ئەڤرۆ:

فەرماندەکێ ھێزێن پشتەڤانیا پێشمەرگێ کوردستانێ ل کۆبانێ دیار کر کو ئەو ھاتینە ئاگەھدارکرن ئەڤرۆ 1\12\2\2014 یان سوبەھی ڤەگەرنە ھەرێما کوردستانێ و گۆت “دوھی 29\11 ھێزێن پێشمەرگەی ب دژوارترین رەنگ بەرسڤا ھێرشێن داعش داینە”.

لیوا عەبدولقھار مەجید دۆسکی، فەرماندێ ھێزێن پشتەڤانیا پێشمەرگێ باشوورێ کوردستانێ ل کۆبانێ ئاشکرا کر، ئەو ھاتبوونە ئاگەھدارکرن کو ل 27\11\2014 ڤەگەرنە ھەرێمێ لێ وەسا چێ نەبوو، و بۆ ئەڤرۆ گۆت “ئەم ھاتینە ئاگەھدارکرن ئەڤرۆ 1\12 یان سوبەھی ڤەگەرینە ھەرێما کوردستانێ”.

دۆسکی خویا ژی کر، شەرێ ھێزێن کوردی د گەل تیرۆرستێن داعش ل کۆبانێ یێ بەردەوامە و شەڤا بۆری ژ سێ لایانڤە تیرۆرستێن داعش ھێرش کرینە و ل لایێ رۆژ ھەلات شەر ھەتا شەڤا ل دووڤ دا ژی یێ بەردەوام بوو، پێشمەرگەی ژی ب دژوارترین رەنگ بەرسڤا ھێرشێن وان دایە و گۆت “ب تنێ دوھی 29\11\2014 نێزیکی 100 تۆپ و مۆشەکان مە تێوەرکرینە”.

وەکو دیار ٢٨/١٠/٢٠١٤ ١٥١ پێشمەرگێن ھێزا پشتەڤان یا ئێک و دو یێن سەر ب وەزارەتا پێشمەرگەی ڤە ب چەکێ گران و ب رێیا تورکیا دەربازی رۆژئاڤایێ کوردستانێ و باژێرێ کۆبانێ بوون.

ئەڤرۆ نيوز:

د راپۆرته‌كا رۆژناما ئه‌ڤرۆ دا كو چه‌كدار ئه‌ترووشى ئاماده‌كريه‌ ئاماژه‌ ب وێ چه‌ندێ كريه‌ كو پشتی ل چەند دەمژمێرێن دەرباز بووی تیرۆرستێن داعش ھێرش کریە سەر ھەموو میحوەرێن پێشمەرگەی ل رۆژئاڤا و رۆژھەلاتێ دیجلەی و ئەو ھێرشە ھاتینە تێکشکاندن، فەرماندەیێن پێشمەرگەی دیار دکەن کو داعش دێ ھەموو بزاڤان کەت بۆ ھندێ ورەیا خوە بلند بکەن، لێ بەردەوام شکەستنان دخوەن.

عەقید ئەدیب تروانشی بەرپرسێ راگەھاندن و رەوشەنبیریا سوپایێ ئێک یێ ھێزێن زێرەڤانی دیارکر کو داعش ب ھەموو رەنگان یا شکەستی یە ژبەر وێ چەندێ دڤێت خوە دیار بکەت و گوت” پشتی چەندین ھێرشێن داعش بۆ سەر سکرێ مووسل ب گشتی و دەڤەرا سەھلج ب تایبەتی کو ھەموو لڤینێن وان ھاتینە ژناڤبرن و تێکشکاندن ژلایێ پێشمەرگەی و ھێزێن ھەڤپەیمانان ڤە، داعش دڤێت خوە دیار بکەت کو یا مایی و ورەیا خوە بلند بکەت ب ئەڤێ چەندێ”.

تروانشی ئاماژە ب وێ چەندێ کر کو رولێ فرۆکەیێن ھەڤپەیمانان یێ دیارە و گوت” وێرەکی و شارەزایی یا ھێزێن پێشمەرگێ کوردستانێ ب ھەموو رەنگان جیھان حێبەتێ کریە ، لێ نابیت رۆلێ فروکەیێن ھێزێن ھەڤپەیمانان ب تایبەت ئەمریکا و بریتانیا بھێتە ژبیرکرن کو بووینە ئەگەر ھێرشێن داعش بھێنە ژناڤبرن”.

بەرپرسێ راگەھاندن و رەوشەنبیریا سوپایێ ئێکێ زێرەڤانی ئەو چەندە دیارکر کو ب دوور نابینم دەڤەرێن مای رزگار ببن و گوت” ب ئەڤێ ورەیا پێشمەرگێ کوردستانێ و ئەو نەخشەیێن دھێنە دانان بۆ شەرێ دژی تیرۆرستێن داعش ب دوور نابینم ل دەمەکێ نێزیک ھەموو سنورێ کوردستانێ و زێدەتر بھێنە کونترۆلکرن”.

ژ لایەکێ دیڤە فەرماندێ ھێزا دژە تیرۆرا پارێزگەھا دھۆکێ عەقید ئەحمەد ل دۆر رەوشا زومار دیارکر کو رەوش یا تەنایە و گوت” ژ ھەموو ئالیەکی ڤە رەوشا سەنتەرێ زومار یا تەنایە و ژلایێ پێشمەرگەی ڤە ھاتیە کونترۆلکرن”.

عەقید ئەحمەد ئەو چەندە دیاکر کو ل دەوروبەرێن زومار ھندەک لڤین یێن ھەین و گوت” ل دەوروبەرێن ناحیا زومار ھندەک جاران لڤینێن داعش یێن ھەین، لێ ب ھشیاری و شارەزایا پێشمەرگەی دھێنە ژناڤبرن و ب ھەموو دلنیایی ڤە دبێژم کو زومار یا تەنایە و چو لێ نینە”.