ئه‌ڤرۆ نيوز، نيوار محه‌مه‌د سه‌ليم:
پشتى ل حه‌فتيا بۆرى ژ ئه‌نجامێ بارانێن زۆر وه‌لاتيه‌كێ خه‌ليفان ب ترۆمبێل ڤه كه‌فتيه ناڤا رووبارێ گه‌ليێ عه‌لى به‌گ، ئه‌ڤرۆ 25\10 ته‌رمێ وى هاته ديتن.
ل 16\10 ژ ئه‌نجامێ بارينا بارانه‌كا زێده ل ده‌ڤه‌را سۆران -گه‌ليێ عه‌لى به‌گ- ترۆمبێله‌كا تويوتا كرۆلا ره‌نگێ سپى كه‌فته ناڤا رووبارى و ته‌رمێ وى نه‌هاتبوو ديتن.
ئه‌ڤرۆ 25\10 رێڤه‌به‌رێ به‌گرى شارستانيا سۆران، عه‌قيد عوسمان محه‌مه‌د، راگه‌هاند كو ته‌رمێ خۆرشيد ئه‌حمه‌د حسێن هاته ديتن.
ئه‌ڤرۆ نيوز، نيوار محه‌مه‌د سه‌ليم:
ب گۆره‌ى ژێده‌ره‌كێ باوه‌رپێكرى ژ ناڤا پێشمه‌رگه‌يێ كوردستانێ، نوكه ل زۆمار شه‌رێ كولانان يێ ده‌ستپێكرى.
ژێده‌ره‌كى ژ هێزێن پێشمه‌رگه‌يێ كوردستانێ بۆ ئه‌ڤرۆ نيوز دياركر كو نوكه گۆندێن ده‌وروبه‌رێ زومار يێن هاتينه كۆنترۆلكرن و گۆت: “نوكه شه‌رێ كۆلانان ب ره‌نگه‌كێ گه‌له‌ك دژوار يێ دهێته كرن”.
زێده‌تر گۆت: “هژماره‌كا زۆر ژ چه‌كدارێن داعش هاتينه كوشتن و ژ هێزا پێشمه‌رگه‌يێ كوردستانێ ژى دو كه‌س شه‌هيد بووينه”.
ئه‌ڤرۆ نيوز، نيوار باشوورى:
ژێده‌ره‌كێ ئاگه‌هدار ئاشكه‌را كريه كو بڕياره سۆبه‌هى هێزا هه‌رێما كوردستانێ بۆ پشته‌ڤانيا كۆبانێ ب رێ بكه‌ڤيت و رێڤه‌به‌رێ راگه‌هاندن و هۆشياريێ ل وه‌زاره‌تا پێشمه‌رگه‌ى ژى ديار دكه‌ت كو هێشتا ژڤانێ چوونێ نه‌هاتيه دياركرن.
عه‌ميد هه‌لگۆرد حكمه‌ت رێڤه‌به‌رێ راگه‌هاندن و هۆشياريێ ل وه‌زاره‌تا پێشمه‌رگه‌ى بۆ خه‌ندان راگه‌هاند كو هه‌موو ئه‌و كێشێن هۆنه‌رى يێن به‌رى نوكه هاتينه چاره‌كرن و گۆت: “نوكه پێشمه‌رگه بۆ چوونا كۆبانێ يێ ئاماده‌يه، نوكه چاڤه‌رێ فه‌رمانا ده‌ركه‌فتنێ نه”. زێده‌تر گۆت: “ئه‌ڤ هێزا دێ نوكه چيت، ب تنێ 155 كه‌سن”.
ده‌رباره‌ى وێ چه‌ندێ كو پێشتر دهاته گۆتن دێ 200 كه‌س چن، عه‌ميد هه‌لگۆرد گۆت: “نه‌خێر هه‌ر ژ ده‌سپێكێ هژمارا وان 155 كه‌س بوون”.
ده‌رباره‌ى ده‌مێ چوونێ ژى ئاشكه‌را كر كو هێشتا ئه‌و ل سه‌ر ده‌مێ چوونا ڤێ هێزێ نه‌هاتينه ئاگه‌هدار كرن، به‌لێ عه‌قيد ره‌مه‌زان ژ هێزا پشته‌ڤانيا ئێك بۆ رووداو راگه‌هاند كو بڕياره ئه‌ڤ هێزه سوبه‌هى 26\10 بچيته باژێرێ كۆبانێ.
ئه‌ڤرۆ نيوز، نيوار محه‌مه‌د سه‌ليم:
ل گه‌ل بۆردومانا فرۆكێن جه‌نگى يێن هه‌ڤپه‌يمانا، هێزێن پێشمه‌رگه‌يێ كوردستانێ شيان هێرشێ بكه‌نه سه‌ر سێ گۆندێن ده‌ڤه‌را زۆمار و ژ ده‌ستێ داعش بيننه ده‌ر و نوكه ژى پێشره‌وى يا به‌رده‌وامه.
فه‌رمانده‌كێ له‌شكرێ كوردستانێ كو مه پاراستن ل سه‌ر به‌لاڤكرنا ناڤێ وى كريه ب ئه‌ڤرۆ نيوز راگه‌هاند كو سپێده‌هيا ئه‌ڤرۆ 25\10 پشتى بۆردومانا فرۆكێن جه‌نگى يێن هه‌پڤه‌يمانا، هێزێن پێشمه‌رگه‌ى شيان سێ گۆندێن سه‌ر ب زۆمار ڤه كۆنترۆل كه‌ن و پێشره‌وى يا به‌رده‌وامه.
ئه‌ڤى فه‌رمانده‌ى گۆت: “د ڤان پێشره‌ويان دا، هژماره‌كا ئێكجار زۆر يا زيانان ب داعش كه‌فتيه و گه‌له‌ك ژ كه‌له‌خێن خوه ژى ل مه‌يدانا شه‌رى ب جهـ هێلاينه”.
ئاماژه ب وێ چه‌ندێ ژى كر كو نوكه د پێشره‌ويێ دانه كو شه‌رى ل هه‌ر ئێك ژ گۆندێن گرزێر و كانى شرينێ و تلمۆس يێن سه‌ر ب ناحيا زۆمار ژى ئازاد بكه‌ن.
ئەڤرۆ نیۆز، سالار دۆسکی:
بریاردەرا لیژنا دارایی و ئابووری ل پەرلەمانێ کوردستانێ بۆ ئەڤرۆ نیۆز دیارکر کو وەک لیژنا درایی و ئابووری یا پەرلەمانێ کوردستانێ د گەل لیژنا بەغدا کومبونێن بەردەوام دانە بۆ دانا میکانزمەکێ ل سەر مووچان.
ھیڤا حاجی میرخان بریاردەرا لیژنا دارایی و ئابووری ل پەرلەمانێ کوردستانێ ھێشتا ژی گۆت: “ھەتا نوکە دانوستاندنە ل سەر مووچان و کشێن دارایی د گەل لیژنا دارایی و ئابووری یا بەغدا ھەتا نوکە چو گورانکاری نەھاتینە”.
بریاردەرا لیژنا دارایی گۆتژی: “مە دو پێشنیار ھەنە ئەو پەترول ب زووترین دەم بھێتە فرۆتن یان دانوستاندێن د گەل بەغدا بگەھەنە ئەنجامەکی بۆ دابینکرنا مووچێن ھەرێما کوردستانێ”.
ل دۆر دەمێ دیارکرنا مووچێن ھەیڤا ئیلۆنێ ژی ناڤبریێ دیارکر کو پەرلەمانێ کوردستانێ مایتێکرنێ د کاروبارێن حوکمەتێ دا ناکەت.
ھیڤا حاجی میرخان ده‌رباره‌ى پارێن پەترولا ھەرێما کوردستانێ ژی گۆت: “لیژنا سامانێن سرۆشتی یا ل سەر بابەتی ئاگەھدارە”.
ئه‌ڤرۆ نيوز، نيوار محه‌مه‌د سه‌ليم:
بڕياره سۆبه‌هى ياريێن دووماهيا خولا فوتسالا كچان ل عيراقێ ل هۆلا گرتيا كوليژا په‌روه‌ردا وه‌رزشى ل وه‌زيريه بهێنه ئه‌نجام دان.
سه‌رۆكێ لژنا ژنان ل ئێكه‌تيا ناڤه‌ندى يا ته‌پا پێ يه‌حيا كه‌ريم بۆ شه‌فه‌ق نيوز راگه‌هاند كو سۆبه‌هى دێ ياريێن دووماهيا خولا فوتسالا كچان هێنه ئه‌نجام دان و گۆت: “قاره‌مانى دێ ب ياريا ئيسكان و كچێن به‌غدا ده‌ست پێ كه‌ت ل ده‌مژمێر 12 نيڤرۆ”.
زێده‌تر گۆت: “ده‌مژمێر 2ى پشتى نيڤرۆ دێ به‌له‌دى و ره‌سافى كه‌ن و پاشان ژى مه‌سافى باكوور و كچێن هه‌ولێر ل ده‌مژمێر سێ دێ ياريا خوه كه‌ن”.
ژ لايێ خوه ڤه تيما كچێن فوتسالا زێره‌ڤانى خوه ژڤێ قاره‌مانيێ ڤه‌كێشايه ژ به‌ر كو قاره‌مانى دێ ل به‌غدا هێته كرن و نه‌ك هه‌ولێرا پايته‌ختێ كوردستانێ ب گۆره‌ى داخۆيانيه‌كێ ژ راگه‌هاندنا يانا زێره‌ڤانى يا وه‌رزشى.
ب گۆره‌ى وان پێزانينێن ب ده‌ست ئه‌ڤرۆ نيوز كه‌فتين، كچێن هه‌ولێر ژى دبيت پشكداريا وان هند يا كارا نه‌بيت ژ به‌ر كو هه‌موو كچێن ڤێ تيمى ژ به‌ر هنگافتنێ و كاودانێن ئه‌منى ژى نه‌شێن پشكداريێ ل گه‌ل شاندێ تيمێ بۆ به‌غدا بكه‌ن.
ئه‌ڤرۆ نيوز:
سه‌رۆك ئه‌ركانێ هێزێن چه‌كدارێن فره‌نسى راگه‌هاند كو ئه‌وان ل رۆژا ئه‌ينى ب رێيا فرۆكێن شه‌ركه‌ر 12 باره‌گا ل عيراقێ په‌قاندن كو به‌رى نوكه ژ لايێ داعش ڤه دهاتنه بكارئينان.
جه‌نرال بير دو فليه بۆ راديۆيا ئه‌ورۆپا ئێك يا فره‌نسى گۆت: “شه‌ڤا بۆرى مه كرياره‌كا مه‌زن ل عيراقێ ئه‌نجام دا ب ژناڤبرنا باره‌گايێن داعش ئه‌وێن بۆ چێكرنا چه‌كى و ته‌قينان و تى ئێن تى يان دهاتنه بكارئينان و شه‌رێ له‌شكرێ عيراقى پێ دكر”.
وه‌لاتێ فره‌نسا يێ ئێكێ بوو هاتيه رێزا هه‌ڤپه‌يمانيا ئه‌مريكا بۆ لێدانا چه‌كدارێن داعش ژ لايێ فرۆكێن ئه‌سمانى ڤه ل عيراقێ و هه‌تا نوكه هژماره‌كا مه‌زن يا هێرشێن ئه‌سمانى كرينه سه‌ر چه‌كدارێن داعش.
ديسا فره‌نسا نوكه ئه‌ركێ مه‌شقكرنا هێزێن عيراقى و ب چه‌ككرنا پێشمه‌رگان كريه، ئه‌ڤى جه‌نرالى ئاشكه‌را كر كو ب 70 بۆمبان ئه‌وان 12 باره‌گايێن داعش ژناڤبرينه.
ئەڤرۆ نیۆز، قائید میرۆ:
دوھی ئێڤاری ب ئەگەرێ بۆردۆمانکرنا بنگەھەکێ مەزنێ داعش ل بنارێ چیایێ باشیک ٢٠ چەکدارێن داعش ھاتینە کوشتن و مەزنترین بنگەھێ وان ھاتیە ژناڤبرن.
غەیاس سۆرچی، کارگێرێ مەلبەندێ مووسل یێ ئێکەتیا نیشتیمانی کوردستان ب ئەڤرۆ نیۆز راگەھاند، درەنگی ئێڤاریا دوھی فڕۆکەیێن ھەڤپەیمانان، بارەگایەکێ چەکدارێن داعش ل بنارێ چیایێ باشیک بۆمبە بارانکر و د ئەنجامدا، ھەموو چەکدارێن ناڤا ئەڤی بنگەھی ھاتنە کوشتن کو ھژمارا ٢٠ چەکداربوون، ئەف بنگەھە ئێکە ژ مەزنترین بنگەھێن داعش ل دەڤەرێ.
غەیاسی گۆتژی: چەندین جارا ب رێیا ڤی بنگەھی داعش ئێرشیکریە سەر ھێزێن پێشمەرگەی و چەندین پێشمەرگە شەھیدبووینە و تەرمێن وانژی نەھاتینە دیتن، لەوڕا بۆردۆمانکرن و تێکدانا ئەڤی بنگەھێ داعش ل چیایێ باشیک سەرکەفتنەکا مەزنە بۆ شکاندنا تیرۆرستان.
ئەڤرۆ نیۆز، قائید میرۆ:
ژێدەرەکێ ئاگەھدار تایبەت ب ئەڤرۆ نیۆز راگەھاند، کو چەکدارێن داعش دەست ب دەستەسەرکرنا وان بەرپرسێن پۆلیسانکریە، یێن بەری نوکە لسەر دەستێ داعش تۆبە کری و ھاتینە ئازادکرن، ئەڤە حەفتیەکە ھەوەک بۆ دەستەسەرکرنا وان ئەفسەر و بەرپرسێن پۆلیسێن عێراقی دەستپێکریە و ھەتا نوکە چەندین کەس ھاتینە گرتن و ئەف تۆبێ بەری نوکە چو بھایەک نیک داعش نەبوو.
ئەڤی ژێدەری خویاژیکر، دوھی دەمژمێر چواری ئێڤاری چەکدارێن داعش پشتی دەستەسەرکرنێ عەقیدەکێ پۆلیسان بناڤێ( عیسا عوسمان) ل دەڤەرا سێریجخانێ بەرەف دۆریانا قاسم خەیات ب پیا بریە و دۆر ژ بھایێن مرۆڤایەتی ئەشکەنجەدایە و پشتی گەھاندیە دۆریانا قاسم خەیات لبەر چاڤێن خەلکی ھاتیە بدارڤەکرن.
ژێدەری پتر گۆت” عەقید عیسا عوسمان بەری نوکە فەرماندێ فەوجا چار یا پۆلیسێن ھەوارھاتنا مووسڵ بوو، پشتی کۆنتڕۆلکرنا باژێڕێ مووسڵ ھاتبوو دەستەسەرکرن و دوھی زۆر ھاتبوو ئیھانەکرن بەری بھێتە کوشتن.
ئه‌ڤرۆ نيوز:
وه‌زاره‌تا داد يا عيراقێ راگه‌هاند كو وه‌زاره‌تا ناڤخۆ ل هه‌رێما كوردستانێ زێده‌ترى 100 زيندانيێن ژ زيندانێن عيراقێ ره‌ڤين دانه ده‌ست رێڤه‌به‌ريا چاكسازيێ ئه‌وێن ل زيندانا بادوش يا ناڤه‌ندى ره‌ڤين.
ئاخفتنكه‌رێ ب ناڤێ وه‌زاره‌تێ د به‌ياننامه‌كێ دا راگه‌هانديه كو وه‌زاره‌تا ناڤخۆ يا هه‌رێما ركوسدتانێ 103 زيندانى يێن كو ژ زيندانا بادوش يا ناڤه‌ندى ره‌ڤين ل شه‌قلاوا هاتبوونه ده‌سته‌سه‌ركرن دانه ده‌ست وه‌زاره‌تا به‌ره‌ڤانيێ.
حه‌يده‌ر سه‌عدى گۆت: “هنده‌ك ژ وان زيندانيان خوه دابوو ده‌ست هه‌رێمێ و هنده‌ك ژ وان ژى هاتبوونه ده‌سته‌سه‌ركرن و گۆت: “هه‌موو ژى ل شه‌قلاوا هاتبوونه ده‌سته‌سه‌ركرن”.
ئاماژه ب وێ چه‌ندێ ژى كريه كو ئه‌و يێن داينه ده‌ست حوكمه‌تا ناڤه‌نداى و نوكه يێن ل چاكسازيا چه‌مچه‌مال يا گرێدايى حوكمه‌تا ناڤه‌ندى د ده‌سته‌سه‌ركرينه.
نيشاندان