دھۆک، لەزگین جۆقی:

ئەندامێ خولا بەرێ یێ پەرلەمانێ عیراقێ ل بەرۆکێن شەری مەحما خەلیل بۆ ئەڤرۆ دیارکر کو ب تنێ ١٥ کیلومەتر ماینە ھیزێن پێشمەرگەی بگەھنە د ناڤ ناحیا سنوونێ دا و ب ئێکجاری ژ دەستێن خوە کوژێن داعش بھێتە رزگار کرن و گۆت سەرۆک بارزانی ب شەڤ و رۆژ کار دکەت بۆ ئازادکرنا شنگالێ و ھەموو دەڤەرێن دی یێن کوردستانێ.

مەحما خەلیل ھەروەسا گۆت: “پشتی ناحیا زومار و رەبیعە ھاتینە رزگار کرن ترسەک بۆ خوە کوژێن داعش دروست بوویە و ئەڤە چەند رۆژن چو ھێرش ئەنجام نەداینە ئەڤە ژی وێ دگەھینت کو شیانێن ھێرشکرنێ نەماینە ب تنێ یا بەرگریێ ژ خوە دکەت، دیار ژی کر کو ئەو چاڤەرێی فەرمانا بارزانی نە بۆ ھێرشکرنێ”.

ئەو ژی خۆیاکر کو رۆژ بۆ رۆژێ گەنج دگەھنە ناڤ رێزێن پێشمەرگەی و خوەبەخش شەری دکەن، بەرھەڤیێن مەزن دھێنە کرن بۆ ئازادکرنا شنگالێ و نوکە چەندین گەنجێن شنگال ل چیایی نە و چاڤەرێ فەرمانا سەرۆک بارزانی دکەن داکو دەست ب ھێرشێ بکەن بۆ ئازادکرنا شنگالێ و سنوونێ و ھەموو دەڤەرێن دی، گۆتژی: “ئەم ب ھیڤی نە ل وەختەکێ نە دوور مزگینیا ئازادکرنا شنگالێ بھێتە راگەھاندن”.

ئه‌ڤرۆ نيوز:

ئاخفتنكه‌رێ ب ناڤێ يه‌كينه‌يێن پاراستنا گه‌ل، يه‌په‌گێ، راگه‌هاند كو هێزێن پێشمه‌رگێ كوردستانێ ل كۆبانێ خوه‌ ژ بوو شه‌رێ دژى داعش ئاماده‌ دكه‌ن و هه‌بوونا وان دێ هه‌ڤسه‌نگيا كێشێ گوهۆڕيت.

پۆلات جان، ئاخفتنكه‌رێ ب ناڤێ يه‌كينه‌يێن پاراستنا گه‌ل بۆ ئاژانسا فرانس پرێس راگه‌هاند كو به‌رى دو رۆژا هێزێن پێشمه‌رگێ هه‌رێما كوردستانێ چووينه‌ كۆبانێ و نوكه‌ خوه‌ ئاماده‌ دكه‌ن دا شه‌رى ل دژى داعش بكه‌ن.

ل سه‌ر داخوازا سه‌رۆكێ هه‌رێما كوردستانێ مه‌سعود بارزانى و ب پشتى ره‌زامه‌نديا په‌رله‌مانێ كوردستانێ، هه‌رێما كوردستانێ ژ بوو هاريكاريكرنا رۆژئاڤا، 150 پێشمه‌رگه‌ ژ هێزا پشته‌ڤانيێ هنارتنه‌ باژێرێ كۆبانێ و ل هه‌موو جهان پێشوازيه‌كا گه‌رم لێ هاته‌ كرن.

ئاخفتنكه‌رێ ب ناڤێ يه‌كينه‌يێن پاراستنا گه‌ل خۆيا ژى كر كو ب وى چه‌كێ گران يێ ل گه‌ل وان هه‌يى، دێ رۆله‌كێ مه‌زن گێرن و گۆن: “هه‌ڤسه‌نگيا هێزێ ل كۆبانێ دێ هێته‌ گوهۆڕين”.

دھۆک، لەزگین جۆقی:

رێڤەبەرێ ناحیا زمار بۆ ئەڤرۆ دیار کر کو دەواما ئاسایی ل ھژمارەکا دامودەزگەھێن حکوومی ل ناحیا زمار دەست پێ کریە، دیسا لیژنا ناوچا زمار یا پارتی و لیژنا ناوچا دیجلە ژی دەست ب کارێن خوە یێن ئاسایی کرینە و گۆت “ئەو وەلاتیێن سەرەدانا مالێن خوە کرین یان ڤەگەریاینە سەر مال و مولکێن خوە ھەتا نوکە چار ژ وان ب ئەگەرێ TNT و بۆمبێن چاندی گیانێ خوە ژ دەست داینە”.

موزاحم سەعدون، رێڤەبەرێ ناحیا زمار ئاشکرا کر، ھەتا نوکە وەلاتیێن سەنتەرێ ناحیێ ھێژ قەستا سەر مال و مولکێن خوە نەکریە و گۆت “وەلاتیێن ٢٦ گوندان ڤەگەریاینە سەر مال و مولکێن خوە، لێ خێزانێن وان ھەموو گوندان نە ڤەگەریاینە، بەلکو ل ھەر گوندەکی ھژمارەکا خێزانان زڤرینە سەر مال و مولکێن خوە، نوکە رەوش ل زمار زۆر یا ئارامە و دبن کۆنترولا پێشمەرگێ کوردستانێ دایە”.

خویا ژی کر، بەردەوام خێزانێن زمار قەستا سەر مال و مولکێن خوە دکەن و گۆت “ھەتا نوکە چار ژ وان وەلاتیێن قەستا مال و مولکێن خوە کرین ب ئەگەرێ TNT و بۆمبێن چاندی کو ژ لایێ تیرۆرستێن داعش ڤە ھات بوونە دانان گیانێ خوە ژ دەست داینە”.

ناڤھاتی ئاماژە دا وێ چەندێ، پێخەمەت پاراستنا گیان و سامانێ وەلاتیان، بەردەوام تیمێن ئەندازیاریا لەشکەری وان TNT و بۆمبان رادکەن و گۆت “داخوازێ ژ وەتیان دکەین گەلەک ب لەز نەبن و د گەل تیمێن راکرنا  TNT و بۆمبان د ھەڤکاربن ھەتا کارێ خوە ئەنجام د دەن، پاشی وەلاتی دئازادن بۆ ڤەگەریانا سەر مال و مولکێن خوە ل دەڤەرا زمار”.

رێڤەبەرێ ناحیا زمار دا زانین، کو ئاڤاھیێ رێڤەبەریا ناحیێ و جڤاتا ناحیێ ژ لایێ تیرۆرستێن داعش ڤە گەلەک ھاتینە بێ سەروبەرکرن و گۆت “نوکە ئەم یێ بزاڤێ دکەین ئاڤاھیێن خوە نووژەن بکەین و د دەمەکێ نێزیک دا دەست ب دەواما خوە یا ئاسایی ل زمار بکەین”.