ئەڤرۆ نیۆز، سالار دۆسکی:
سەرۆکێ لیستا گۆڕان ل پەرلەمانێ عیراقێ بۆ ئەڤرۆ نیۆز دیارکر کو ھەموو ئەندام پەرلەمان عیراقێ یێن کورد مووچێن خوە وەردرگرن، زێدەتر ژی گۆت: “ھەر جار ئەم بەرامبەر بەغدا داروستین وەک کورد و مەبەستا من ھەموونە چو لایەنێن دیارکری نین، پاشان ب چەندین (تەنازلا) دچینە بەغدا و ئەڤە سیاسەتێ شکەستن ئینایە”.
ھوشیار عەبدولا گۆتژی: “مە داخاز کر مووچێن خوە وەک ئەندامێن پەرلەمانی بدەینە ئاواران کەسەکێ خوە نەدا دگەل مە، دیسا مە داخاز کر کو مووچێن خوە وەرنەگرین ھەتا مووچێن فەرمانبەرێن ھەرێمێ بھێنەمەزاختن و بیتە بریار دیسا کەس نەھات”.
ئاشکراکر ژی کو ھەکە دگەل خەلکێ کوردستانێ ینە پێدڤیە ھەموو وەزیرێن کورد و ئەندام پەرلەمانێ، کورد ل بەغدا بزڤرینە ھەرێمێ و کاودانێن مە وەک خەلکێ مە بن و نە ئەم بەغدا مووچا وەربگرین و ھەرێمێ مووچە نەبن”.
ئاماژه ب وێ چه‌ندێ ژى كر كو وەکو لیستا گۆڕان ئەو ھاریکاریا خەلکێ خوە دکەن و گۆت: “ب تنێ من لیستا ھاریکاریاریێ ھەیە بۆ ٦٠ کەسان و دیسا پشکەکا مووچێن مە ئەندامێن لیستا گۆڕان بۆ حیزبێ دچیت.
ئه‌ڤرۆ نيوز، نيوار محه‌مه‌د سه‌ليم:
ژێده‌ره‌كى ژ هێزێن پێشمه‌رگه‌ى راگه‌هاند كو دو فرۆكێن هه‌ليكۆپته‌ر ب دژوارى ده‌ڤه‌رێن ده‌وروبه‌رێن شنگال بۆردۆمان كر و ب ده‌هان چه‌كدارێن داعش كوشتن.
ئه‌فسه‌ره‌كێ پێشمه‌رگێ كوردستانێ كو مه پاراستن ل سه‌ر به‌لاڤكرنا وى كر، دياركر كو ئه‌ڤرۆ رۆژا پێنجشه‌مبى دو فرۆكێن هه‌ليكۆپته‌ر جهێن چه‌كدارێن داعش ل نێزێكى چيايێ شنگال بۆدۆمان كرن ل ده‌مێ بزاڤ دكر ب سه‌ر چيايى بكه‌ڤن”.
ئه‌ڤى ئه‌فسه‌رى زێده‌تر گۆت: “ب گۆره‌ى پێزانينێن ده‌سپێكى ب ده‌هان كه‌س بووينه قوربانى”.
ب گۆره‌ى ژێده‌رێن شه‌رڤانێن ئێزدى زێده‌ترى پێنج هزار شه‌رڤانێن ئێزدى كو قاسم شه‌شۆ كارگێرێ لقا 17 يا پارتى ديموكراتى كوردستان سه‌رپه‌رشتيا وان دكه‌ت ل گه‌ل هنده‌ك ژ پێشمه‌رگێ كوردستانێ كو به‌رچاڤترين كه‌س ژ وان ته‌مه‌ر ره‌مه‌زانه پارێزگارێ به‌رێ يێ دهۆكێ و ئاشتى كوچه‌ر به‌رپرسێ ئاسايشا زاخۆ.
ئه‌ڤرۆ نيوز:
سعوديێ حوكمێ زيندانيكرنێ دانا سه‌ر چار ژنا كو دناڤبه‌را شه‌ش بۆ ده‌هـ سالان ژ ئه‌گه‌رێ پشته‌ڤانيكرنا چه‌كدارێن داعش.
ده‌زگه‌هێن راگه‌هاندنا سعوديێ راگه‌هاند كو دادگه‌هێ تاوانا هه‌ڤكاريا داعش ل سه‌ر چار ژ ژنێن سعوديێ سه‌پاند كو هاريكاريا كوڕێن خوه كريه ل سه‌ر گه‌هشتنا وان ب داعش ب رێيا چوونا ناڤ مالپه‌رێن ئه‌لكترۆنى يێن هه‌مه‌ره‌نگ، ديسا دانلۆدكرنا گرتيێن ده‌نگى و يێن ڤيديۆيێ يێن گرێدايى كوشتنێ.
ب گۆره‌ى ئاژانسا ده‌نگوباسێن فره‌نسى، ژڤانێ ڤان كرياران و ناسنامێن ڤان ژنا ديار نه‌كريه، كو به‌رى نوكه بڕيارا گه‌شتكرنا سێ ژ وان راوه‌ستاند بوو.
به‌رى نوكه موفتيێ سعوديێ شێخ عه‌بدولعه‌زيز ئال شێخ راگه‌هاند بوو كو رێكخستيا ده‌وله‌تا ئيسلامى دوژمنا ئێكێ يا ئيسلامێ يه.
ئه‌ڤرۆ نيوز:
سه‌رۆكێ توركيا، ره‌جه‌ب ته‌يب ئه‌ردوگان راگه‌هاند كو ئه‌و يێن گه‌هشتينه رێكه‌فتنێ 200 پێشمه‌رگه ل باشوورێ كوردستانێ بچنه رۆژئاڤا د سه‌ر ئه‌ردێ توركيا (باكوورێ كوردستانێ)، دا دا كو پشكداريێ د شه‌رێ دژى داعش دا بكه‌ن.
هه‌ر چه‌نده هێشتا ب ره‌نگه‌كێ فه‌رمى نه‌هاتيه دياركرن كا دێ چه‌ند پێشمه‌رگه و ب چو رێ چنه كۆبانێ، د ڤێ ده‌ربارێ دا سه‌رۆكێ توركيا ل وه‌لاتێ لاتڤيا ئاشكه‌را كر كو ئه‌و يێن گه‌هشتينه رێكه‌فتنێ و دێ 200 كه‌س ژ هه‌رێمێ چنه كۆبانێ.
ئه‌ڤ ته‌كستكرنا ئه‌ردوگان د ده‌مه‌كى دا هات، پشتى سه‌رۆك وه‌زيرێ توركيا داوود ئوغلۆ گۆتى: “دانوستاندن د به‌رده‌وامن ل سه‌ر چوونا پێشمه‌رگه‌ى”، ره‌تكر ژى كو نوكه ده‌ست ب چوونا پێشمه‌رگه‌ى بۆ وێ ده‌ڤه‌رێ كربيت.
سه‌رۆكێ توركيا ره‌خنه ژى ل فرۆكێن ئه‌مريكا گرتن يێن چه‌ك بۆ چه‌كدارێن YPG به‌ردايه ناڤا كۆبانێ، ئه‌و چه‌كێ دبێژن كو داعش هژماره‌ك يا وه‌رگرتى، گۆت: “ئه‌مريكا د ڤێ پێنگاڤێ دا، سه‌رپێچى ل سه‌ر توركيا كر”.
ئاژانسا ئه‌نادۆل ژ زار ده‌ڤێ ئه‌ردوگان ل ده‌مێ كۆنگرێ وى يێ رۆژنامه‌ڤانى ل گه‌ل هه‌ڤالێ وى يێ لاتڤى ئه‌ندرێس پيرزينس به‌لاڤكر كو ئه‌وى سه‌رۆكێ ئه‌مريكا ئاگه‌هدار كريه كو رێكخستيا پارتا ئێكه‌تيا ديموكرات YPD رێكخستيه‌كا تيرۆرستى يه وه‌كو PKK و هاريكاريا ئه‌و بۆ دكه‌ن، دێ بۆ تيرۆرێ چيت.
ژ لايێ خوه ڤه ره‌وانگه‌ها سوريا بۆ مافێن مرۆڤى راگه‌هاند كو داعش ده‌ستێ خوه يێ دانايه سه‌ر تل شوعه‌ير ل لايێ رۆژئاڤايێ كۆبانێ كو ب ڤێ چه‌ندێ ژى گه‌مارۆ ژ سێ لايا دانا سه‌ر كۆبانێ، رۆژهه‌لات و ئاڤا و باشوورى، ل باكوورى ژى نوكه شه‌ره‌كێ دژوار ل گه‌ل يه‌كينه‌يێن پاراستنا گه‌ل دهێته كرن.
ئەڤرۆ نیۆز، قائید میرۆ:
بەرپرسێ راگەھاندنا لقا ١٤ یا پارتی دیموکراتی کوردستان بۆ ئەڤرۆ نیۆز دیارکر، د شەڕێ چولر رۆژێن بۆری دا تنێ لە دەوروبەرێ مووسڵ پتری چوارسەد چەکدارێن داعش ھاتینە کوشتن.
سەعید مەمووزینی، بەرپرسێ راگەھاندنا لقا ١٤یا پارتی دیموکراتی کوردستان ب ئەڤرۆ نیۆز راگەھاند، د ئەنجامێ شەڕێ چوار رۆژێن بۆری یێن دنێڤبەرا ھێزێن پێشمەرگەیی و چەکدارێن داعش، ھژمارەکا زۆرا چەکدارێن داعش ھاتینە کوشتن و گورەی زانیاریێن مە ھەتا نوکە ٤٠٤ تەرمێن داعش ڤەگەڕیانە باژێڕێ مووسل.
سەعیدی گۆتژی” نوکە چەکدارێن داعش دەست ب گرتنا وەلاتیان لناف باژێڕێ مووسل کریە و ددەمێ چەند رۆژێن بۆری دا ب سەدان وەلاتی ھاتینە دەستەسەرکرن.
ئەڤرۆ نیۆز، قائید میرۆ:
رێڤەبەرێ گشتیێ ڤەگوھاستنا ھەرێما کوردستانێ دیارکر، سپێدەھیا ئەڤرۆ شەش شوفێرێن کورد ل بەغدا ھاتینە رەڤاندن و بەرامبەر ئازادکرنا ھەر شوفێرەکی داخوازا ١٠ ھزار دۆلاران تێتەکرن.
سەلاح جەوھەر، رێڤەبەرێ گشتیێ ڤەگوھاستنا ھەرێما کوردستانێ تایبەت ب ئەڤرۆ نیۆز راگەھاند، کو سپێدەھیا ئەڤرۆ پێنج شەمبیێ ھژمارەکا چەکدارێن نەنیاس لباژێڕێ بەغدا چوار شوفێرێن کورد بناڤێ کارکرنێ دگەل خوە برینە و پشتی ھنگی رەڤاندی، ھەر ئەڤرۆ ل رێیا بەغدا و نێزیک قەزا خالس شوفێرەکێ دی و وەلاتیەکێ کورد ھاتینە رەڤاندن.
سەلاحی گۆت” ھەر پێنج شوفێرێن ھاتیە رەڤاندن خەلکێ باژێرێ ھەولێرێ نە و بەپرسێ ھێلا بەغدا بۆ ھەولێر، بزاڤێن زۆر کرینە بۆ ئازادکرنا شوفێرێن کورد، بەلێ ئەو گروپا شوفێر رەڤاندی(عەسابەیێن بەغدانەو) بۆ ئازادکرنا ھەر شوفێرەکی داخوازا دەھە ھزار دۆلاران دکەن.
ئه‌ڤرۆ نيوز:
به‌رپرسه‌كێ PYD داخۆيانيه‌كا وه‌زيرێ گه‌هاندنا سوريا ره‌تدكه‌ت ده‌ما گۆتى سۆپايێ سوريا هه‌ڤكاريا كۆبانێ يا كرى.
پشتى عومران ئه‌لزوعبى، وه‌زيرێ راگه‌هاندنا سوريا د داخۆيانيه‌كێ دا ل گه‌ل تله‌ڤزيۆنا سوريا راگه‌هاند كو سۆپايێ سوريا چه‌ك يێ گه‌هانديه كۆبانێ بۆ روو ب رووى بوونا چه‌كدارێن داعش و كه‌س نه‌شێت ڤێ چه‌ندێ ره‌تدكه‌ت، به‌لێ ديار قامشلى ئه‌ندامێ نوونه‌راتيا PYD ل هه‌رێما كوردستانێ د داخۆيانيه‌كێ دا بۆ باس نيوز ره‌تكر كو رژێما سوريا هه‌ڤكاريا وان كربيت.
ديار قامشلى گۆت: “چو ده‌ما هه‌ڤكارى ل گه‌ل مه و رژێما ئه‌سه‌د نه‌بوويه، د سه‌ر هندێ را رژێما ئه‌سه‌د ده‌ليڤه بۆ داعش خۆش كريه دا كو هێرشێ بكه‌ته سه‌ر رۆژئاڤايێ كوردستانێ، به‌لێ بڕيارا مه ئه‌و بوويه هه‌رێما كوردان ب پارێزين”.
ئه‌ڤى به‌رپرسێ PYD ئه‌ڤ داخۆيانيا رژێما ئه‌سه‌د ب نه‌راست ل قه‌له‌م دا و گۆت: “رژێما ئه‌سه‌د چو هاريكاريا مه ل كۆبانێ نه‌كريه، به‌رى نوكه ژى هاريكاريا كوردان نه‌كريه و ناكه‌ن و ئه‌م ژى قه‌بوول ناكه‌ين”.
ديار قامشلى وه‌سان دبينيت كو ژ ئه‌گه‌رێ به‌رگريا شه‌رڤانان و ئێكرێزيا كوردان ل كۆبانێ هه‌رده‌م ناكه‌ڤيت.
ئەڤرۆ نیۆز، قائید میرۆ:
ئێکەتیا مامۆستایێن کوردستانێ راگەھاند، ل دۆر رەوشا خواندنێ و ھاتنا ئاوارەیان بۆ پارێزگەھا دھۆکێ، سەرۆکێ ئێکەتیا مامۆستایان ھاتیە گازیکرن بۆ وەلاتێ بریتانیا.
ئەحمەد گەرمیانی، جێگرێ سەرۆکێ ئێکەتیا مامۆستایێن کوردستانێ تایبەت ب ئەڤرۆ نیۆز راگەھاند، ئێکەتیا مامۆستایێن کوردستانێ داخوازێ ھاریکاریێ ژ ئێکەتیا مامۆستایێن ئەمریکا کریە، ئەوژی بۆڤان مامۆستایێن ل دەڤەرێن شەڕ تێدا ئاوارەی ھەرێمی کوردستانی بووینە.
گەرمیانی گۆتژی” سەرۆکێ ئێکەتیا مامۆستایێن کوردستانێ ھاتیە گازیکرن بۆ وەلاتێ بریتانیا، ئەوژی بۆدانوستانان ل دۆر رەوشا ئاوارەیێن پارێزگەھا دھۆکێ و دەستپێنەکرنا سالا خواندنێ ل ھژمارەکا زۆر یا قوتابخانێن پارێزگەھا دھۆکێ، چونکو ژبەر ھاتنا ئاوارەیان نێزیکی شەشسەد ھزار قوتابی ل دھۆکێ بێ بەھر بووینە ژ خواندنێ، ئەف ئاریشەیێن کەرتێ پەروەردێ د بۆ جیھانێ ھێنە بەحسکرن.
ئه‌ڤرۆ نيوز، ناجی به‌ده‌ل:
رێڤه‌به‌ریا په‌روه‌ردا رۆژهه‌لات ل پارێزگه‌ها دهۆكێ ب هه‌ماهه‌نگی ل گه‌ل ناحیا زاویته بۆ ڤالاكرنا قوتابخانه‌یان ده‌ست پێكریه، هه‌ر ماله‌كێ دێ چادره‌ك پێ هێته دان.
سه‌میر عه‌بدولعه‌زیز رێڤه‌به‌رێ په‌روه‌دا رۆژهه‌لات ل پارێزگه‌ها دهۆكێ بۆ ئه‌ڤرۆ نیوز گۆت: “ب هه‌ماهه‌نگی ل گه‌ل ناحیا زاویته ده‌ست ب ڤالاكرنا قوتابخانێن ل توخیبێ په‌روه‌ردا رۆژهه‌لات هاتیه كرن، هه‌تا نها 20 قوتابخانه هاتینه ڤالاكرن و هێشتا 95 قوتابخانه ماینه”.
زێده‌تر گۆت: “رێڤه‌به‌رێن قوتابخانا و مامۆستا ئاگه‌هدار كرینه، هه‌كه خوه كرێكاران ژى بۆ خوه بگرن بۆ پاقژكرنێ و پێدڤێن پاقژكرنێ بكرن و پاشی پسۆلێن خه‌رجیان بۆ مه دێ ئینن و دێ بۆ هێنه مه‌زاختن”.
سه‌میر عه‌بدولعزیز رێڤه‌به‌رێ په‌روه‌ردا رۆژهه‌لات ئاشكه‌را كر كو پشتى دهێنه ڤالاكرن دێ هێنه تافيلكرن و پاشان ده‌ست ب ده‌وامێ هێته كرن.
رێڤه‌به‌رێ په‌روه‌دا رۆژهه‌لات ل پارێزگه‌ها دهۆكێ گۆتژی: “هه‌كه ل گۆری ئه‌وی سیسته‌مێ بۆ پاقژكرنێ هاتیه دانان و ده‌ست ب پاقژكرنا قوتابخانان بهێته‌كرن دێ هه‌یڤه‌كا دی گیرۆ بیت، له‌ورا ئه‌مێ له‌زێ دكه‌ین ل ڤالاكرن و پاقژكرنێ و هه‌ر قوتابخانه‌كا دهێته ڤالاكرن، دڤیت ماوێ دو رۆژان ده‌ست ب پاقژكرنا قوتابخانان رابن و پشتی ب دووماهى هاتنا پاقژكرنێ دێ ده‌وام ده‌ست پێ بكه‌ت”.
ل دووماهيێ ژى سه‌میر گۆت: “هه‌ر خێزانه‌كا ئاواره د قوتابخانه‌كێ ڤه دێ چادره‌ك بۆ هێته دابینكرن و ل سه‌ر وان پێدڤيه ل جهه‌كی بۆ خوه ڤه‌ده‌ن و قوتابخانان ڤالا كه‌ن و نه میننه ل به‌ر سه‌رما زڤستانێ”.
نيشاندان