ئەڤرۆ:

دیندار نەجمان دۆسکی ئەندامەکێ سەرکرداتیا ئێکگرتوویا ئیسلامی یا کوردستانێ د ديداره‌كێ دا كو ڤه‌گێر سه‌عدولا بۆ رۆژناما ئه‌ڤرۆ به‌رهه‌ڤكريه‌ دیار کر کو کومبوونا سەرکرداتیا وان ل دۆر داخوازێن بادینان یا ئەرێنی بوو و بۆ رۆژناما ئەڤرۆ گۆت “مە وەکو سەرکردایەتیا دەڤەرا بەھدینان د پاکێجەکێ دا داخوازیێن خوە بەرچاڤ کرن و دانوستاندن ل سەر ھاتە کرن و پتریا داخوازیێن مە یێن کو د دەستھەلاتا سەرکرداتیێ دا بوون ھاتنە قەبوول کرن”.

دیندار نەجمان دۆسکی ئاشکرا ژی کر کو لیژنەک بۆ چاوانیا بەلاڤکرنا پۆستان ھاتە پێکئینان و قەبارێ حزبی ل ھەر دەڤەرەکێ دێ ل بەرچاڤ ھێتە وەرگرتن و ئێدی پۆستێن حزبی د ناڤ ئێکگرتوو دا دێ ل سەر بنەمایێ رێژا حزبی ل ھەر پارێزگەھەکێ ھێنە بەلاڤکرن و پۆستێن حکومی ژی دێ ل دووڤ ئستیحقاقێ ھەلبژارتنان یێ وێ دەڤەرێ ھێنە بەلاڤکرن کا ھەر دەڤەرەکێ چەند دەنگ ئیناینە ل دووڤ وێ رێژەیێ پۆست ل سەر بھێنە پارڤەکرن.

د پشکەکا دی یا ئاخڤتنێن خوە دا دیندار نەجمانی گۆت”بەری نوکە دەڤەرا بەھدینان و ھەولێرێ د بەلاڤکرنا پۆستان دا د مەغدۆر بوون و پۆستێن حزبی و حکومی کێمتر ژ ئیستیحقاقێ خوە وەرگرتینە، لەوما بڕیار ھاتە دان دەڤەرا بەھدینان و ھەولێرێ بھێنە قەرەبووکرن”.

ل دۆر چاوانیا قەرەبووکرنێ، دیندار نەجمان دبێژیت”ھەتا نوکە گەلەک پۆست یێن ماین د حوکمەتا ھەرێما کوردستانێ و بەغدا دا نەھاتینە پارڤەکرن، وەکو پۆستێن رێڤەبەرێن گشتی و بریکارێن وەزیران و شیرەتکاران. بریار ئەوە دەمێ دانوستاندن ل گەل سەرۆکێ جڤاتا وەزیران دھێتـە کرن، د وان پۆستان دا قەرەبوویا دەڤەرا بەھدینان بھێتە کرن”.

دیندار ئاماژە ب وێ یەکێ ژی دا کو د کومبوونا سەرکردایەتیێ دا بەحسێ (لا مەرکەزیەتێ) د ناڤ حزبێ دا ھاتە کرن و بریار ھاتە دان کو سەرکردایەتیا ھەر دەڤەرەکێ ھەتا دەمێ کونگرەی رۆلێ خوە بگێریت و دەستھەلاتێن خوە بکاربینیت.

ڤی ئەندامێ سەرکردایەتیا ئێکگرتوویا ئیسلامی گوت ژی”دیسا بریار ھاتە دان ئەو کێشێن ستراتیژی یێن حزبێ یێن کو ل سەرکردایەتیێ ناھێنە چارەسەرکرن کو کێشەیێن ھزرینە کونگرە بۆ بھێتە گرێدان. بۆ نموونە بۆ بابەتێ دەعوێ و سیاسەتێ یان ھندەک کێشێن دی یێن د ناڤ حزبێ دا ل سەرکردایەتیا ھەر دەڤەرەکێ پتر روونشتن ل سەر بھێنە کرن ھەتا د گەھنە ئەنجامەکی و ھەکە پێدڤی بوو کونگرەی بینینە پێش ئەو ژی دێ ھێتە پێش”.

د بەرسڤا پرسیارەکا (ئەڤرۆ) دا، ئایا دێ کونگرێ ئێکگرتوویا ئیسلامی ھێتە پێشخستن، گۆت”ل دووڤ پەیرەوێ ناڤخوەیی یێ حزبێ، دەستھەلاتا سەرکردایەتیێ یە کونگرەی پاش بێخیت، لێ دەستھەلاتا سەرکردایەتیێ نینە کونگرەی بینیتە پێش، بتنێ د حالەتەکێ دا ھەکە قەیران ھەبیت”.

ھەڤپەیڤینا رۆژناما (ئەڤرۆ) ل گەل دیندار نەجمان دۆسکی ل رۆژا سێشەمبی 25\11 رەنگڤەدانێن جودا د ناڤ ئەندام و لایەنگرێن ئێکگرتووی دا ھەبوون ب تایبەتی ل تۆرا جڤاکی یا فێسبووکێ، ل دۆر وێ یەکێ کا د کومبوونا سەرکردایەتیێ دا بەحسێ وێ دیدارێ ھاتە کرن، دیندار نەجمانی گۆت”ئەز یێ بەرھەڤ بووم کو بەحسێ وێ ھەڤپەیڤینێ بھێتە کرن، لێ ئەمیندارێ گشتی و سەرۆکێ دەستەیا سەرکردایەتیێ پێ باش نەبوو بەحسێ وی بابەتی بھێتە کرن، لێ ھەلبەت وێ ھەڤپەیڤینێ کاریگەری ل سەر رێکخستنێن مە دروستکربوو ب تایبەتی ل تۆرا جڤاکی یا فێسبووکێ، لێ بجھئینانا داخوازیێن دەڤەرا بەھدینان ئەڤ بابەتە دێ بن بڕ بیت و ئەم د گەشبینین کو ئەو کێشە ئێکلا بن”.

د ھەڤپەیڤینەکێ دا کو ل رۆژا سێشەمبیا بۆری د رۆژناما (ئەڤرۆ) دا بەلاڤ ببوو، دیندار نەجمان دوسکی ئەندامێ سەرکردایەتیا ئێکگرتوو یا ئیسلامی یا کوردستانێ و ئێک ژ دامەزرێنەرێن وێ حزبێ دیار کر بوو کو کو کێشە د ناڤخوەیا ئێکگرتووی دا یێن ھەین ب تایبەتی ژی پشتی پشکداریکرنێ د حوکمەتێ دا و ھەروەسا ل دۆر ھندەک ستراتیژیەتێن ئێکگرتوویێ و گۆتبوو”تێبینیێن مە وەکو ئێکگرتوویێن دەڤەرا بەھدینان بتنێ ل سەر چاوانیا پارڤەکرنا پۆستان نینە، ھەرچەندە د پارڤەکرنا پۆستان دا غەدرەکا مەزن یا ل دەڤەرا بەھدینان و ھەولێرێ ھاتیە کرن، مەعقول نینە تۆ ل دھۆکێ 30 ھزار دەنگان زێدەکەی و ل سلێمانیێ 30 ھزار ھاتبنە کێمکرن یان ل ھەولێرێ 20 ھزار ھاتبنە کێمکرن و ئەو بچن ببنە وەزیر. دەمێ ئێکگرتوو دروست ژی بووی ئەم وەکو دەڤەرا بەھدینان د ئێک رێز بووین و مە ئێک سەرکردایەتی ھەبوو و ئەم وەکو دەڤەر چووینە دگەل ئێکگرتووی دا و کەس نەھاتیە ڤێرێ ئەم کرینە ئێکگرتوو، بەلکو ژ قەندیلی ھەتا زاخۆ ئەم ئێک میحوەر بووین و ئەم پێکڤە یێن گەھشتینە ئێکگرتووی”.