ئه‌ڤرۆ نيوز، نيوار محه‌مه‌د سه‌ليم:

رێڤه‌به‌ريا پۆليسێن پارێزگه‌ها دهۆك راگه‌هاند كو ئه‌وان ده‌ست ب سه‌ر دو كه‌سان دا گرتيه‌ كو پلێتێن گازا سپى سه‌خته‌ كرينه‌ و چه‌ند كه‌س ژى ب تۆمه‌تا سه‌خته‌كرنا ناسنامێن عيراقى و بارێ شارستانى ژى ده‌سته‌سه‌ركرينه‌.

هێمن سلێمان، به‌رپرسێ راگه‌هاندنێ ل رێڤه‌به‌ريا پۆليسێن پارێزگه‌ها دهۆك، بۆ ئه‌ڤرۆ نيوز گۆت: “پۆليسێن دهۆكێ شيان ده‌ست ب سه‌ر دو كه‌سان دا بگرن كو رابووينه‌ ب سه‌خته‌كرنا 520 پلێتێن گازا سپى كو ل ده‌رڤه‌ى وه‌لاتى چاپكرينه‌”.

زێده‌تر گۆت: “ئه‌ڤ هه‌ردو كه‌سێن هاتينه‌ ده‌سته‌سه‌ركرن خه‌لكێ پارێزگه‌ها دهۆكێ نه‌ و پشتى ڤه‌كۆلينێ دێ بۆ دادگه‌هێ هێنه‌ ره‌وانه‌ كرن”.

به‌رپرسێ راگه‌هاندنێ ل رێڤه‌به‌ريا پۆليسێن پارێزگه‌ها دهۆك خواست كو خه‌لك بازرگانيێ ب پلێتێن گازا سپى نه‌كه‌ت و گۆت: “دبيت پلێته‌ك ژ وان بهێته‌ كرين و يا سه‌خته‌ بيت ل وى ده‌مى دێ كێشه‌ بۆ دروست بن”.

ژ لايه‌كێ دى ڤه‌ هێمن سلێمان دا زانين ژى كو گه‌له‌ك كه‌سێن ژ مووسل و ده‌ڤه‌رێن كوردستانى يێن ده‌رڤه‌ى ئيدارا هه‌رێمێ ژ به‌ر داعش ره‌ڤينه‌ دهۆكێ ناسنامێن كه‌ساتى و عيراقى سه‌خته‌ كرينه‌ ژ به‌ر نه‌بوونا فه‌رمانگه‌هان ل ده‌ڤه‌رێن وان و ئه‌و ژى هاتينه‌ ده‌سته‌سه‌ركرن.

ئەڤرۆ:

ھژمارەکا پەرلەمانتارێن کوردستانێ پرۆژە بڕیارەک دایە سەرۆکاتیا پەرلەمانی بۆ بڕینا مووچەکێ وان کەسێن دو مووچان ل حوکمەتا ھەرێما کوردستانێ وەردگرن.

د. شێرکۆ جەودەت ئەندامێ پەرلەمانێ کوردستانێ ل سەر فراکسیۆنا ئێکگرتۆ   د داخویانیەکا نڤێسی دا بۆ خەندان راگەھاند، ئەوان وەکو ھژمارەکا پەرلەمانتارێن پەرلەمانێ کوردستانێ ژ فراکسیۆنێن جودا د ناڤ پەرلەمانی دا و گۆت: “ل دووڤ پرۆژە باڕیارێ ئەو کەسێن پتر ژ مووچەکی ژ حوکمەتا ھەرێما کوردستانێ وەردگرن، پێدڤیە پشتی دەرکەفتنا پرۆژە بڕیارا پەرلەمانی، حوکمەت دووڤچوونێ بۆ ئەوێن دو مووچان وەردگرن بکەت و ئێکی ب بڕیت”.

ئاشکرا ژی کر، ئەڤ کێشا دو مووچەیێ بارگرانیەکا مەزن بۆ داراییا ھەرێما کوردستانێ دروستکریە و گەندەلیەکا مەزنە ژی د دەمێ بۆری دا ھاتیەکرن و گۆت: “پەرلەمانێ کوردستانێ دێ دووڤچوونا کێشا ئەوێن دو مووچان ژ حوکمەتێ وەردگرن کەت و ئەگەر دیار بوو کو ھندەک دو مووچان وەردگرن دێ ئێک ژێ ھێتە بڕین”.

وی پەرلەمانتارێ کوردستانێ خویا ژی کر، د نوکە دا ئەو پرۆژە بڕیار ل سەرۆکاتیا پەرلەمانی نە، ئەگەر حەفتیا بھێت ب کەنە ناڤ بەرنامێ کاری و پشتی پەسەندکرنا وی پرۆژەی، وی دەمی پێدڤیە حوکمەت د دەمێ دو ھەیڤان دا مووچەکێ وان کەسێن خودان دو مووچە ب بڕیت و ھەموو ئەو پارێ کو ل مووچێ دویێ وەرگرتی بۆ گەنجینا گشتی یا حوکمەتێ بھێتە ڤەگەراندن.

ھەولێر، قائید میرۆ:

بڕیارە ئەڤرۆ 5\11 ل باژێڕێ ھەولێرێ کەمپینەک ل بن ناڤێ (بلا پێشمەرگە بھێنە ئازا کرن ژ پێشینێن ھەڤژینیێ و ئاڤاھیان) بھێتە پێک ئینان، چالاکڤانەک ژی دبێژیت مەرەم ژ پێکئینانا ڤێ کەمپینێ ئەوە کو حوکمەت یا ھاریکار بیت بۆ باشتر کرنا رەوشا ئابووری یا پێشمەرگەی.

سیروان گەردی چالاکڤانێ مەدەنێ بۆ رۆژناما ئەڤرۆ دیارکر کو بڕیارە ئەڤرۆ ب بەرھەڤبوونا ھژمارەکا زۆرا رێکخراوێن جڤاکێ مەدەنی کەمپین بھێتە راگەھاندن، مەرەم ژ راگەھاندنا کەمپینێ ئەوە داخواز ژ ھەرسێ سەرۆکاتیێن ھەرێما کوردستانێ بھێتە کرن کو پێشمەرگێن بەری نوکە ژ وەرگرتنا پێشینا ھەڤژینیێ و ئاڤاھیان مفادار بووین بھێنە ئازاکرن، گۆت ژی مە زانیاری ھەنە رەوشا ئابووری یا ھندەک ژ وان یا خراپە و زۆربەیا ئەو پێشمەرگێن پێشینە وەرگرتی شیانێن دانەڤا پێشینان نینن و پێدڤیە حوکمەت رەوشا وان ل بەرچاڤ وەربگریت چونکو یێ بەڕەڤانیێ ژ ئاخا کوردستانێ دکەت.

گەردی گۆت ژی ئەڤ کەمپینە بەری نوکە ل باژێڕێ سلێمانیێ ھاتیە پێک ئینان و دێ دەستپێکێ دەست ب کۆم کرنا ئیمزایان ھێتە کرن بۆ پشتەڤانیا ڤێ پێنگاڤێ و ل دووڤ دا دێ سەرەدانا لایەنێن حکوومی یێن پەیوەندیدار کەن کو نابیتە بارگرانی ل سەر حوکمەتێ ھەکە پێشمەرگە بھێتە لێبوورین، چونکو ئەڤە پارە ناھێتە مەزاختن بەلکۆ دێ ھێنە لێبوورین ژ پارێ وان دایی، دیار ژی کر کو ئەو د خوازن ئەو پێشمەرگێن دەوامێ دکەن و ھەژار بھێنە لێبوورین، بەلێ نوکە چو ئامار ل بەردەست نینن کا چەند پێشمەرگە مفادار بووینە ژ وەرگرتنا پێشینان، بەلێ ھژمارەکا زۆر نینە، چونکو رێنمایێن حوکمەتێ رێ نادەت و رەوشا وان ژی یا باش نەبوویە بەری نوکە ھەتا بشێن ھژمارە زۆر مفادارببن.

ئەڤرۆ، رەوان نھێلی:

قادر وتمان بڕیاردەرێ لژنا ناڤخۆ ل پەرلەمانێ کوردستانێ بۆ ئەڤرۆ دیارکر کو ھەر ل دەستپێکا دروستبوونا قەیرانا غازێ ب تایبەت ل پارێزگەھا سلێمانیێ وان دووڤچوونا بابەتی ل گەل چەندین لایەنان کریە و گۆت ئەگەرێ سەرەکی یێ کێمبوونا غازێ ڤەدگەریت بۆ تێکچوونا کارگەھا دانەغاز ل ھەرێما کوردستانێ و کێمبوونا بەرھەمئینانا غازێ، بەلێ نوکە کار ل سەر یێ دھێتە کرن کو ئەڤ ئاریشە ب زووترین دەم دا بھێتە چارەکرن.

سەبارەت ب پرسا ب قاچاغ فروتنا نەفتێ ژ ئالیێ ھندەک بازرگانێن کورد ڤە ل گەل داعش، لژنەک ژ ئالیێ حوکمەتا ھەرێما کوردستانێ ھاتیە پێکئینان و قووناغێن باش برینە و ڤەکۆلین ل گەل گەلەک کەسان کریە کو ھەکە ل سەر بھێتە سەلماندن دێ دژوارترین سزا ل سەر ھێتە سەپاندن و گۆت بەری چەند رۆژان من وەزیرێ پێشمەرگەی دیت و من رەخنە لێ گرتن کو وان چەند کەس بۆ ڤەکۆلینان داخوازکرینە، کو پێشمەرگێن سادەنە و چو پۆست د دەستان دا نینە و من گۆتێ دڤێت ھوون د ئازا بن ژ بەر کو ئەڤ کەسێن بازرگانی کری، بەرپرسێن پلە بلندن، نە پێشمەرگەنە.

ژ ئالیێ خوەڤە ئدریس ھەرکی بڕیاردەرێ جڤاتا پارێزگەھا دھۆک بۆ ئەڤرۆ دیارکر ل سەر داخوازا وان، بڕیارە ئەڤرۆ رێڤەبەرێ بەلاڤکرنا بەرھەمێن گازێ ل پارێزگەھا دھۆکی، ئەگەرێن کێمبوونا غازێ بۆ وان دیار بکەت، کو ل دووڤ پێزانینێن وان بەری نوکە غاز ل پالاوگەھێن رەخێ مووسل دھات بەلێ نوکە ل پالاوگەھێن کەرکووکێ بۆ پارێزگەھا دھۆکێ دھێتە دابین کرن و بەھرا دھۆک یا کێمبووی، کو بەری نوکە چەند غاز ھاتبا داخواز کرن بۆ دھاتە دابین کرن، بەلێ ل پارێزگەھا دھۆکێ ھێشتا نەبوویە قەیران.