ئه‌ڤرۆ نيوز، چه‌كدار ئه‌ترووشى:

ژێده‌ره‌كى ژ هێزێن له‌شكرێ كوردستانێ تايبه‌ت بۆ ئه‌ڤرۆ نيوز ئه‌و نووچه‌ ره‌تكرن يێن دبێژن پێشمه‌رگێ كوردستانێ زوممار يا كونترۆلكرى.

چه‌ند ده‌زگه‌هێن راگه‌هاندنێ يێن عيراقى ژ زارێ چه‌ند ژێده‌راێن خوه‌ به‌لاڤكريه‌ كو پێشمه‌رگێ كوردستانێ ناحيا زوممار ب ته‌مامى يا كۆنترۆلكرى.

ژێده‌ره‌كى ژ هێزێن پێشمه‌رگێ كوردستانێ كو مه‌ ب باشى نه‌ديت ئاماژێ ب ناڤێ وى بكه‌ين ئاشكه‌را كر كو سپێدێ ل ده‌ڤه‌را عوێنات د شه‌روهه‌ڤچوونه‌كێ دا، پێشمه‌رگێ كوردستانێ زيانێن گه‌له‌ك مه‌زن گه‌هاندينه‌ چه‌كدارێن داعش.

گۆتژى: “پێشمه‌رگێ كوردستانێ پێش ره‌وى نه‌كريه‌ و ئه‌و ل هيڤيێ بوون هێرشێ بكه‌نه‌ سه‌ر پێشمه‌رگه‌ى، به‌لێ زيانێن گه‌له‌ك مه‌زن گه‌هشتنه‌ هێزێن داعش”.

ئه‌ڤى فه‌رماندێ پێشمه‌رگه‌ى ئه‌و نووچه‌ ژى ره‌تكرن يێن دبێژن كو ئه‌وان زوممار يا كۆنترۆلكرى و گۆت: “دبيت د ماوه‌كێ نێزيك دا پێشره‌ويێ بكه‌ين و زوممار كۆنترۆل كه‌ين”.

ئەڤرۆ نیوز، سالار دۆسکی:

سەرۆکێ لیژنا دەستپکایێ ل پەرلەمانێ کوردستانێ بۆ ئەڤرۆ نیوز دیارکر کو د ڤێ دووماھیێ دا گەلەک کێشە گەھشتینە لیژنا وان ل سەر ئەوان کۆمپانیێن پارا ژ خەلکی وەردگرن و شوقان و ڤلان بۆ وەلاتیان ب قست دروست دکەن.
عومەر کوچەر سەرۆکێ لیژنا نەزاھێ گۆتژی: “ژ بەر زێدبوونا کێشا و گڤاشتن ل سەر لژنێ نەچاربووین د گەل دەستەیا وەبەرھێنانێ ل ھەرێما کوردستانێ بروونینە خوار”.
ئاشکراکر کو پتر کێشە ھەنە و زێدەتر بووینە و پتر ژ ٣٥ کۆمپانیان ئەڤ کێشە بۆ وەلاتیان دروستکرینە، ئەڤە بوویە ئەگەر جڤاتا وەزیران بڕیارێ ل سەر بدەت کو ئەڤ پرۆژە بھێنە راوستاندن و گۆت: “ھندەک پرۆژان مۆلەت نەبووینە و ھندەک پرۆژان خەلکی ٩٠% پارە داینە و خودان رەڤینە و کەس نوزانیت کی ڤە چوویە”.
سەرۆکێ لژنا نەزاھێ ئاشکراکر ژی کو ھندەک پرۆژە ئەڤە پێنچ سال چوون و پارێ خەلکی برینە، کۆمپانیا دکتور روشدی (دەشتی بەھشت) ب تنێ ٢٩ سکالا ل دادگەھێ ل سەرن، کۆمپانیا بیابان گەلەک خەلکی سکالا ل سەر چێکرینە”.
نەڤەشارت کو وان وەکو دەستەیا نەزاھێ ژ رێڤەبەریا وەبەرھێنانێ خواستیە راپۆرتەکا گشتی بۆ وان بەرھەڤ کەن و گۆت: “دێ ژ سەرۆکاتیا پەرلەمانی خوازین روونشتنەک ل سەر بابەتی بھێتە گرێدان، دێ داخواز کەین پرۆژە بۆ خەلکی بھێنە دروستکرن یان پارێ وان ل دووڤ گرێبەستێ بۆ بھێتە زڤراندن”.

ئەڤرۆ نیۆز:

مەسعود بارزانی سەرۆکێ ھەرێما کوردستانێ ب ھەلکەفتا جەژنا قوربانا پیرۆز، پەیامەک ئاراستەی خەلکێ کوردستانێ و لایەنێن سیاسی و کەسوکارێن شەھید و ھەموو خەلکێ موسلمان کر.

سەرۆک بارزانی دبێژیت: “جەژنا ئەڤ سالە د دەمەکی دایە کو کوردستان د شەرەکێ ب زەحمەت و چارەنڤیس سازدا ل شەرێ ل گەل تیرۆرستێن داعش کو بەری نوکە سوپایێ دو وەلاتان تێک شکاندیە و چەکێ وان د دەستێ وان دایە و ل ھەمبەری پێشمەرگەی شەری دکەت، ژ بەر ھندێ ئەڤە بۆ پێشمەرگەی شەرێ مان و نەمانێ یە”.

سەرۆکێ ھەرێما کوردستانێ رۆلێ پێشمەرگەی ژی بلند نرخاند کو رۆژ بۆ رۆژێ تیرۆرستێن داعش تێک د شکێنن و سەرکەفتنێن مەزن ل سەر تۆمار دکەن.

دا زانین ژی کو ھێزێن پێشمەرگەی ب نوونەراتیا ھەموو جیھانێ شەرێ داعش دکەن و گۆت: “ژ ئەگەرێ باوەریا مە بۆ دیموکراسی و ئازادیێ، ژ ئەگەرێ بھایێن بلندێن ژیانێ و پێکڤەژیانێ ل کوردستانێ، ھەڤپەیمانیەکا نێڤدەولەتی بۆ مللەتێ مە ھاتە پێش، بۆ ژ ناڤبرنا وان، بزاڤێن خوە چڕ کرن”.

ده‌قێ په‌ياما سه‌رۆكێ هه‌رێما كوردستانێ:

بە ناوی خوای مەزن و دلۆڤان

بە بۆنەی هاتنەوەی جەژنی قوربانی پیرۆز، پیرۆزبایی لە خەڵكی كوردستان و هەموو حزب و لایەنە سیاسییەكان و سەرجەم موسڵمانانی عێراق و جیهان دەكەم. پیرۆزبایی شەرەفی بەرگریكردن و قوربانیدان لە خانەوادەی ئەو شەهیدە سەربەرزانە و پێشمەرگە قارەمانەكان دەكەم كە بە گیانی پیرۆزی خۆیان كوردستان و بەها پیرۆزەكانی مرۆڤایەتیان پاراست و دەیپارێزن.

جەژنی ئەمساڵ لە کاتێکدایە کە گەل و وڵاتەکەمان لە شەڕێکی چارەنووسسازدایە بەرانبەر تیرۆریستان و پێشمەرگە قارەمانەکانمان ڕۆژ لە دوای ڕۆژ سەرکەوتنی گەورە بەسەر تیرۆریستاندا تۆمار دەکەن. ئەم شەڕە بۆ کوردستان شەڕی مان و نەمانە بەرانبەر هێزێک کە پێشتر سوپای دوو وڵاتی تێکشاندووە و پێشکەوتووترین چەکی ئەو دوو سوپایەی بۆ پەلاماردانی کوردستان کەوتە دەست، بەڵام پێشمەرگە گیانلەسەردەستەکانی کوردستان توانیان لە بەرانبەریاندا بوەستن و لە زۆر شوێن تێكیانبشكێنن.

هێزی پێشمەرگەی کوردستان ئێستا بە نوێنەرایەتیی هەموو مرۆڤایەتی شەڕی ئەو هێزە تیرۆریستییە دەکات و بەهۆی بەها بەرزەکانی پێکەوەژیانی ئاشتییانە و بڕوابوونمان بە دیموکراسی و ئازادی هاوپەیمانێتییەکی نێودەوڵەتی بۆ پشتیوانییکردن لە گەلەکەمان هاتەکایەوە و خۆشبەختانە ئێستا ئەو هاوپەیمانێتییە هەوڵەکانی بۆ ڕیشەکێشکردنی تیرۆریستان چڕ کردۆتەوە.

هیوادارم ئەم جەژنە ببێتە مایەی سەرکەوتنی زیاتری گەلەکەمان و كوردستانیش لە پێشکەوتن و ئاوەدانی و ئارامی بەردەوام بێت.

مسعود بارزانی
سەرۆكی هەرێمی كوردستان
9 ذوالحجە/1435ـی كۆچی
3ـى تشرینی یەكەم/ 2014 زایینی