و پرنسیبێن قانوونی و مرۆڤایەتی ل دەف وان تیرۆرستان نینن ، لەوما ژ ئەگەرێ کار و تاوانێن داعش دژی مرۆڤایەتیێ، جڤاکێ نێڤدەولەتی ھاتە دەنگ بۆ بەرھنگاریا ڤێ رێکخراوا تیرۆرستی ب رێیا دەرکرنا ھەردو بریارێن (٢١٧٠، ٢١٧٨) و نێزیکی ٦٠ وەلاتان ھەڤپەیمانیەکا نێڤدەولەتی ب سەرۆکاتیا ئەمریکا پێکئینا بۆ شەڕێ ڤێ رێکخراوا تیرۆرستی ل عیراقێ و سووریێ و بریارا ھەرێما کوردستانێ ژی یا ھنارتنا پێشمەرگەی بۆ کۆبانێ ھەر دچیتە د چارچۆڤێ شەڕێ وان وەلاتێن ھەڤپەیمان دژی داعش و ھنارتنا پێشمەرگەی ژی بۆ کۆبانێ ب بریارا سەرۆکێ ھەرێمێ و ب رازیبوونا پەرلەمانی و ل دووڤ قانوونێن ھەرێما کوردستانێ بوو”.

ئه‌ڤرۆ نيوز:

حه‌يده‌ر عه‌بادى راگه‌هاند كو عيراق يا د مه‌ترسيه‌كا مه‌زن دا ژ لايێ چه‌كدارێن داعش ڤه‌ و مه‌ترسيا وێ چه‌ندێ يا هه‌يى ئه‌ڤه‌ كارتێكرنێ ل هه‌موو ده‌ڤه‌رێ بكه‌ت.

سه‌رۆك وه‌زيرێ عيراقێ، حه‌يده‌ر عه‌بادى، ئه‌ڤرۆ رۆژا ئێكشه‌مبى ب سه‌ره‌دانه‌كا فه‌رميا ئێك رۆژى گه‌هشته‌ ئوردن و د كۆنگره‌كێ رۆژنامه‌ڤانى دا ل گه‌ل هه‌ڤپيشه‌يێ خوه‌ يێ ئۆردنى، عه‌بدولا نسور گۆت: “دێ د ماوێ سه‌ره‌دانا خوه‌ دا گه‌له‌ك ژ بابه‌تێن ئه‌منى و ئابوورى و بازرگانى گه‌نگه‌شه‌ كه‌ين”.

زێده‌تر گۆت: “نوكه‌ عيراق يا ل ژێر مه‌ترسيه‌كا مه‌زن و ژ لايێ داعش ڤه‌ و ئه‌ڤ مه‌ترسيه‌ دێ هه‌موو ده‌ڤه‌رێ ڤه‌گريت”.

ژ لايێ خوه‌ ڤه‌، سه‌رۆك وه‌زيرێ ئوردنى، عه‌بدولا نسور د ڤى كۆنگرێ رۆژنامه‌ڤانى دا گۆت: “عومان دێ هاريكاريا به‌غدا د شه‌رێ وێ يێ دژى داعش دا كه‌ت، داعش و يێن وه‌كو وێ مه‌ترسى نه‌ ل سه‌ر ده‌ڤه‌رێ و دڤێت ل به‌ر سنگێ وان ب راوه‌ستين”.

ئەڤرۆ نیۆز، قائید میرۆ:
بەرپرسەکێ ئێکەتی ل دبێژیت، نوکە نێزیکی بیست ھزار چەکدارێن داعش ل پارێزگەھا مووسل ھەنە و موچێ ھەر چەکدارەکێ شەڕکەر ھزار دۆلارن.
غەیاس سورچی کارگێڕێ مەلبەندا ئێکەتی نیشتیمانی کوردستان ل پارێزگەھا مووسل ب ئەڤرۆ نیۆز راگەھاند، کو دەستپێکا ھاتنا داعش بۆ پارێزگەھا مووسڵ، ھژمارا چەکدارێن وان تنێ ھزار چەکدارەک دبوون، بەلێ پشتی ١٠/٦ و کۆنتڕۆلکرنا مووسل، نوکە گورەی زانیاریێن مە نێزیکی ٢٠ ھزار چەکدارێن داعش ل مووسل ھەنە.
سورچی گۆتژی” ھەیڤانە داعش ھزار دۆلاران وەکی موچە بۆ چەکدارێن خوە یێن شەڕی دکەن مەزێخیت، بەلێ ئەف چەکدارێن داعش یێن ل دەڤەرێن ئارام تنێ ٦٠٠ دۆلار موچێ وانە.