ئه‌ڤرۆ نيوز:
دوهى 21\10 چه‌كدارێن داعش ژ چه‌ند ميحوه‌ران دا هێرش كره سه‌ر پێشمه‌رگه‌يێ كوردستانێ و ل هه‌موو جهان شكه‌ستن خوار، ل ميحوه‌رێ وانكێ پشتى شكه‌ستين خۆ كۆژه‌كى خۆ ب رێيا ترۆمبێله‌كا مه‌زن خوه ب پێشمه‌رگه‌ى ڤه په‌قاند.
د روودانه‌كا خۆكۆژى دا ل وانكێ ترۆمبێله‌كا تانكه‌ر پشتى شكه‌ستنێ ب ره‌نگه‌كێ خۆكۆژى خوه ب هێزێن پێشمه‌رگه‌ى ڤه په‌قاند و زێده‌ترى 15 پێشمه‌رگه شه هيدبون و نێزێكى 20 دى ژى بريندار بوون.
ئه‌ڤرۆ نيوز، ناجی به‌ده‌ل:
بڕيار بوو ئه‌ڤرۆ پۆستێ ده‌سته‌يا ده‌ڤه‌رێن كوردستان يێن ده‌رڤه‌ى ئيدارا هه‌رێمێ ب كه‌سه‌كێ سه‌ر ب ئێكگرتوو ئيسلامى كوردستان بهێته دان، به‌لێ ژبه‌ر ئاماده‌نه‌بوونا سه‌رۆكێ به‌رێ يێ ده‌ستێ، محه‌مه‌د ئيسان، كو ب كاره‌كێ ژ نشكه‌كێ ڤه چوويه ژ ده‌رڤه‌ى وه‌لاتى، بۆ رۆژا ئێكشه‌مبى هاته پاشخستن.
نسره‌دين سه‌عيد، به‌ربژێرێ ئه‌وى پۆستى ل سه‌ر ئێكگرتوويا ئيسلامى كوردستان بۆ ئه‌ڤرۆ نيوز گۆت: “بڕيار بوو ئه‌ڤرۆ ب ئاماده‌بوونا سه‌رۆكێ به‌رێ يێ ده‌سته‌يا ده‌ڤه‌رێن كوردستانى يێن ده‌رڤه‌ى ئيدارا هه‌رێمێ بهێمه راسپاردن، به‌لێ ئاماده‌نه‌بوونا سه‌رۆكێ به‌رێ يێ ده‌ستێ بۆ رۆژائێكشه‌مبيا بهێت هاته پاشخستن”.
زێده‌تر گۆت: “ئاماده‌نه‌بوونا سه‌رۆكێ ده‌سته‌يا ده‌ڤه‌رێن كوردستانێ يێن ژ ده‌رڤه ئيدارا هه‌رێمێ ژ ئه‌گه‌رێ په‌يدابوونا كاره‌كێ ژ نيشكه‌كێ ڤه بوو ل ژ ده‌رڤه‌ى وه‌لاتى”.
نه‌سره‌دين سه‌عيد ئه‌و چه‌ند ژى دا زانين كو ئه‌ڤ ده‌سته دێ د پاشه‌رۆژێ دا بيته وه‌زاره‌ت و گۆت: “به‌لێ دێ جارێ ب ڤى ره‌نگى كار كه‌ين، هه‌تا قانوون ژ لايێ په‌رله‌مانێ كوردستانێ ڤه دهێته راستڤه‌كرن و نوكه وه‌كو وه‌زير دێ سووندا قانوونى خۆين”.
ئه‌ڤرۆ نيوز، ناجی به‌ده‌ل:
بڕياره پشتى ده‌مه‌كێ كێم په‌رله‌مانێ كوردستانێ ل سه‌ر چه‌ندين پرسێن گرنگ روونيت و يا ژ هه‌موويان گرنگتر ژى بۆ خه‌لكێ پارێزگه‌ها دهۆكێ دێ مێڤانداريكرنا وه‌زيرێ په‌روه‌ردێ بيت دا كوهنده‌ك رۆهنكرنان ل سه‌ر ره‌وشا په‌روه‌ردێ ل دهۆكێ بده‌ت.
سه‌هراب میكائیل محه‌مه‌د ئه‌ندامێ په‌رله‌مانێ كوردستانێ بۆ ئه‌ڤرۆ نیوز گۆت: “د روونشتنا كاری یا ئه‌ڤرۆ دێ چه‌ند پرسه‌كێن گرێدایی ب هه‌رێمێ ڤه كو ژ وان پرسا خواندنێ ل پارێزگه‌ها دهۆكێ ل گه‌ل وه‌زیری په‌روه‌ردێ وه‌كو مێڤانكرن بيت دا كو رۆژا ده‌سپێكرنا ده‌وامێ ل دهۆكێ و ميكانيزما كارى بهێته زانين”.
زێده‌تر گۆت: “بڕیاره ئه‌ڤرۆ راستڤه‌كرنا هنده‌ك ماده‌یێن په‌یره‌وێ ناڤخویێ په‌رله‌مانی و قانوونا خۆنيشادانان كو ژ لایێ سه‌رۆكێ هه‌رێمێ ڤه هاتبوو ره‌تكرن بهێته‌كرن و گرفتێن خواندنێ، ل گه‌ل وه‌زیرێ په‌روه‌ردێ دێ گه‌نگه‌شه ل سه‌ر هێته‌كرن و ده‌رباری زمانێن فه‌رمی ل هه‌رێما كوردستانێ د كارێ رۆنشتنا ئه‌ڤرۆ دانه”.
هه‌روه‌سا ناڤبری ئه‌و چه‌نده ژی دیاركر كو خواندنا ئێكێ بۆ چه‌ندین پرۆژان ژی هێته كرن ژ وان پرۆژێ راستڤه‌كرنا ده‌سته‌یا ده‌ستپاكی و هاریكاریا جڤاكى و راستڤه‌كرنا هنده‌ك ماده‌یێن قانوونا سزادانا عیراقی و قانوونا به‌رهه‌نگاربۆونا له‌شفرۆشیێ و قانوونا نه‌هێلانا له‌شفرۆشیێ و قانوونا لێبورینا گشتی ل هه‌رێمێ و پارێزگه‌هێن هه‌رێمێ و رێپێده‌رێ شه‌رعی و قانوونا هه‌يڤا سۆر خواندنا ئێكێ بۆ هێته كرن و هێنه ره‌وانه‌كرن بۆ لیژنه‌یێن تایبه‌تمه‌ند دا رێكارێن قانوونى بۆ بهێنه دیتن.
ئه‌ڤرۆ نيوز، بارزان مزوورى:
ژێده‌ره‌كى ژ هێزێن له‌شكرێ كوردستانێ ل ميحوه‌رێ نه‌وه‌ران راگه‌هاند كو ژ ده‌مژمێر 4ى سپێدێ چه‌كدارێن داعش هێرشكريه سه‌ر وى ميحوه‌رى ب مه‌ره‌ما وێ چه‌ندێ پێشره‌ويێ بكه‌ن.
ئه‌ڤى ژێده‌رێ ئه‌ڤرۆ نيوز پاراستن ل سه‌ر ناڤێ وى كرى، بۆ ئه‌ڤرۆ نيوز گۆت: “ئه‌ڤرۆ سپێدێ 21\10 هژماره‌كا چه‌كدارێن داعش ل سنورێ ميحوه‌رێ نه‌وه‌ران هێرش كريه سه‌ر هێزێن پێشمه‌رگه‌ى ب مه‌ره‌ما شكاندننا پێشمه‌رگه‌يى و پێشره‌وى كرنێ، به‌لێ پێشمه‌رگه‌يێ به‌رسينگێن وان گرتن و نه‌هێلان پێشره‌ه‌ويێ بكه‌ن”.
زێده‌تر گۆت: “نوكه ژى شه‌ر د ناڤبه‌را هه‌ردو لا دا يێ به‌رده‌وامه و هێزێن پێشمه‌رگه‌ى يێ ب چه‌كێ گران به‌ر سينگێ پێشره‌ويێن وان دگرن و ناهێلن پێشڤه بهێن”.
ئه‌ڤرۆ، لەزگین جۆقی:
سەرۆکێ دەستەیا بلندا بنگەھێ لالش یێ رەوشەنبیری و کۆمەلایەتی و ئەندامێ پەرلەمانی کوردستانی بۆ ئەڤرۆ دیارکرکو داعش نە تنێ کارەسات ب سەرێ ئێزدیان ئینا، بەلکو داعش نەمینیت ژی، دێ دوژمنایەتی د ناڤبەرا ئێزدیان و عەرەبێن دەڤەرێ دا دروست بیت، چونکو عەرەب ل گەل داعش بوونە چووت و زیانێن مەزن گەھاندنە ئێزدیان و عەرەبان پتر ژ داعش ئێزدی ل شنگالێ ئیشاندن و ب دیتنا من پشتی رزگارکرنا شنگالێ دێ پێکڤەژیان ل گەل عەرەبان گەلەک بزەحمەت بیت. شێخ شامو شێخو بۆ ئەڤرۆ گوت” ئێدی سەرکرداتیا سیاسی یا کوردی رەوشا بەری نوکە قەبوول ناکەت و خوە ل ھیڤیا مادێ ١٤٠ ناگریت و ژبلی زیانی مە چو مفا ژ مادێ ١٤٠ نەدیت و نوری مالکی رێ دا داعش بھێتە دەڤەری و چەکێ لەشکەرێ مالکێ کارەسات ب سەرێ خەلکێ ئینا و ئەم پێشنیاز دکەین شنگال ببیتە ئیدارەکا سەربەخوە و ئێکسەر گرێدای جڤاتا وەزیران، ئەز ب باوەرم پشتی دامەزراندنا ھەموو دامودەزگەھان، دێ پتر خزمەتا خەلکێ شنگالێ ھێتە کرن ھەکە سەر ئاستێ پارێزگەھەکێ رەفتار ل گەل شنگالێ بھێتە کرن، دێ خەلک پتر شێن قەستا شنگالێ بکەن”.
شێخ شاموی ئەوژی خوەیاکر مێرخاسێن ئێزدیان ل چیایێ شنگالێ خوە راگرت و شەڕێ تیرۆرستان کر و ھەکە چیایێ شنگالێ ژی ھاتبا چولکرن، دا رەوشا ئێزدیان خرابتر بیتو نوکە ل چیایێ شنگالێ دا چەکدارێن ئیزدیان و پێشمەرگێ کوردستانێ ھەیە و ھەڤکاریەکا باش دناڤبەرا واندا یا ھەی و ھەموو بزاڤان دکەن کو داعش ب سەر چیایی نەکەڤیت و ئەڤ بەرخوەدانا ل چیایێ شنگالێ بەرخوەدانەکا پیرۆزە نە بتنی د دیتنا مەدا، بەلکو ددیتنا سەرکرداتیا سیاسی دا و بەردەوام پشتەڤانی ل وان دھێتە کرن.
سەرۆکێ دەستەیا بلندا بنگەھی لالش یی رەوشەنبیری و کۆمەلایەتی گۆتژی” گەلەک جاران د کارەساتاندا ژی مفا ھەنە و کارەساتا شنگالێ گەلەک یا مەزنە، بەلێ ڤێ کارەساتێ گەلەک دیوارێن ژ ھەڤ جوداکرنی ھەرفاندن و ئەو چەندا خەلکێ پارێزگەھا دھۆکێ بۆ ئاوارێن ئێزدی کری ل زاخۆ و ئامێدیێ و دھۆکێ و ئاکرێ و ھەموو دەڤەرێن دی بگرە ژ ماموستایێن ئاینی و کەسایەتیێن جڤاکی و سیاسی ھەموو دەرگەە ل بەر ئاواران ڤەکرن وڤەحەواندن و ھەمبیزکرن، ئێزدی چو جاران کەڤرا ناھاڤێنە وێ کانیا ئاڤێ ژێ ڤەدخوەن و پێدڤیە چو جاران ئیزدی ڤی ھەلویستێ خەلکێ پارێزگەھا دھۆکێ ژبیر نەکەن، ھەکە ئاوارە نەھاتبانە دھۆکێ، دا کیڤە چن؟ جھێ مخابنیێ یە ھندەک کەسان سوپاسیا ھندەک عەرەبان کر و ژبیر دکەن سوپاسیا مللەتی خوە یی دھۆکێ بکەن و چارەنڤیسێ ئێزدیان بەر ب بەغدا دبەن، باشە ددرێژاھیا دیرۆکێ دا ئێزدیان چ خێر ژ بەغدا دیتیە ھەتا ھندەک چارەنڤیسێ خوە ب بەغدا ڤە گریدەن؟. جھێ مخابنیێ یە ل یاری ب ھەستێن ئاواران بھێتە کرن و پێدڤیە مرۆڤ پشتا خوە نەدەتە وی خەلکێ قەنجی ل ئاوارێن ئیزدی کری. ئەندامێ پەرلەمانێ کوردستانێ ئاشکرا کر ژی کو جیھان ھەموو دھاوارا کوردستانێ ھات دەمێ د ھاوارا کوردستانێ ھاتین، ئانکو د ھاوارا ئێزدیان ژی ھاتن و نابیت ئەم خوە ژ بەر ڤی سیبەرا ب ھێز دوور بکەین و بەرێ خوە بدەینە ئایندەکێ تاری و ب دیتنا من ئەڤە دوژمنایەتیەکە مرۆڤ ل گەل مللەتێ خوە دکەت. ناڤبری ئەوژی خوەیا کر کو کوچبەریا پێکڤە یا ئێزدیان خەونە و چو جاران بجە ناھێت و بوجی مرۆڤ تشتەکی بێژیت چو پێڤە نەھێت؟ ما پێدڤی دکەت مرۆڤ خوە پێ ئەرزان بکەت؟ ئەم ھەموو دزانین چو وەلات رازی نابن کوچبەریا بکەم وەربگرن، دیسا ھەر مللەتەکێ کوچبەریا ب کوم بکەت، ئەو مللەت بێ ئاخ دمینیت و بەرزە دبیت، کەنگی دخێرا ئێزدیان دایە لالشا نورانی و ئاخا شنگالێ بێ خوەدان بمینن و ئێزدی ھەموو بەر ب وەلاتەکێ بیانی بچن؟ ھەکە ئەم بەحسێ سالا ١٩٩١ی بکەین دەمێ ئازادیا کوردستانێ دەستپێکری، خەلک یێ چویە ئورۆپا ئەڤە تشتەکی نۆرمالە ھەر ئێکی دل تێدا ھەبیت وشیان ھەبیت بچیت تشتەکێ نورمالە و کەس نابێژتی نەچە، لێ کوچبەریا ئێزدیان یا ب کوم ئەڤ تشتە بجە ناھێت و چو وەلات ژی دەرگەھی خوە ڤەناکەن بۆ ڤی چەندێ. شێخ شاموی تەکەست کرکو ئێزدیان ئەرد ژ شەھیدان یێ تژی کری و ئێزدی ل کوردستانێ نەمێھڤانن، بەلکو رەسەناتیا کوردانە و ئەم د ئاخێ دا د ھەڤپشکین و کەس نەشێت بێژیتە ئێزدیان ھوون کورد نینن، دەمێ ئەم دبێژین ئەم کوردین ژی ئەم چو منەتان ناکەین و پێدڤیە وان تشتێن سەر کاغەزان بدەینە لایەکی و د مەیدانێ دا کاربکەین و جھێ مخابنیێ یە بەرێ ئێزدیان بھێتەدان بۆ چارەنڤیسەکێ بەرزەکری، رەمزی نەتەوی یێ مە بارزانی یە و ئەم پاشەرۆژەکا گەشتر دبن دادپەروەریا بارزانی دا دبینین و ھوشیاریا ئێزدیان تێرا ھندێ دکەت کو ل دووڤ تشتێ شاش نەچن. دیسا گوت” ھەر ژ دەستپێکا کارەساتا شنگالێ، مە ل بنگەھێ لالش ب ئەرکێ خوە زانیە وەکو دەزگەھەکێ تایبەتمەند یێ جڤاکی و رەوشەنبیری یێ ئێزدیان دخزمەتا ئاواران دا بین و ھەمو ھەڤالێن بنگەھی ل ھەموو دەڤەران گرۆپ دروستکرن ل گەل چالاکڤان و رەوشەنبیرێن ئێزدیان و ب رەنگەکی خوەبەخش کەڤتنە د وارێ خزمەتێ دا و نوکە ژی بەردەوام کار دکەن ب شەڤ و رۆژ بۆ خزمەتکرنا ئاواران”.
سەرۆکێ دەستەیا بلندا بنگەھی لالش و پەرلەمانتارێ کوردستانێ ئاشکرا کر کو ھەتا نوکە چو ئامارێن دروست ١٠٠% دەست مە نەکەڤتینە ل سەر کوشتی و رەڤاندی و بەرزبوویێن کارەساتا شنگالێ، چونکو بەردەوام گوھۆرین دکەڤنە تێدا ل سەر ھژمارا کچ وژن و زارۆیێن رەڤاندی و ئەم کار دکەین بۆ ئازادکرنا وان ب ھەڤکاریا ھندەک برادەریێن عەرەب و ھەتا شنگال رزگار نەبیت چو ئامارێن دروست ئاشکرا نابن، چونکو خەلکەک یێ بەلاڤە یە، بۆ نموونە خەلکێ گرعزێر ھەر ژ زاخۆ ھەتا ھەولیرێ و دەڤەرێن دی د بەلاڤکرینە، لەوما دێ چاوا شێین زانین کا چەند مروڤ د گرتینە وچەند ھاتینە کوشتن و چەند ھاتینە رەڤاندن و ھەتا ژیانا خەلکێ نورمال نەبیت، ئەم نەشێین ئامارێن دروست بدەستڤە بینین. ناڤبری ئاماژە دا وێ چەندێ کو ئەم نابێژین عەرەب ھەموو دوژمنێن ئێزدیان بوون، بەلکو ھندەک عەرەب ب رێیا ھەڤالان پەیوەندیێ ب مە دکەن و دڤێن قەنجیەکێ بکەن و کچ وزارۆیێن رەڤاندی ژناڤ دەستێن تیرۆرستێن داعش قورتال بکەن و د دەمێ ٥٠ رۆژێن بۆری دا پتر ژ ٦٥ کچ وژن وزارۆیێن رەڤاندی ھاتینە ئازادکرن و پتریا وان ژی مە ژ مووسل ئیناینە کەرکوکێ و پاشی گەھاندینە پارێزگەھا دھۆکێ و بزاڤێن مە د بەردەوام و ئەو خەلکێ مە باوەری پێ ھەی ھەڤکاریا مە دکەن بۆ ئازادکرنا کچێن رەڤاندی.
شێخ شاموی ئاشکرا کر ژی کو ناھێتە ڤەشارتن کرین و فرۆتن یا ب کچێن رەڤاندی ھاتیە کرن و دەمێ ئەم ئازاد ژی دکەین ل سەر بنیاتێ کرین و فرۆتنی یە، ھندەک کەس ب وژدانن پارێ کێم وەردگرن و ھندەک ژی گەلەک پاران وەردگرن. ئەندامێ پەرلەمانێ کوردستانێ دیارکر کو بەلگەنامە گەلەک ھەنە و بەردەوام گرۆپێن بنگەھێ لالش ھەموو چیروکێن کارەساتێ تۆمار دکەن و دکەینە ئەرشیف و باشترین ئەرشیف ژ دێکیومێنتان بنگەھێ لالش خرڤەکریە و مە بریار ژی یا دای ھەموو دێکیومێنت د خزمەتا لژنا جینۆساید ناساندنا شنگالێ دا بن، پەرلەمانێ کوردستانێ ژی شاندەک ھنارتە ھولەندا و ئەم چار کەس ل گەل سەرۆکێ پەرلەمانێ بووین و حوکمەتا ھولەندا دەرگەھێ دادگەھا لاھای بۆ شاندێ پەرلەمانێ کوردستانێ ڤەکر و ئەم ل گەل دو دادەوەرێن مەزن یێن دادگەھا لاھای روونشتین و چیرۆکا کارەساتا شنگالێ بۆ وان شروڤەکر و راپۆرتەک ب زمانێ ئنکلیزی یا بەرفرەە مە دایە دادگەھا لاھای کا چ ب سەرێ ئێزدیان ھاتیە و دادگەھا لاھای بلەز فۆرمەک داگرت وەکو تۆمارکرنا سکالایەکێ و ئاموژگاری دانە شاندێ پەرلەمانێ کوردستانێ کا چاوا بەلگەنامەیان خرڤەبکەن و شاندێ پەرلەمانی ژی لژنەک بۆ دانەنیاسینا کارەساتا شنگالێ وەکو جینۆساید یا پێکئینای.
ئه‌ڤرۆ نيوز، ناجی به‌ده‌ل:
چونا حه‌یده‌ر عه‌بادی بۆ ئیرانێ پشتی وه‌كو وێستگه‌هێ وى يێ ئێكێ پشتى بوويه سه‌رۆكێ وه‌زيرێن عيراقێ بۆ دووپاتكرنا وێ سياسه‌تا شيعى يه يا ل عيراقێ دهێته كرن.
د. ئاری عارف عه‌بدولعه‌زیز ماموستایێ قانوونا گشتی ل زانكۆیا دهۆكێ بۆ ئه‌ڤرۆ نیوز گۆت: “بڕیار دان و ده‌ست نیشانكرنا هه‌ر سێ سه‌رۆك وه‌زیرێن عیراقێ رۆلێ مه‌رجه‌عیه‌تێ شیعی پیڤه دیار بوو، هه‌تا مه‌رجه‌عی نه‌گۆتی بلا بهێته گوهاڕتن، به‌حس لێ نه‌هاته‌كرن و رۆلێ ئیرانێ ل سه‌ر مه‌رجه‌عیه‌تێن شیعی ژی و پشته‌ڤانا ئه‌وان وه‌ك لایه‌نه‌كێ سوزداريا تائیفی هه‌یه”.
ناڤبری ئه‌و ئیكه ژی گۆت: “چوونا سه‌رۆك وه‌زیرێ نوو یێ عیراقێ دوپاتكرنا ئه‌وێ سیاسه‌تا ل عیراقێ دهێته‌كرن ژ لایێ شيعان ڤه و كاریگه‌ری و رۆلێ ئیرانێ ل گوره‌پانا سیاسیا عیراقێ و ده‌ور هه‌یه، له‌ورا هه‌ر ده‌ركه‌فتنا ئێكێ يا سه‌رۆك وه‌زیرێ نوو یێ عیراقێ دڤێت بۆ ئیرانێ بیت”.
د. ئاری خۆياكر كو ئیران هه‌ڤسیێ عیراقێ یه و پشته‌ڤانیا لایه‌نێ ده‌سه‌لاتێ دكه‌ت ل هه‌ر ئالوزیه‌كێ، له‌ورا د ئه‌ڤێ ره‌وشا ئالوزا عیراق تێ كه‌تی و پێدڤیا عیراقێ بۆ ده‌رباز بوون ژ ئه‌ڤێ قه‌یرانێ بێ رۆلێ ئیرانێ نه‌شیت رزگار بیت.
ئه‌ڤرۆ نيوز، نيوار محه‌مه‌د سه‌ليم:
پشتى د به‌رنامێ نوقته‌تولنيزام يێ كه‌نالێ عه‌ره‌بيه دا، مير ته‌حسين به‌گ، ميرێ ئێزديان ل عيراقێ و جيهانێ ل دۆر پرسياره‌كێ كا ئايا ئێزدى نه‌ته‌وه‌نه يان ئايين، گۆت كو ئێزدى نه‌ته‌وه و ئايين و په‌يوه‌نديێن وان ل گه‌ل كورد و عه‌ره‌بان گه‌له‌ك د خۆشن، ئه‌ڤى نووچه‌ى ده‌نگڤه‌دانه‌كا مه‌زن ل سه‌ر ئاستێ كوردستانى و جيهانى دا.
شێخ شامۆ نوونه‌رێ ئێكانه يێ ئێزديان د په‌رله‌مانێ كوردستانێ دا، كو د هه‌مان ده‌م دا، سه‌رۆكێ بنگه‌هێ لالش يێ ره‌وشه‌نبيرى و جڤاكيه، ره‌خنێن دژوار ل ميرى دگريت و دبێژيت: “به‌حسكرن ل ناسناما ئێزديان هێلا سۆره”.
زێده‌تر دبێژيت: “مه گه‌له‌ك پێ سه‌يره كه‌سه‌كێ وه‌كو ميرى پشكدارى د خه‌باتا رزگاريخوازيا كوردى دا هه‌بيت و ڤا ئاخفتنان بێژيت، له‌ورا چو گۆتنێن ميرى وه‌كو ڤێ ئه‌م تۆره نه‌كرينه و دێ هه‌لۆيستى وه‌رگرين”.
د داخۆيانيه‌كێ دا بۆ ده‌زگه‌هێن راگه‌هاندنێ كو دانه‌ك بۆ ئه‌ڤرۆ نيوز هنارتيه، رێڤه‌به‌ريا گشتى يا كاروبارێن ئێزديان ژى رادگه‌هينيت كو ئێزدى ب نه‌ته‌وه كوردن و ديرۆك و مێژوو ل سه‌ر ڤێ چه‌ندێ شاهدن.
ئاماژێ ب وێ چه‌ندێ ژى دكه‌ت كو ئه‌و خوه ل به‌ر چ لايه‌نه‌كێ سیاسى شرین ناكه‌ن ب ڤان گۆتنان، چونكو ئێزدیاتیێ د دیرۆكێ دا ب كورد دیاركرییه و گه‌نگه‌شه ل سه‌ر كوردبوونا وان ناهێته‌كرن.
دايه زانين كو مير ته‌حسين به‌گ ب خوه ژى ل گه‌له‌ك هه‌لكه‌فتان ئاماژه ب وێ چه‌ندێ كريه كو ئێزدى كوردن و ئه‌ڤه راستيه‌كه ناهێته ڤه‌شارتن.
ل دووماهيێ ژى دبێژن: “دڤيا ميري ئێزديان ئه‌ڤ بڕياره ب تنێ نه‌دابا، ئه‌ڤ بابه‌ته بۆ ده‌مه‌كێ دى هێلابا كو ئێزديان ب خوه بڕيار دابا و پاشه‌رۆژا خوه دياركربا”.
داخۆيانيا ته‌حسين به‌گ ل كه‌نالێ عه‌ره‌بيه:
ئەڤرۆ نیۆز:
سەرکردەکێ ئەنجومەنێ نیشتیمانیێ کوردستانێ بۆ ئەڤرۆ نیوز دیار کر کو چاڤەرێ دھێتە کرن پێشمەرگێن رۆژاڤایێ کوردستانێ یێن کو ل ھەرێما کوردستانێ راھێنان پێ ھاتینە کرن ل گەل پێشمەرگێن ھەرێمێ پێکڤە بچنە کوبانێ و رۆژاڤایێ کوردستانێ.
ل دووڤ گۆتنێن وی سەرکردەی ئەو ھێزا پێشمەرگەی یا کو دھێتە چاڤەرێکرن بچیتە کوبانێ دێ ژلایێ وەزارەتا پێشمەرگەی ڤە ھێتە رەوانەکرن و ھەروەسا وەزارەتا پێشمەرگەی دێ سەرپەرشتیێ ل سەر کار و ئەرکێن وان کەت و گۆت: (رازیبوونا تورکیا بۆ ڤێ چەندێ ھاتیە وەرگرتن نوکە وەزارەتا پێشمەرگەی د دانوستاندنان دایە ل گەل PYD و PKK، ھەتا نوکە ئەو رازی نەبووینە، ھەر دەمێ ئەو رازیبوون دێ پێشمەرگێن رۆژاڤا و یێن ھەرێمێ پێکڤە ب رێیا سنورێ تورکیا چنە د ناڤ کوبانێ دا).
ئەڤرۆ نیوز: لەزگین جۆقی:
بەرپرسێ راگەھاندنا لقی 14 يێ پارتی دیموکراتی کوردستان سەعید مەموزینی بۆ ئەڤرۆ نیوز دیارکر کو چەکدارێن داعش تووشی شکەستنەکا زۆر مەزن بووینە وئێدی شیان نەماینە ھێرشێن خوە ئەنجام بدەن وگۆت: “ژ شڤێدی ھەتا نوکە ل دووڤ پێزانينێن گەھشتینە مە، 35 تەرمێن داعش و زێدەتر ژ 100 بریندارێن چەکدارێن گەھشتینە نەخۆشخانا کۆماری ل مووسل”.
سەعید مەموزینی بەرپرسێ راگەھاندنا لقێ 14 يێ پارتی دیموکراتی کوردستان گۆت: “ل ھەموو ميحوەران پیشمەرگەيێ کوردستانێ يێ د پێشڤەچوونێ دا و زیانێن مەزن گەھاندینە داعش و زێدەتر ژ 12 ھەمەرێن داعش ھاتینە پووچکرن”.
دا زانين ژى كو ئێدی چو د دەستێ داعش دا نەمایە، یێن دشێن درەڤن خوە قورتال دکەن و گۆت: “مزکینيێ ددەینە خەلکێ خوە کو ئێدی داعش نەشێت چو بکەت و دێ ژناڤ چیت”.
ھەولێر، قائید میرۆ:
ئەندامەکا لیژنا قانوونی یا پەرلەمانێ کوردستانێ تەکەزکر، کو ھەردەمێ سەرۆکایەتیا جڤاتا وەزیران پرۆژە قانوونا قەرکرنێ ھنارتە پەرلەمانی دێ ب رژدی کاربۆھێتەکرن، ژ بەر کو پرۆژە قانوونەکا گرنگە بۆ ئایندەیێ ھەرێما کوردستانێ و گەشەکرنا کەرتێ ئابووری.
تەلار لەتیف، ئەنداما لیژنا قانوونی یا پەرلەمانێ کوردستانێ بۆ ئەڤرۆ دیارکر، سەرۆکایەتیا جڤاتا وەیزران بڕیاردایە پرۆژە قانوونەک بھێتە بەرھەفکرن و گۆتژی: “ئەف پرۆژە قانوون بۆ رێکخستنا چاوانیا شیانێن حوکمەتێ یە بۆ قەرکرنێ، چونکو دو شێوەیێن بەرھەڤکرنا پرۆژە قانوونان ھەیە، یا ئێکێ حوکمەت ب خوە پرۆژە قانوونا بەرھەڤ دکەت و دھنێریتە پەرلەمانی، یا دویێ دەھە ئەندامێن پەرلەمانی دشێن پرۆژە قانوونەکێ بەرھەڤ بکەن، ئەم چاڤەڕێ دکەین، ھەردەمێ ئەف پرۆژە قانوونا جڤاتا وەزیران ھاتە پەرلەمانی دێ ب رژدی کار ل سەر کەین وەکو لیژنا قانوونی، چونکو پێدڤیە ھەموو لایەک بزاڤێن سەرکەفتنا ئەڤی پرۆژەی بکەت، ژ بەر کو پرۆژە قانوونەکێ گرنگە بۆ ئایندەیا ھەرێما کوردستانێ و دەربازبوونا ھەرێمێ ژ ئەڤێ قەیرانا دارایا نوکە تێدا دەرباز دبیت، ئەڤە بۆ دەمێ چەند ھەیڤانە حوکمەتا بەغدا مووچە و بودجێ ھەرێما کوردستانێ نەھنارتیە”.
تەلارێ گۆتژی: “ئەز ئاگەھدار نینم ھەتا نوکە حوکمەتا ھەرێمێ چو پارە ژ دەرڤە قەر کر بیت، بەلێ رەنگە برادەرێن لیژنەیێن دارایی و ئابووری ئەگەھداری ئەڤی بابەتی بن، بەلێ ئەگەر پرۆژە قانوون ھاتە پەسەندکرن، ئەڤە ھەرێم گورەی ئەڤێ قانوونێ دێ شێت پارەی قەربکەت ژ ولاتێن دەرڤە.
نيشاندان