ئه‌ڤرۆ نيوز:

هيلارى كلينتۆن وه‌زيرا ژ ده‌رڤه‌ يا ئه‌مريكا يا به‌رێ د هه‌لكه‌فته‌كا سياسى دا ل كه‌ندا ئاشكه‌را كر كو داعش نه‌ ده‌وله‌ته‌ و نه‌ژى يا ئيسلامى يه‌ و شه‌ر ژى ل گه‌ل دێ يێ ماوه‌ درێژ بيت.

هيلارى كلينتۆن دياركر كو شه‌رێ ل گه‌ل داعش دێ ڤه‌كێشيت و نه‌خواست ژى ناڤێ داوله‌تا ئيسلامى ل سه‌ر بهێته‌ دانن و هه‌ر تشتێ دى يێ دهێته‌ گۆتن وه‌كو ناڤێ وێ رێكخستيێ نه‌يا گرنگه‌ به‌لێ گۆت: “داعش نه‌ ده‌وله‌ته‌ و نه‌ژى يا ئيسلامى يه‌، ئه‌م هه‌مى ژى ل سه‌ر وێ مه‌ترسيێ د رێكه‌فتينه‌ ئه‌وا ژ لايێ وێ ڤه‌ هه‌يى”.

كلينتۆن پشته‌ڤانيا خوه‌ ژى بۆ دربێن سه‌ربازى ل عيراق و سوريا ده‌ربڕى و دا زانين كو هێرشێن سه‌ربازى ب تنێ پێدڤى ناكه‌ن و گۆت: “پێدڤيه‌ ل سه‌ر تۆڕێن جڤاكى ژى ب هاريكاريا وه‌لاتێن عه‌ره‌بى بهێته‌ كرن، چونكو ئه‌ڤه‌ نه‌ ب تنێ شه‌رێ ئه‌مريكا و وه‌لاتێن رۆژئاڤايه‌”.

ئه‌ڤرۆ نيوز:

سه‌ركرده‌كێ به‌ره‌ى نوسره‌ دياركر كو هێرشێن هه‌ڤپه‌يمانان بۆ سه‌ر وان، به‌ره‌ى نوسره‌ يا نێزيكى قاعيده‌ و داعش نێزيكى ئێكدو دبن و دده‌ته‌ زانين كو ئه‌و نه‌ د ئاماده‌نه‌ ل دژى داعش ب راوه‌ستن د به‌رژه‌وه‌ندا وه‌كو ئه‌و ب ناڤ دكه‌ين سه‌ليبان دا.

د په‌يوه‌نديه‌كا ب رێيا سكايپى دا، ئه‌بۆ موسه‌نايى ئه‌نصارى بۆ CNN دياركر كو پشتى هێرشێن فرۆكێن هه‌ڤپه‌يمانان، ل سه‌ر هه‌ردو هه‌ڤركێن ئێك، به‌ره‌ى نوسره‌ و داعش، هه‌ردويان كێشێن خوه‌ داينه‌ ره‌خه‌كى پشتى هه‌يڤه‌كێ ژ شه‌ره‌كێ مه‌زن د ناڤبه‌را هه‌ردو لايان دا.

گۆتژى: “ئه‌م نه‌شێين ل گه‌ل صه‌ليبيا شه‌رێ داعش بكه‌ين، هه‌ر كه‌سێ بچيته‌ ل گه‌ل وان ژ وانه‌”.

ئه‌نصارى دياركر ژى كو چو تشتێ فه‌رمى د ناڤبه‌را هه‌ردو لايان دا نينه‌، به‌لێ تێكگه‌هشتنه‌كا ناڤخۆى يا د ناڤبه‌را هه‌ردو لايان دا هه‌يى، بۆ راوه‌ستيان ل دژى رژێما به‌شار ئه‌سه‌د و گۆت: “رێكخستيا داعش هنده‌ك ئێخسيرێن مه‌ يێن به‌رداين”.

ئه‌ڤرۆ نيوز:

ژێده‌ۆه‌كى ژ وه‌زاره‌تا ده‌رڤه‌ يا ئه‌مريكا راگه‌هاند كو بۆ جارا ئێكێ دێ ئه‌مريكا ب رێيا فرۆكێن ئه‌باتشى ب ره‌نگه‌كێ نزم هێرشێ كه‌ته‌ سه‌ر چه‌كدارێن داعش ل عيراقێ.

سه‌ركرداتيا ئه‌مريكا راگه‌هاند كو ئه‌و دێ بۆ جارا ئێكێ ب رێيا فرۆكێن سه‌ربازى يێن ژ جورێ ئه‌باتشى AH-64 هێرشێ كه‌ته‌ سه‌ر چه‌كدارێن داعش ل عيراقێ دا كو بشێت ب ره‌نگه‌كێ باشتر ئارمانجێن خوه‌ بجهـ بينيت.

د به‌باننامه‌كێ دا، وه‌زاره‌تا به‌ره‌ڤانيا ئه‌مريكا راگه‌هاند كو ل دووماهيا ڤێ هه‌يڤێ فرۆكێن ئه‌باتشى چار هێرش يێن كرينه‌ سه‌ر چه‌كدارێن داعش ل ده‌ڤه‌را فه‌لۆجه‌.

ئه‌ڤرۆ نيوز:

هه‌ر ئێك ژ وه‌لاتێن ئۆستراليا و هۆله‌ندا و به‌لچيكا راگه‌هاند كو ئه‌وان ژى ده‌ست ب هێرشێن ئه‌سمانى بۆ سه‌ر داعش كر.

هه‌ر وه‌كو مالپه‌رێ سكاى نيوز به‌لاڤكرى، هه‌ر ئێك ژ وه‌لاتێن ئۆستراليا و هۆله‌ندا و به‌لچيكا فرۆكێن خوه‌ يێن ئه‌سمانى هنارتينه‌ ژ بوو تۆپبارانكرنا چه‌كدارێن داعش ل عيراق و سوريا.

هێزێن ئوستراليا راگه‌هاند كو ئه‌وان ل رۆژا ئێكشه‌مبى 5\10 ده‌ستكريه‌ ب هێرشێن فرۆكه‌ڤانى بۆ سه‌ر چه‌كدارێن داعش ل عيراقێ.

وه‌زاره‌تا به‌ره‌ڤانيا به‌لچيكا ژى راگه‌هاند كو دو فرۆكێن جه‌نگى يێن به‌لچيكى ب مه‌ره‌ما تۆپبارانكرنا داعش هنارتينه‌ سه‌ر ئه‌سمانێ عيراقێ و ده‌ست ب هێرشان كريه‌.

لايه‌نێ سيێ ژى كو هۆله‌ندا بوويه‌، وێ ژى ژ لايێ خوه‌ ڤه‌ هێرشێن ئه‌سمانى بۆ سه‌ر داعش ل عيراقێ ده‌ستپێكرينه‌.