ئەڤرۆ:

نڤیسەر و شارەزایەکێ سیاسی یێ تورکیا دیار دکەت کو دڤێت کورد ژ ڤێ دەلیڤا زێرین کو ل دەڤەرێ ھاتیە پێش مفایەکا باش وەربگرن و خوە نەکەنە پشکەک ژ ئالۆزیان و بزاڤێ بکەن ئێکەتیا خوە دروست بکەن و نھا پتر ژ ھەر دەمەکێ جڤاکێ کوردی پێدڤی ب ئێکگرتنا ھێزێن سیاسی یێ کوردی نە و فەرە کورد مفایێ ژ ناکۆکیێن د ناڤبەرا بەرەیێ ئەمریکا و روسیا وەربگرن.

رۆژنامەڤان جەنگیز چاندار د داخۆیانیەکی دا بۆ رۆژناما ئەڤرۆ راگەھاند کو د رەوشا نھا یا جیھانێ و شەرێ کو دھێتە کرن ھەڤپەیمانیێن نوو دەردکەڤنە مەیدانێ و ئەمریکا ژ ئالیەکی و روسیا ژی ئالیێ خوە ڤە دخوازن رەوشا جیھانێ ل دووڤ بەرژەوەندیێن خوە دیزاین بکەن و گۆت: “سیاسەتا روسیا و رۆژئاڤا “ئەمریکا و ئوروپا” ل سووریێ و ئوکرانیا دژبەرێ ھەڤدویە و ژ بەر ڤێ چەندێ ژی ھەتا نھا رەوشا ھەردو وەلاتان ئالۆز مایە و شەرێ سار یێ د ناڤبەرا روسیا و ئەمریکا ل ئوکرانیا و سووریێ بوویە شەرێ گەرم و ھەردو ئالی ژی بۆ سەرخستنا سیاسەتا خوە رژدن و دخوازن ھەڤپەیمانیێن خوە بەرفرەھتر بکەن، روسیا خوە نێزیکی تورکیا و بولگاریا دکەت و ئەمریکا ژی دخوازیت کازاخستان و ئۆزبەکستانێ راکێشیتە ئالیێ خوە”.

ل سەر پەیوەندیێن تورکیا و روسیا ژی چاندار راگەھاند کو تورکیا بۆ کو پلان و سیاسەتا خوە ل رۆژھەلاتا ناڤین ب تایبەت ژی ل دژی سووریێ ب ئەمریکا بدەتە قەبوولکرن خوە نێزیکی روسیا دکەت و دخوازیت ب ڤێ یەکێ دەریێن ئێکەتیا ئورۆپا ژی بێی مەرج بۆ وێ ڤەبیت و گۆت: “لێ ئەز باوەر ناکەم تورکیا ب سیاسەتا خوە یا نھا بشێت کاریگەریێ ل ئەمریکا و ئێکەتیا ئورۆپا بکەت و ھەم د وارێ ئابووری و ھەم ژی د وارێ سیاسی و سەربازی دا ب تەمامی ل ژێر کۆنترۆلا ئەمریکا و ئورۆپا دایە و ئەمریکا سیاسەتا خوە ل سووریێ بۆ تورکیا ناگوھۆریت، لێ روسیا غازا سروشتی وەک کارتەکا فشارێ ل دژی ئورۆپا بکار دھینیت و تورکیا ژی بۆ ڤێ یەکێ ب کار دھینیت و ب سیاسەتا خوە یا شاش تورکیا خوە دکەتە مەیدانا شەرێ سار و ئەو یەک دێ زیانێن مەزن بگەھینتە تورکیا”.

ل سەر رۆل و جھێ کوردان د جیھانا نوو دا ژی جەنگیز چاندار راگەھاند کو ھەرێما کوردستانێ ھەتا نھا سیاسەتەکا گەلەک راست دمەشینیت و خوە نەکریە د ناڤ بەرەیەکی دا، لێ ئەمریکا ھەردەم گەلەک نێزیکی کوردێن عیراقێ بوویە و گۆت: “ب تایبەت پشتی کو ئەمریکا ل رۆژئاڤا ژی وەک ھەرێما کوردستانا عیراقێ د شەرێ ل دژی تیرۆرێ دا ھەڤکاریا کوردان کر نھا کوردێن سووریێ و تورکیا ژی وەک بەرێ ل ئەمریکا نانێرن و ژ روسیا زێدەتر نێزیکی ئەمریکا نە، د رەوشا نھا دا رەوش وەسایە لێ کوردێن سووریێ و تورکیا ئەمریکا وەک ھەڤپەیمانێ خوە نابینن و د ھەمان دەمێ دا باوەریا وان ب روسیا ژی ناھێت”.

رۆژنامەڤان و زانایێ سیاسەتێ ھەروەسا دیار ژی کر کوردێن تورکیا، سووریێ ژ بەرێ ڤە وەک یەک تیم بزاڤێ دکەن و پشتی ھێرشێن داعشێ ناکۆکیێن د ناڤبەرا کوردێن عیراقێ و تورکیا و سووریێ ژی کێم بووینە و وەلاتیێن کورد بۆ یەکگرتنەکا بەرفرەە فشارێ خستنە سەر ھێزێن سەرەکی یێن کوردان و وان نەچار دکەن کو پێکڤە بۆ بەرژەوەندیێن بلندێن کوردان کار بکەن و گۆت: “ھەم ل شنگال و مەخمورێ و ھەم ژی ل کۆبانێ ھێزێن کوردان د ناڤ یەک بەرەیێ دا شەرێ تیرۆرستان دکەن و بەرژەوەندیێن وان گەلەک نێزیکی ھەڤدو بووینە لێ د وارێ ستراتیژی دا ھێشتا ژی ژ ھەڤدو دوورن”.

د دووماھیا ئاخڤتنا خوە دا ژی جەنگیز چاندار رۆژنامەڤان و زانایێ سیاسەتێ دیار کر کو ھەم د شەرێ سار یێ جیھانێ و ھەم ژی بۆ دیارکرنا جە و رۆلێ خوە د جیھانا نوو دا کورد خوەدان شانسەکا مەزنن و گۆت: “ئەز باوەر دکەم دەلیڤەکا مەزن کەڤتیە بەر دەستێ کوردان کو ب ڤینا خوە د رەوشا نھا دا پاشەرۆژا خوە دیار بکەن و پەیوەندیێن خوە ھەم ل گەل روسیا و ئیرانێ ھەم ژی ل گەل ئەمریکا و تورکیا بەردەوام بکەن، ژ بەر کو نە د بەرژەوەندیا کوردان دایە ب تەمامی خوە بکەنە د ناڤ ھەڤپەیمانیەکێ ل دژی یێ دیتر دا”.