ئەڤرۆ نیوز:
ب گۆرەی راپۆرتەکا رۆژناما ئەڤرۆ کو سەرجان مەحمود بەرھەڤکریە ھاتیە کو کوردێن ئەرمەنستانێ و یێن ھەرێما ساراتۆڤ یێ روسیا پشتی کۆمبوون و گەنگەشەیێن بەرفرەە بریار دان بچنە باکور، رۆژئاڤا و باشورێ کوردستانێ و ل دووڤ ئیمکان و دەرفەتێن خوە پشکداریێ د ئازادکرنا ئاخا کوردستانێ دا بکەن و د ناڤ بەرخوەدانا گەلێ کورد یا بۆ پاراستنا ناموس و شەرەفا کوردایەتیێ دا جھێ خوە بگرن.
گەرناسێ کوردۆ مامۆستایێ قوتابخانەیێ ل باژێرێ ئیرەوان یێ پایتەختا ئەرمەنستانێ بۆ رۆژناما ئەڤرۆ راگەھاند کو ئەو ژ بەرخوەدانا ل کۆبانێ و شنگالێ ژ نێزیک ڤە ئاگاھدارن و ئێدی نەشێن وەسا ژ دوور ڤە تەماشە بکەن و گۆت: (رۆژ رۆژا پاراستنا ناموس و شەرەفا کوردایەتیێیە و دڤێت ھەموو ئاخا پیرۆزا کوردستانێ ل ژێر دەستێ تیرۆرستان بھێتە دەرخستن و مە ژی وەک کوردێن ئەرمەنستانێ بریار دا ئەم ژی نە ب تنێ ب رێیا ھاریکاریا ماددی لێ ب گیانێ خوە ژی پشتەڤانیێ ل کوردستانێ بکەین و بۆ ڤێ چەندێ ژی ل باژێرێ ئیرەوانێ ب دەھان لاوێن مە خوە بەرھەڤ کرینە بچنە رۆژئاڤا و باشورێ کوردستانێ و د ناڤ پاراستڤانێن کوردایەتیێ دا جھێ خوە بگرن).
گەرناس ھەروەسا دیار ژی کر کو ھەتا نھا دو جاران کەمپینێن کۆمکرنا ھاریکاریێ بۆ کۆبانێ و شنگالێ ئەنجامداینە و نھا ژی کەمپینا مە پشکداریا راستەوخوە یا د ناڤ بەرخوەدانا کوردستانێ دایە و ھەتا نھا گەلێ مە ب ژن، خۆرت و زارۆیێن خوە ڤە ب گەرمی پێشوازیێ ل ڤێ کەمپینا نوو کرینە و گۆت: (نیشتمانپەروەری و دلسۆزیا بۆ ئاخ و وەلاتی د رۆژێن زەحمەت و دژوار دا دیار دبیت و ئەم ژی وەک ئەرکەکێ نەتەوی و نیشتمانپەروەری دخوازن د ناڤا بەرخوەدانێ دا جھێ خوە بگرن و مل ب ملێ برایێن خوە یێن رۆژئاڤا و باشورێ کوردستانێ ئەرکێ خوە یێ نەتەوی بجە بینن).
ل ئالیێ دی کوردێن ھەرێما ساراتۆڤ یا روسیا فیدرال ژی دەست ب کۆمکرنا ھاریکاریا ماددی بۆ شنگال و کۆبانێ کرینە و ھەتا نھا ھژمارەک زێدە کەل و پەلێن پێدڤیێن مرۆڤی و پارە کۆمکرینە و دخوازن ئاستێ ھاریکاریێ ھێشتا بلندتر بکەن و بۆ ڤێ یەکێ ژی بەرھەڤیێ بۆ ھژمارەک چالاکیان دکەن، ژ ڤان چالاکیان یا یەکێ سازکرنا خوەنیشادانەکا بەرفرەە ل بەردەم پەرلەمانێ روسیا فیدرال، یا دویێ سەرەدانا دەزگەھێن راگەھاندنان بۆ سەرنج راکێشانا سەر رەوشا کۆبانێ و شنگالێ و بەلاڤکرنا بەلاڤۆکێن ل سەر کریارێن تیرۆرستێن داعشێ ل ھەمبەر کوردان و بەرخوەدانا مەزنا ھێزێن شەرڤانێن کورد ل ھەمبەر تیرۆرستانە.
ھەر د ڤێ دەربارێ دا حوکمەتێن نەمسا، ئەلمانیا و ئوسترالیا دەست ب ئۆپەراسیۆنێن بەرفرەە ل دژی ئەندام و ئالیگرێن رێکخستنا تیرۆرست یا داعش و قاعیدە کرینە و ل دووڤ نوچەیێن دەزگەھێن راگەھاندنا ئورۆپا ھەتا نھا ل ئەلمانیا ٤٨ کەس ژ ئەندام و ئالیگرێن داعشێ ھاتینە گرتن و بەلگەیێن گەلەک گرنگ ژی ل سەر چاوانیا خوە رێکخستنا داعشێ ل ئەلمانیا کەڤتیە دەستێ ھێزێن ئێمناھیێ.
ھەروەسا ل نەمسا ژی د ئەنجاما ئۆپەراسیۆنەکا ل دژی تیرۆرستان دا ٢٣ کەس ژ ئەندام و ئالیگرێن داعشێ ھاتن گرتن و حوکمەتا نەمسا بریار دایە ئەو کەسێن ژ وەلاتی وان چووینە ناڤ رێزێن داعش و قاعیدە دێ ژ وەلاتی بوونێ بھێنە ئاڤێتن و دەربارێ وان دا لێپرسینا د بن ناڤێ تاوانبارێن مرۆڤی بھێتە ڤەکرن.
سەبارەت ب ڤی بابەتی حوکمەتا ئوسترالیا ژی راگەھاند کو ئەو قەبوول ناکەن چو وەلاتیەکی وان د ناڤ رێکخستنێن تیرۆرستی دا جە بگرن و جھگرتنا د ناڤ رێکخستنێن تیرۆرستی دا تاوانەکا مەزنە و سزایێ وی ژی دێ یا گران بیت و ئەو کەسە دێ ژ وەلاتی بوونێ بھێنە دەرخستن، ھەتا نھا ٢٤ کەس ھاتینە دەستنیشان کرن کو چووینە د ناڤ رێزێن داعش و قاعیدە دا و ل دژی وان ل دادگەھێ دۆز ھاتیە ڤەکرن و دێ ژ ھەموو مافێن وەلاتیبوونێ بێ بار بمینن و ھەر دەمێ بھێنە دیتن ژی دێ بھێنە گرتن و دادگەھکرن.