شرۆڤەكارەكێ سیاسی راگەهاند: بانگەشەیا پارتی دیموكراتی كوردستان بۆ هەلبژارتنێن خولا شەشێ یا پەرلەمانێ كوردستانێ كاریگەری ل سەر زێدەكرنا دەنگێن پارتی هەبوو، هەروەسا دبێژیت: خەلكی باوەری یا دایە پارتی و ئەركێ وێ زێدەتر گران كریە.
عرفان عەزیز، شرۆڤەكارێ سیاسی، د داخۆیانییەكا رۆژنامەڤانیدا گۆت» شێوازێ بانگەشەیا پارتی د هەلبژارتنێن ڤێجارێدا كاریگەری ل سەر زێدەبوونا دەنگێن وێ هەبوو، چونكە شێوازەكێ جودابوو، ل هەر بازنەیەكێ پارتی ب جۆرەكی كەمپینا مودێرن بڕێڤەدبر، بۆ جارا ئێكێیە ل ئیراقێ و هەرێما كوردستانێ بانگەشەیا ب وی شێوەی بهێتە كرن ژ ئالیێ لیست و پارتێن سیاسی ڤە».
پارتی ب لیستا 190 پشكداری د هەلبژارتنێن رۆژا 20 ئۆكتۆبەرێ یێن پەرلەمانێ كوردستانێدا كر و شییا ب جوداهییەكا مەزن ل گەل ئالیێن دی یێن سیاسی ببیتە یا ئێكێ ل سەر ئاستێ هەرێما كوردستانێ.
وی شرۆڤەكارێ سیاسی دیاركر» ب دەستڤەئینانا لیستا پارتی دیموكراتی كوردستان د هەلبژارتنێن پەرلەمانێ كوردستانێدا زێدەتر ژ 800 هزار دەنگان ئاماژەیە بۆ وێ چەندێ پارتی د وی چارچۆڤەیدا دەركەفتی كو هیچ ئالییەك بشێت هەڤڕكییا وێ بكەت، ژ بەر كو جوداهی گەلەكە و دەنگێ هیچ ئالییەكی یێ نێزیك نینە ژ دەنگێ پارتی تاكو هەڤڕكییا وێ بكەت».
عرفان عەزیز ئەوژی گۆت» سەركەفتنا پارتی دیموكراتی كوردستان د بانگەشەیا هەلبژارتناندا بۆ چەند خالان دزڤریت، ژبلی وێ چەندێ بانگەشەیەكا ل سەرخوە و سەردەمییانە بڕێڤەبر، پڕۆژە ژی راگەهاند، پەیام و درووشمێن پارتی زێدەتر نیشتمانی بوون، ئەوێ چەندێ ژی وەكر كاریگەری ل سەر خەلكێ نیشتمانپەروەر و گوهۆڕینا ئاراستەیێ دەنگدەری بۆ لیستا خوە هەبیت، هەروەسادووماهی یەیڤا سەرۆك مەسعود بارزانی ل رۆژا 15 ئۆكتۆبەرێ وێ ژی كاریگەرێ ل سەر بانگەشەیا پارتی كر، چونكە سەرۆك بارزانی زێدەتر وەكو كەسەكێ نیشتمانپەروەر و نەتەوەیی پەیڤا خوە پێشكێشی جەماوەرێ كوردستانێ كر، وەكو خودانێ مللەتێ نەكو وەكو سەرۆكێ حزبەكێ».
ل دووماهیێ، عرفان عەزیز ئاماژەكر» پارتی سەركەفتنەكا بەرچاڤ د هەلبژارتنێن پەرلەمانێ كوردستانێدا تۆماركر، بەلێ د گەل وێ چەندێ ژی دا ئەركێ پارتی زێدەتر گران بوو، هەكە پێشتر 500 هزار دەنگ هەبوون نوكە زێدەتر ژ 800 هزار دەنگ یێن هەین و دەنگدەری دلسۆزییا خوە بۆ پارتی نیشادا، ب دیتنا من پێدڤییە پارتی ژی پاداشتا دلسۆزییا دەنگدەران بدەت، ئەوژی ب پێشكێشكرنا خزمەتگوزارییان و ب جهئینانا كارنامەیا لیستا خوە».

هەولێر، قائید میرۆ

چاڤدێرەكێ سیاسی راگەهاند، پێشبینی دهێتە كرن هەتا رۆژا 31ی ڤێ مەهێ ئەنجامێندووماهیێ یێن هەلبژارتنێن پەرلەمانێ كوردستانێ بهێنە راگەهاندن و دبێژیت، پێكئینانا كابینەیا دەهێ سێ هەتا چار مەهان دێ ڤەكێشیت.
ئیبراهیم مەندەلاوی، چاڤدێرێ سیاسی بۆ رۆژنامەیا (ئەڤرۆ) گۆت « كۆمسیۆنا بلند یا سەربخوەیا هەلبژارتنان ل ئیراقێ ل رۆژا 21ی مەهێ ئەنجامێن دەستپێكێ یێن هەلبژارتنێن پەرلەمانێ كوردستان راگەهاندن و هێشتا 26 سندووق یێن ماین بهێنە ئێكلاكرن، پشتی ئێكلاكرنا وان سندووقێن ئاریشە ل سەر هەی دێ ئەنجامێن دووماهیێ یێن هەلبژارتنێن رۆژا 20ی ئۆكتۆبەرێ هێنە راگەهاندن، ئەز پێشبینیێ دكەم رۆژا 31ی ئۆكتۆبەرێ كۆمسیۆنا بلند یا سەربخوە یا هەلبژارتنان ل ئیراقێ ئەنجامێندووماهیێ یێن هەلبژارتنان ئاشكرا بكەت».
گۆت ژی» پشتی راگەهاندنا ئەنجامێندووماهیێ دێ دەمەك وەك دەلیڤە بۆ قەوارە و بەربژێران هێتە دیاركرن بۆ تۆماركرنا سكالایان ل سەر ئەنجامێن هەلبژارتنان، كو پێدڤییە د دەمێ حەفتیەكێدا جڤاتا كۆمسیاران یا سەر ب كۆمسیۆنێ ڤە سكالایان بلند بكەت بۆ جڤاتا دادوەری و د دەمی 10 رۆژاندا بهێنە ئێكلاكرن و د دووڤدا پێدڤییە دادگەها بلند ئەنجامان پەسەند بكەت».
ئیبراهیم مەندەلاوی ئاماژەكر» قۆناغا دویێیا پشتی پەسەندكرنا ئەنجامێن هەلبژارتنێن پەرلەمانێ كوردستانێ، دێ سەرۆكێ هەرێما كوردستانێ داخوازێ ژپەرلەمانی كەت د دەمێ 15 رۆژاندا كۆمبوونا خوە ئەنجام بدەت و تێدا مەزنترین پەرلەمانتار دێ سەرۆكایەتییا كۆمبوونا ئێكێ یا پەرلەمانی كەت و دەستەیا سەرۆكایەتییا پەرلەمانی دێ هێتە هەلبژارتن، بەلێ هەكە ئالیێن سەركەفتی د هەلبژارتناندا نەگەهشتنە رێككەفتنێ بۆ دانانا دەستەیا سەرۆكایەتییا پەرلەمانی دێ كۆمبوونا پەرلەمانی ب ڤەكری مینیت، پشتی ب رێڤەچوونا ئیكەم كۆمبوونا پەرلەمانێ كوردستانێ د دەمێ 30 رۆژاندا دێ سەرۆكێ هەرێما كوردستانێ ژی هێتە هەلبژارتن و دێ دەرگەهێ وەرگرتنا بەربژاران بۆ پۆستێ سەرۆكێ هەرێمێ هێتەڤەكرن و ب گۆڕەی مەرجێن دیاركری هەر كەسەك دشێت خوە بەربژار بكەت بۆ پۆستێ سەرۆكێ هەرێما كوردستانێ، د كۆمبوونا دویێ یا پەرلەمانیدا كو نابیت ژ 30 رۆژان دەرباز ببیت، دێ سەرۆكێ هەرێمێ هێتە هەلبژارتن و د دەمێ 15 رۆژاندا سەرۆكێ هەرێما كوردستانێ دێ ئالیێ سەركەفتی د هەلبژارتناندا راسپێریت بۆ پێكئینانا كابینەیا نوو یا حوكمەتا هەرێما كوردستانێ، پێدڤییە ژی د دەمێ 30 رۆژاندا كابینەیا نوو یا حوكمەتێ بهێتە پێكئینان و رادەستی پەرلەمانی بهێتەكرن بۆ پەسەندكرنێ، كو پێدڤییە 51 پەرلەمانتار دەنگی ل سەر بدەن و پەسەند بكەن، ئەز باوەرم هەكە چو ئاریشە پەیدا نەبن دێ ئالیێن سیاسی گەهنە رێككەفتنێ و د دەمێ 3 هەتا 4 مەهاندا حوكمەتا نوو دێ هێتە پێكئینان»

سەرۆك بارزانی بۆ وەغەركرنا پرۆفیسۆر جۆیس بلەو، نڤیسەر و زمانناس و زانایا فرەنسی راگەهاند» جۆیس بلەو پشتەڤان و دۆستەكا مەزن یا گەلێ كوردستانێ بوو كو خزمەتەكا مەزن پێشكێشی زمان و ئەدەبێ كوردی و ئەنستیتیۆتا كوردی ل پاریس كریە و ماف ل سەر هەموویان یا هەی و زەحمەتا وی بۆ خزمەتكرنا كوردان ناهێتە ژبیركرن. سەرەخوەشییا خوە ئاراستەی مالبات و كەسوكار و هەڤالێن وێ و هەموو نڤیسەر و زمانناسێن كورد دكەم و خوە ب هەڤپشكێ خەما وان دزانم.
د. جۆیس بلەو، نڤیسەر، زمانناس و شارەزایا زمان و ئەدەبێ كوردی د ژیێ 92 سالیێدا وەغەركر.

ب بەرهەڤبوونا مەسرور بارزانی، سەرۆكێ حوكمەتا هەرێما كوردستانێ، ئاهەنگا دەرچوونا قوتابیێن زانكۆی كوردستان – هەولێر بڕێڤەچوو.
مەسرور بارزانی، سەرۆكێ حوكمەتا هەرێما كوردستانێ د پەیڤەكێدا ئاماژە ب وێ چەندێ كر» ئەڤ ئاهەنگا دەرچوونێ روودانەكا دیرۆكییە د ژیانا قوتابیێن دەرچووی و خێزانێن واندا، لەوما مرۆڤ شانازیێ و هیڤیێ د چاڤێن دەرچوویاندا دبینیت، د دەمەكیدا ئەو خوە بۆ قۆناغاەكا نوو یا ژیانا خوە بەرهەڤ دكەن».
سەرۆكێ حوكمەتا هەرێمێ رۆهنكر ژی» دەرچوونا هەژمارەكا دی یا قوتابییان، پشكدارییەكا گرنگە د پێشئێخستن و بەر ب پێشڤەبرنا جڤاكی و هیڤیدارم رۆلەكێ دیار د ئاڤاكرنا پاشەڕۆژەكا گەش بۆ كوردستانێ و بلندكرنا پێگەه و ناڤودەنگییا هەرێما كوردستانێدا هەبیت».
هەروەسا سەرۆكێ حوكمەتا هەرێما كوردستانێ د پشكەكا دی یا پەیڤا خوە دا رۆناهی ئێخستە سەر هەلبژارتنێن هەرێما كوردستانێ و دوپاتكر كو نوكە د قۆناغا بەرهەڤییان دانە بۆ پێكئینانا كابینەیا دەهێ یا حوكمەتا هەرێما كوردستانێ. كو پێدڤییە حوكمەتەكا د ئاستێ روو ب رووبوونا ئاستەنگێن داهاتیدا بیت، ئەڤە ژی دخوازیت زێدەتر هاریكاری د ناڤبەرا دەزگەهاندا هەبیت. دوپاتكر ژی كو پێشڤەبرنا پەروەردەیێ و خواندنێ هەردەم دێ د بەرنامە و كارێن بەرراهیێ یێن حوكمەتێدا بیت.
مەسرور بارزانی گۆت ژی» ئەو سەركەفتنا د هەلبژارتناندا مە ب دەستڤەئینای، ئەو ئەرك نووكر ژ ئالیێ گەلێ مە ب مە هاتییە راسپاردن بۆ ب دەستڤەئینانا ئارمانجێن مە، لەوما داخوازێ ژ هەموو ئالییان دكەم كو بهێنە دگەل پڕۆژەیێ مە یێ نیشتمانی بۆ ئاڤەدانكرن و گەشەكرنا وەلاتی ب رێكا بەرچاڤكرن و دیاركرنا شیانێن هەموو دەزگەهێن پەروەردەیی و فێركاری».
ئاماژە ب وێ چەندێ ژی كر كو هەڤهەلویست بوون ل دۆر گرنگی و پێشڤەبرنێ ب بوارێن خواندنێ و فێركرنێ، كو دێ مە كەتە هێزەكا ژێهاتی، نوكە ژی دەلیڤەیەكا نوو یا هەی بۆ وێ چەندێ رێزێن خوە ئێكبێخین، لەوما ئەركێ حوكمەتا نوویە كو روو ب روویێ ئاستەنگان ببیت و ب ئێكڕێزییڤە رەفتارێ ل گەل رەوشا ئەمنی و ئاستەنگێن ئابووری ل دەڤەرێ بكەت كو د ئالۆزی و نە ئارامیێدا یە.
سەرۆكێ حوكمەتا هەرێمێ ئەوژی بەرچاڤكر كو هەرێما كوردستانێ هەردەم بنگەهەكێ سەقامگیریێیە ل دەڤەرەكا پر ژ نەئارامیێ و هەنگامێدا، لەوما دوپاتی ل وێ چەندێ كر كو هەرێما كوردستانێ وەكو هەردەم ب فاكتەرەكێ ئارامیێ و سەقامگیریێ ل دەڤەرێ بمینیت.
هەروەسا باس ل پشكەك ژ وان دەستكەفتان كر كو كابینەیا نەهێ یا حوكمەتا هەرێما كوردستانێ ب دەستڤەئیناین، ژ وان ژی پڕۆژەیێ (هەژمارا من) كو هەتا نوكە نێزیكی 700 هزار كەسان ژ فەرمانبەرێن كەرتێ گشتی د ڤی پڕۆژەیدا هاتینە تۆماركرن. ژ بلی پڕۆژەیێ كارەبا (رۆناهی) كو ئارمانج ژێ دابینكرنا كارەبا 24 ساتییە ل سەرانسەری هەرێما كوردستانێ، ڤی پڕۆژەی ژی پێشكەفتنەكا بەرچاڤ یا ب دەستڤەئینای، كو هەتا نوكە زێدەتر ژ 50 هزار هەڤوەلاتی مفاداربووینە ژ كارەبا 24 ساتی، هەروەسا پلان ژی د بەردەوامن و پڕۆژە دێ سلێمانیێ و دهۆكێ ژی ڤەگریت.
سەرۆكێ حوكمەتا هەرێمێ دوپاتی ل گرنگییا كەرتێ چاندنێ كر و پێگیرییا حوكمەتێ ژی دوپاتكر ل دۆر وان بزاڤێن كو ئارمانج ژێ كوردستان ببیتە سەلكا خوراكی ل رۆژهەلاتا ناڤین، لەوما داخواز ژ دەرچوویان كر پشكداریێ د دەستڤەئینانا وی ئارمانجی بكەن ب رێكا داهێنانێ و زێدەكرنا بەرهەمی.
مەسرور بارزانی داخواز ژی ژ دەرچوویان كر كو پشكداریێ د ئاڤاكرنا جڤاكێ ب هێز و ئێكگرتیدا بكەن. سۆز ژی دا كو پشتەڤانیێ ل هەموو دەستپێشخەرییەكا داهێنەرانە بكەن كو پێشكێش دكەن. چ ژ دەزگەهێن حوكمەتێ بیت یان ژی ژ كەرتێ تایبەت. ئەوژی بەرچاڤكر كو خواست و باوەریبوون كلیلێن سەركەفتنێ نە بۆ ب دەستڤەئینانا دەستكەفتان.

نێچیرڤان بارزانی، سەرۆكێ هەرێما كوردستانێ د پەیامەكا بەهیداریێدا راگەهاند» سەرەخوەشییا خوە ئاراستەی مالبات و كەسوكارێن رەحمەتی پرۆفیسۆر جۆیس بلەو، دۆستا كوردان و نڤیسەر و زمانناس و شارەزایا زمان و ئەدەبێ كوردی و هەڤكارێن وێ ل ئەنیستیتیۆتا كوردی ل پاریس دكەم، هەڤسۆز و هەڤخەمێ وانم».
هەڤدەم گۆت ژی» جۆیس بلەز پترییا ژیێ خوە د پشتەڤانیكرنا گەلێ كوردستانێ و خزمەتا زمان و ئەدەب و كەلتوورێ كوردیدا دەربازكر. وەكو دۆستەكا دلسۆز و ب كار و بەرهەمێن خوە، هەردەم دێ ل بیرا مە بیت».

مەسرور بارزانی، سەرۆكێ حوكمەتا هەرێما كوردستانێ بۆ وەغەركرنا جۆیس بلەو، نڤیسەر و زمانناس و شارەزایا زمان و ئەدەبێ كوردی و دامەزرێنەرا ئینستیۆتا كوردی ل پاریس پەیامەكا بەهیداریێ ئاراستەی مالبات و كەسوكارو دۆستێن وێ كر و تێدا گۆت» سەرەخوەشییا خوە ئاراستەی مالبات و كەسوكار و دۆست و ئاشنایێن بلەو دكەم».
دیاركر ژی» جۆیس بلەو، دۆستەكا دلسۆزا گەلێ كوردستانێ بوو كو ب رێكا بەرهەم و ڤەكۆلین و چاپكریێن خوە، خزمەتەكا مەزن یا زمان و ئەدەب و كەلتوورێ كوردی یا كری، خودایێ مەزن گیانێ وێ ب بەهەشتێ شاد بكەت و ئارامیێ ژی ب هەموویان ببەخشیت».

مەكیهیرۆ ئەراكاو، قۆنسلێ ژابۆنێ ل هەرێمێ، سەرەدانا مەكتەبا پەیوەندیێن دەرڤە یێن پارتی دیموكراتی كوردستان كر و ژ ئالیێ هشیار سیوەیلی، بەرپرسێ مەكتەبێ پێشوازی لێ هاتە كرن.
ئەراكاو، خوەشحالییا خوە دیاركر ب هەلكەفتا سەركەفتنا پرۆسەیا هەلبژارتنێن پەرلەمانێ كوردستانێ و هیڤی خواست كو ئالیێن سەركەفتی د وێ پڕۆسەیێدا بشێن بگەهنە رێككەفتنێ بۆ پێكئینانا كابینەیا داهاتییا حوكمەتا هەرێما كوردستانێ.
د وێ دیدارێدا، باس ل پێشهاتێن پشتی هەلبژارتنان و وان پێرابوون و سیناریۆیان هاتە كرن، كو بۆ پێكئینانا كابینەیا داهاتی ل پێشن.
هشیار سیوەیلی، دوپاتی ل پەیڤا سەرۆك مەسعود بارزانی كر، كو پارتی دەستێ برایەتیێ بۆ هەموو ئالییەكی درێژ دكەت تاكو پێكڤە خزمەتا خەلكێ كوردستانێ و پڕۆسەیا سیاسی و پێشكەفتنا هەرێما كوردستانێ بكەن.
قۆنسلێ چاپۆنێ، هەروەسا دوپاتی ل پشتەڤانییا وەلاتێ خوە بۆ سەركەفتن و بەر ب پێشڤەچوونا هەرێما كوردستانێ كر و هیڤی خواست ئەو ئالیێن خواستا پشكداریێ د حوكمەتێدا هەی، لەزێ بكەن د دەستپێكرنا دانوستاندناندا بۆ پێكئینانا حوكمەتێ، تاكو بشێن خواستێن خەلكی ب دەستڤەبینن.
پشكەكا دی یا وێ دیدارێ، گرێدای بوو ب پەیوەندیێن حوكمەتا هەرێما كوردستانێ ل گەل حوكمەتا فیدرالی و بەرهەڤییان بۆ سەرژمێرییا گشتی ل ئیراقێ كو بڕیارە ل مەها داهاتی بهێتە ئەنجامدان. سەبارەت وێ چەندێ بەرپرسێ مەكتەبا پەیوەندیێن دەرڤە یێن پارتی گۆت» ئەم ب گرنگی د نێرینە وێ پڕۆسەیێ و سەرژمێرییا ئاكنجییان گەلەك یا گرنگە، كو چەندین سالە نەهاتییە كرن و دەمێ دهاتە ئەنجامدان ژی، بۆ مەبەستێن سیاسی بوو، نوكە گرفت و بەربەست یێن هەین و تاكو نوكە ژی گومان ل سەر میكانیزمێن وێ یا هەی، بەلێ پارتی پشتەڤانیێ ل سەرژمێرییەكا زانستی دكەت، كو بشێت خزمەتا پێشكەفتن و بەرنامە و پلانێن حوكمەتێ بۆ داهاتی بكەت.

كۆمسیۆنا بلند یا سەربخوە یا هەلبژارتنان ل ئیراقێ، بەرسڤا وان رەخنێن ئاراستەی وێ هاتینە كرن دا كو پشكەك ژ پارت و ئالیێن سیاسی ل هەلبژارتنێن پەرلەمانێ كوردستانێ گرتین و راگەهاند: هەلبژارتن گەلەك د سەركەفتی بوون.
نەبەرد عومەر، بەرپرسێ دەستەیا هەلبژارتنێن هەرێما كوردستانێ ل كۆمسیۆنا بلند یا سەربخوە یا هەلبژارتنان ل ئیراقێ د كۆنگرەیەكێ رۆژنامەڤانیدا گۆت» هەلبژارتنێن پەرلەمانێ كوردستانێ گەلەك د سەركەفتی بوون، ژ سەرجەمێ شەش هزار و 318 بنگەهێن دەنگدانێ، تنێ ل 26 بنگەهان كێشە هەبوو».
ل دۆر وان رەخنێن كو پترییا هەژمارێن دەنگێن ژناڤچووین دهێنە گرتن، كۆمسیۆنێ راگەهاند» هەمبەركرن ل گەل هەلبژارتنێن 2021، هەژمارا دەنگێن ژناڤچووین یا ئاسایییە، چونكە هەژمارا دەنگدەران یا زێدەبووی».
هەروەسا ئاماژە ب وێ چەندێ ژی كر كو ل هەلبژارتنێن 2021 هاتینە ئەنجامدان 197 دەنگێن ژناڤچووی هەبوون، ل هەلبژارتنێن پەرلەمانێ كوردستانێ ژی 208 هزار بوون».
دیاركر ژی»ئەو ئاخڤتنێن دهێنە كرن، یان ئەو كێشە و گرفتێن هەین، د راست نینن، چونكە مە شەش هزار و 318 ویستگەهـ هەبوون ژ وێ هەژمارێ تنێ كێشە ل 26 ویستگەهان ل هەولێرێ و دهۆكێ و سلێمانیێ هەبوو».

پارتێن کوردی ل تورکیا دیار دکەن دڤێت پرسا کوردی دوور ژ شەڕی و ب رێیێن ئاشتیانە بهێتە چارەسەرکرن، ژ بۆ ڤێ یەکێ ژی دڤێت دەولەتا تورکیا پێنگاڤێن بەرچاڤ بهاڤێژیت و ل ئالیێ دی دڤێت پەکەکە ژی دەست ژ چەکی بەردەت.

مستەفا ئۆچەلیک سەرۆکێ گشتی یێ پارتا وەلاتپارێزێن کوردستانێ دیار کر، پێدڤیا تورکیا ب قۆناغەکا نوو یا ئاشتیێ هەیە، دڤێت هەموو هێزێن کوردی ل تورکیا و باکورێ کوردستانێ ژی پێکڤە بۆ قۆناغەکا نوو کار بکەن و هەروەسا دڤێت دەولەت ناڤەرۆکا قۆناغەکا نوو بۆ رایا گشتی ئاشکرا بکەت.
ل ئالیێ دی دوزگون قاپلان سەرۆکێ گشتی یێ پارتا ماف و ئازادیان ژی دیار کر، دڤێت پرسا کوردی ل تورکیا ب رێیێن سیاسی و ئاشتیانە و دوور ژ شەڕی بهێتە چارەسەرکرن، داخۆیانیێن دەولەت باخچەلی سەرۆکێ پارتا بزاڤا نەتەوەپەرست گەلەک گرنگن، لێ دڤێت ناڤەرۆکا پرۆژەیی بۆ کوردان و رایا گشتی بهێتە ئاشکرا کرن.
سەبارەت ب قۆناغەکا نوو یا ئاشتیێ گەلەک پارت و ئالیێن سیاسی یێن باکورێ کوردستانێ ژی ب رەنگێن جودا جودا دیار کرن دەستپێکرنا قۆناغەکا نوو گەلەک یا گرنگە، دڤێت پرسا کوردی دوور ژ شەڕی و ب رێیێن ئاشتیانە بهێتە چارەسەرکرن، ژ بۆ ڤێ یەکێ ژی دڤێت دەولەت دەست ب قۆناغەکا نوو بکەت و دڤێت پەکەکە ژی دەست ژ چەکی بەردەت، هەکە کارەک وەسا بهێتە کرن ئەو وەکو پارت و رێکخستنێن کوردی پشتەڤانیێ لێ دکەن و دڤێت هەر دو ئالی ژی ب جدی کار بۆ چارەسەرکرنا پرسا کوردی بکەن، چونکی هەتا پرسا کوردی ل تورکیا نەهێتە چارەسەرکرن دێ رەوشا نها یا ئالۆز ل تورکیا بەردەوام بیت.
ل ئالیێ دی لەیلا زانا سیاسەتمەدارا ناڤدار یا کورد ل تورکیا ژی دیار کر، نها قۆناغەکا گەلەک گرنگ و دیرۆکی ل تورکیا دەستپێکریە، ب سالانە کورد داخوازا ئاشتیێ و راگرتنا شەڕی دکەن نها دەلیڤەکا گەلەک گرنگ و دیرۆکی هاتیە پێش و دڤێت هەم دەولەت و هەم ژی پەکەکە ڤێ دەلیڤێ ژ دەست نەدەن و گۆت: (پرسا کوردی پرسا سەرەکی یا تورکیا یە، ب سالانە پرسا کوردی نەهاتیە چارەسەرکرن، هەتا پرسا کوردی ژی ل تورکیا نەهێتە چارەسەرکرن دێ رەوشا ئالۆز هەر یا بەردەوام بیت، ژ بەر ڤێ یەکێ ژی گەلەک یا گرنگە هەموو هێزێن سیاسی و رێکخستنێن مافێن مرۆڤی، رۆژنامەڤان، نڤیسەر و کەسایەتیێن ناڤدار یێن تورک و کورد پشتەڤانیێ ل قۆناغا ئاشتیێ بکەن، پێدڤیا جڤاکێ تورکیا ب ئاشتیێ هەیە، ژ بەر ڤێ یەکێ ژی گرنگە هەر کەسەک یا ژ دەستێ وی بهێت بۆ ئاشتیێ بکەت، قۆناغا نها گەلەک گرنگە و دڤێت رێ نەدەین جارەکا دی هندەک هێز ئالۆزیان دروست بکەن).

مەزلوم عەبدی فەرماندارێ گشتی یێ هێزێن سووریا دیموکرات سەبارەت ب ئێرشێن ڤێ دووماهیێ یێن تورکیا ل سەر رۆژئاڤایێ کوردستانێ دیار کر، تورکیا ئێرشا ڤێ دووماهیێ یا ل ئەنقەرە کریە بەهانە و بەردەوام ئێرشی رۆژئاڤایی کوردستانێ دکەت و مخابن د ئەنجاما ئێرشێن تورکیا دا گەلەک کەس بووینە قوربانی، مە چو پەیوەندی ب ئێرشا ل ئەنقەرە نینن.
ناڤهاتی ئەو یەک ژی دیار کر، تورکیا دڤێت رێڤەبەریا خوەسەر ژناڤ ببەت، مخابن تورکیا ل ئالیەکێ بەحسێ ئاشتیێ دکەت و ل ئالیێ دی ئێرشی وەلاتیێن سڤیل یێن رۆژئاڤایێ کوردستانێ دکەت، لێ ئەو وەکو هێزێن سووریا دیموکرات دێ خەلکێ خوە پارێزن و دڤێت تورکیا ژی ئێرشێن خوە بدەتە راگرتن، هەلوەستێ جڤاکێ نێڤدەولەتی ژی ل هەمبەر ئێرشێن تورکیا جهێ گومانێ یە و دڤێت هەموو وەلاتێن جیهانێ ئێرشێن تورکیا شەرمزار بکەن.