ئەڤرۆ نیۆز:

مەسعود بارزانی سەرۆکێ ھەرێما کوردستانێ ب ھەلکەفتا جەژنا قوربانا پیرۆز، پەیامەک ئاراستەی خەلکێ کوردستانێ و لایەنێن سیاسی و کەسوکارێن شەھید و ھەموو خەلکێ موسلمان کر.

سەرۆک بارزانی دبێژیت: “جەژنا ئەڤ سالە د دەمەکی دایە کو کوردستان د شەرەکێ ب زەحمەت و چارەنڤیس سازدا ل شەرێ ل گەل تیرۆرستێن داعش کو بەری نوکە سوپایێ دو وەلاتان تێک شکاندیە و چەکێ وان د دەستێ وان دایە و ل ھەمبەری پێشمەرگەی شەری دکەت، ژ بەر ھندێ ئەڤە بۆ پێشمەرگەی شەرێ مان و نەمانێ یە”.

سەرۆکێ ھەرێما کوردستانێ رۆلێ پێشمەرگەی ژی بلند نرخاند کو رۆژ بۆ رۆژێ تیرۆرستێن داعش تێک د شکێنن و سەرکەفتنێن مەزن ل سەر تۆمار دکەن.

دا زانین ژی کو ھێزێن پێشمەرگەی ب نوونەراتیا ھەموو جیھانێ شەرێ داعش دکەن و گۆت: “ژ ئەگەرێ باوەریا مە بۆ دیموکراسی و ئازادیێ، ژ ئەگەرێ بھایێن بلندێن ژیانێ و پێکڤەژیانێ ل کوردستانێ، ھەڤپەیمانیەکا نێڤدەولەتی بۆ مللەتێ مە ھاتە پێش، بۆ ژ ناڤبرنا وان، بزاڤێن خوە چڕ کرن”.

ده‌قێ په‌ياما سه‌رۆكێ هه‌رێما كوردستانێ:

بە ناوی خوای مەزن و دلۆڤان

بە بۆنەی هاتنەوەی جەژنی قوربانی پیرۆز، پیرۆزبایی لە خەڵكی كوردستان و هەموو حزب و لایەنە سیاسییەكان و سەرجەم موسڵمانانی عێراق و جیهان دەكەم. پیرۆزبایی شەرەفی بەرگریكردن و قوربانیدان لە خانەوادەی ئەو شەهیدە سەربەرزانە و پێشمەرگە قارەمانەكان دەكەم كە بە گیانی پیرۆزی خۆیان كوردستان و بەها پیرۆزەكانی مرۆڤایەتیان پاراست و دەیپارێزن.

جەژنی ئەمساڵ لە کاتێکدایە کە گەل و وڵاتەکەمان لە شەڕێکی چارەنووسسازدایە بەرانبەر تیرۆریستان و پێشمەرگە قارەمانەکانمان ڕۆژ لە دوای ڕۆژ سەرکەوتنی گەورە بەسەر تیرۆریستاندا تۆمار دەکەن. ئەم شەڕە بۆ کوردستان شەڕی مان و نەمانە بەرانبەر هێزێک کە پێشتر سوپای دوو وڵاتی تێکشاندووە و پێشکەوتووترین چەکی ئەو دوو سوپایەی بۆ پەلاماردانی کوردستان کەوتە دەست، بەڵام پێشمەرگە گیانلەسەردەستەکانی کوردستان توانیان لە بەرانبەریاندا بوەستن و لە زۆر شوێن تێكیانبشكێنن.

هێزی پێشمەرگەی کوردستان ئێستا بە نوێنەرایەتیی هەموو مرۆڤایەتی شەڕی ئەو هێزە تیرۆریستییە دەکات و بەهۆی بەها بەرزەکانی پێکەوەژیانی ئاشتییانە و بڕوابوونمان بە دیموکراسی و ئازادی هاوپەیمانێتییەکی نێودەوڵەتی بۆ پشتیوانییکردن لە گەلەکەمان هاتەکایەوە و خۆشبەختانە ئێستا ئەو هاوپەیمانێتییە هەوڵەکانی بۆ ڕیشەکێشکردنی تیرۆریستان چڕ کردۆتەوە.

هیوادارم ئەم جەژنە ببێتە مایەی سەرکەوتنی زیاتری گەلەکەمان و كوردستانیش لە پێشکەوتن و ئاوەدانی و ئارامی بەردەوام بێت.

مسعود بارزانی
سەرۆكی هەرێمی كوردستان
9 ذوالحجە/1435ـی كۆچی
3ـى تشرینی یەكەم/ 2014 زایینی

ھەولێر، قائید میرۆ:

رێڤەبەرێ راگەھاندنا وەزارەتا ئەوقاف و کاروبارێن ئاینی یا حوکمەتا ھەرێما کوردستانێ رەتکر، رێ ب ڤەکرنا چو قوتابخانەیەکا ئاینی یا حزبی و مەزھەبی بۆ شیعە و سەلەفیان دابیت و گۆت: ناھێلین چو قوتابخانێن مەزھەبی ھەبوونا وان ل کوردستانێ ھەبیت.

مەریوان نەقشبەندی، رێڤەبەرێ راگەھاندنا وەزارەتا ئەوقاف و کاروبارێن ئاینی بۆ ئەڤرۆ دیارکر، وەزارەتا ئەوقاف و کاروبارێن ئاینی رێکێ ب ڤەکرنا ھەموو جۆرەکێ قوتابخانێن ئاینی نادەت و گۆت” ل رۆژێن بۆری ھندەک زانیاری ل دەزگەھێن راگەھاندنێ ل دۆر ڤەکرنا ھژمارەک قوتابخانەیێن مەزھەبی و حزبی ھاتبوو بەلاڤکرن، بەلێ ئەم وەکی وەزارەتا ئەوقافێ تمامی ڤان زانیاریان رەت دکەین، ژبەرکو وەزارەتێ رێک ب ڤەکرنا چو قوتابخانەکا ئاینی بۆ مەزھەبێ شیعە و سەلەفیان نەدایە، راستە وەزارەتا ئەوقاف و کاروبارین ئاینی ب ئێک چاڤ بەرێ خوە ددەتە ھەموو ئاین و مەزھەبان و بیرو باوەران ، ھەروەسا وەزارەتا ئەوقافێ سەرپەرشتیاری ھەموو قوتابخانە و خواندنگەھێن ئاینی ل ھەرێما کوردستانێ دکەت،  رێکێ نادەین چو قوتابخانەیەکا ئاینی بن بناڤێ حزبی و مەزھەبی ل ھەرێمێ بھێتە ڤەکرن، ئەف مەنھەجێ ل قوتابخانەیێن ئاینی یێن کوردستانێ دھێتە خواندن، مەنھەجەکێ سەرانسەریە و ھەموو قوتابخانەیێن ئاینی دخوینن، بۆ کەسەکی نینە ل دەرڤەی ڤی مەنھەجی بخوینیت”.

مەریوانی گۆتژی” رۆژا ٢٣/٩ تاقیکرنێن راستڤەکرنا باوەرناما قوتابیێن پۆلا شەشێ ئیسلامی ھاتنە ئەنجامدان، ئەوژی بۆ وان قوتابیان بوو یێن ل خۆلا ئێکێ یا پۆلا شەشی زانستی دەرنەچووی، ژبەرکو ھژمارەک قوتابی ل خۆلا ئێکێ سەرنەکەفتبوون و دەلیڤە بوو کو قوتابی د خۆلا دویێ یا تاقیکرنان پشکدارببن و بشێن سەربکەڤن، ھەتا باوەرنامەیێن وان بھێنە راستڤەکرن”.

ئەڤرۆ نیۆز، سالار دۆسکی:
ب سەرپەرشتیا فەھیم عەبدولا حەمۆ سەرۆکێ جڤاتا پارێزگەھا دھۆکێ و ھژمارەکا ئەندامێن پەرلەمانێ کوردستانێ کو یێن پارێزگەھا دھۆکێ بووینە، د گەل ئەندامێن لیژنا پەروەردێ ل جڤاتا دھۆکێ و رێڤەبەرێن گشتی و قەزایێن پەروەردێ کۆمبوونەک، ل دۆر دیتنا چارەکا ب لەز بۆ ڤالاکرنا ئاڤاھیێن قوتابخانا بھێتە دیتن، پشتی چەندین دەمژمێرێن کۆمبوون، دووماھیێ ئەنجامێن کۆمبوونێ د پرێس کونفرانسەکی دا ژ لایێ سەرۆکێ جڤاتێ ڤە ھاتینە دیارکرن.
فەھیم عەبدولا حەمۆ کۆمبوون ب دەست پێشخەریا نڤیسینگەھا دھۆکێ یا پەرلەمانێ کوردستانێ قەلەم دا و گۆت: “دەرفەتەکا زێرین بوو د گەل رێڤەبەرێن پەورەردێن دھۆکێ روونینە خوار و یتنا چارەکێ بۆ ڤالاکرنا قوتابخانان ژ ئاوران”.
ناڤبری گۆتژی: “مەترسی ل سەر خواندنێ ل پارێزگەھا دھۆکێ ھەیە، لەوما کۆمبوونەکا سێ قولی ھاتە ئەنجام دان، گەلەک پێشنیاز و رۆھنکرن ھاتینەکرن و ھێشتا ٧٠% قوتابخانە وەکو خوە نە، کارێ کەمپان وەک پێدڤی ب رێڤەناچیت”.
سەرۆکێ جڤاتێ ئاماژە ب وێ چەندێ ژی کر کو ھەموو لایەن رێکەفتن کو پتر فشار بکەڤیتە سەر حوکمەتا ھەرێمێ و گۆت: “ئەڤە مافێ مەیە ل سەر ئەوان، بۆچی بارگرانی ھەموو ل سەر پارێزگەھا دھۆکێ بیت و سالا خواندنێ بیت قوربانی”.
فەھیمی گۆتژی: “ھەر چ بھێتەکرن کو ئەڤ کەمپە ب زووترین دەم ب دووماھی بێن و قوتابخانە بھێنە ڤالاکرن و دەست ب خواندنێ بھێتەکرن”.
ناڤبری ئاشکراکر کو دووڤچوونەکا پێ گوھۆڕ بۆ بھێتە دیتن وەک ئاڤاھیێن عومباران و کار بھێتە کرن دێ چاوان ئاواران ژ قوتابخانان دەرێخن.
یرونت نیسان ئەندامێ پەرلەمانێ کوردستانێ بۆ ئەڤرۆ نیوز گۆت: “ھەژمارا ئاواران ل کوردستانێ، ملیۆنەک ٣٠٢ ھزار کەسن، دھۆکێ ٦٣%نە، ٢٠% ھەولێرێ ١٧% سلێمانیێ نە، پشتی روودانێن شنگالێ پتر ژ ٥٤٣ ھزار کەسان ھاتینە دھۆکێ”.
گۆتژی: “نوکە ١٦ کەمپ ل پارێزگەھا دھۆکێ دھێنەچێکرن، ٧ سێمێلێ ، سێ زاخۆ، سێ شێخان ئێک باعەدرێ، ئێک ئامێدیێ، ئێک بەردەرش، ئێک ئاکرێ ب تنێ شولێ کەمپان یێ گیرودبیت، ١٩٠٠ خێزان سێمێلێ چووینە دکەمپان دا، شێخان ٢٠٠٠ خێزان چووینە د کەمپان دا”.
یرونت ئاشکراکر کو دھۆکێ چار ھزار و ٦٥ قوتابی ھەنە، ئانکو ٦٤% قوتابیێن دھۆکێ زەرەر مەندبووینە، ئانکو کریارا فێرکرنێ ل پارێزگەھا دھۆکێ نۆکە یا فاشلە، دڤێت ئەڤ ھژمارە بھێتەکێمکرن ھەتا ١/١١ دا قوتابی زێدەتر زەڕەر مەند نەبن.
یروەنت خوشحالیا خوە ژ کۆمبوونێ دیارکر کو ھەمو لایەن خەمخورێن قوتابیێن دھۆکێ نە و ب لەز دیتنا چارەکێ، گۆت: “لیژنەک دھێتە پێکئینان کو ب زووترین دەم حوکمەت کەمپان چێکەت و دیسان د گەل پارێزگەھێ دووڤچوونێ بکەت و بۆچی گیرۆ بووینە، ھەک کەمپ ب دووماھی نەھێن دێ بزاڤا کەین ڤی خەلکی ژ قوتابخانا بکەینە ئاڤاھیێن ھەیکل و عومباران و کەلھا نزارکێ دا”.

ئه‌ڤرۆ نيوز، نيوار محه‌مه‌د سه‌ليم:

ژێده‌ره‌كى ژ رێڤه‌به‌ريا پۆليسێن دهۆكێ راگه‌هاند كو شڤێدى ل تاخێ پێشه‌سازى ل دهۆكێ كه‌سه‌كى خوه‌ ب چه‌قويێ كوشت.

نه‌قيبێ مافپه‌روه‌ر هێمن سلێمان رێڤه‌به‌رێ په‌يوه‌ندى و راگه‌هاندنێ ل رێڤه‌به‌ريا پۆليسێن پارێزگه‌ها دهۆكێ بۆ ئه‌ڤرۆ نيوز دياركر كو شڤێدى ده‌مژمێر 11:30 ئه‌و هاتينه‌ ئاگه‌هدار كرن كو كه‌سه‌كێ 40 سالى ل تاخێ پێشه‌سازى يا خوه‌ كوشتى.

هێمن سلێمان گۆتژى: “پشتى ئه‌م ل جهێ روودانێ ئاماده‌بووى و مه‌ ڤه‌گوهاستى بۆ نوشداريا داد ل دهۆكێ ديار بوو كو ئه‌وى ب رێيا چه‌قوويێ كو ل سينگێ خوه‌ دايه‌، دووماهى ب ژيانا خوه‌ ئينايه‌”.

ل دۆر ئه‌گه‌رێ روودانێ ژى ئاشكه‌را كر كو ئه‌ڤ كه‌سى نه‌خۆشيه‌كا ده‌روونى هه‌بوويه‌ و دبيت تۆڕه‌ ببيت ژ خوه‌ و ئه‌ڤ چه‌نده‌ كريه‌.

ئه‌ڤ كه‌سێ خوه‌ كوشتى فه‌رمانبه‌ر و ل به‌غدا ده‌وامێ دكه‌ت و سه‌ر ب حوكمه‌تا عيراقا فيدرال ڤه‌بوويه‌.