ئەڤرۆ نیوز:

ھیزر نوریت بەربژێرا سەروکێ ئەمریکا دونالد ترامپ بۆ پوستێ بالیوزا وی وەلاتێ ل نەتەوەیێن ئێکگرتی بریار دا خوە ڤەکێشیت.

نورێت بێژەرا بەری نوکە یا کەنالێ جیھانی یێ تورا فوکس نیوز د بەیاننامەکێ دا بریارا ڤەکێشانا خوە بۆ پوستێ بالیوزا وەلاتێ ئەمریکا ل نەتەوەیێن ئێکگرتی راگەھاند، ئەگەرێ ڤێ بریارێ ژی بۆ بەرژەوەندیێن تایبەت یێن خێزانا خوە ڤەگەراند.

ھەژی گۆتنێ یە نورێت پەیڤدارا بەرێ یا وەزارەتا دەرڤە یا ئەمریکا بەری دو ھەیڤان ژلایێ دونالد ترامپی ڤە بەربژارکربوو بۆ پوستێ بالیوزا ئەمریکا ل نەتەوەیێن ئێکگرتی و دێ بیتە جھێ رازەمەندیا ھەموویان لێ ژ نشکەکێ ڤە ئەڤرۆکە ڤەکێشانا خوە راگەھاند.

ئەڤرۆ نیوز، هۆشەنگ تاجر:

فەیسەل ئیسماعیل ئەندامێ سەرکردایەتیا پارتی دیموکراتی کوردستان/ سووریا راگەهاند کو هەلویستێ ئەڤرۆکە یێ بەشاری ل دۆر رەتکرنا سیستەمێ لامەرکەزی بۆ سووریێ نیشا ددەت کو هێشتا ژی رژێما بەعسی ل سووریێ دڤێت وەکو بەرێ وەلاتی برێڤە ببەت و گۆت: (هەتا نها ژی رژێما سووریێ دانپێدان ب مافێ کوردان نەکریە، ب هزاران کورد ل سووریێ هەتا نها بێ ناسنامە نە، ژ بەر هندێ ژی هەلویستێ نها یێ بەشاری دێ رەوشا سووریێ ئالۆزتر کەت، چونکو مە بەری نها ژی گۆتیە هەتا کورد نەگەهنە مافێن خوە قەیرانا سووریێ چارەسەر نابیت).

ناڤهاتی ئەو یەک ژی راگەهاند کو هەلویستێ پەیەدێ و پەیوەندیێن وێ ل گەل رژێما سووریێ و هەروەسا پشتەڤانیا ئیرانێ و روسیا یا بەردەوام بۆ بەشاری وەسا کریە کو نها بەشاری دڤێت وەکو بەرێ سووریێ برێڤە ببەت.

ئەڤرۆ نیوز:

محەمەد جەواد زەریف وەزیرێ دەرڤە یێ ئیرانێ راگەهاند کو نها مەترسیا شەرەکێ ل گەل ئیسرائیلێ ژ هەر دەمەکێ دی زێدەتر بوویە و گۆت: (ئیسرائیل رۆژانە ل سووریێ بنگەهێن مە بۆمبەباران دکەت و خەلک سڤیل ژی دهێنە کوشتن، مخابن وەلاتێن ئورۆپا ژی ل هەمبەر بنپێکرنێن ئیرانێ بێدەنگن، لێ ئیران نەشێت هەتا هەتای ل هەمبەر زێدەگاڤیێن ئیرانێ بێدەنگ بیت).

ناڤهاتی راگەهاند کو ئەمریکا و هێزێن سەر ب وێ دخوازن وەکو سالا ٢٠٠٣ کا چاوا هێرشی عیراقێ کرن نها ژی دخوازن شەرێ ئیرانێ بکەن، ب تایبەتی ژی ئیسرائیل بۆ هندێ کار دکەت، ژ بەر ڤێ یەکێ ژی مەترسیا شەرەکێ ل گەل ئیسرائیلێ ژ هەر دەمەکێ زێدەتر بوویە.

ئەڤرۆ نیوز:

بەشار ئەسەد سەرۆکێ رژێما سووریێ ئەڤرۆکە د کۆمبوونەکێ دا ل گەل نوونەرێن ئیدارێن خوەجهی یێن سووریێ راگەهاند کو شەرێ ل دژی تیرۆرێ بەر ب دووماهیێ ڤە دچیت و گۆت: (نابیت چو ئالی ل سووریێ پشتا خوە ب ئەمریکا گەرم بکەن، چونکو ئەمریکا وان ناپارێزیت، لەشکرێ سووریێ دێ هەموو پێکهاتێن سووریێ پارێزیت و ژ بەر هندێ ژی ئەم هێڤیدارین چو گرۆپ پشتا خوە ب ئەمریکا گەرم نەکەن).

سەرۆکێ رژێما سووریێ سیستەمێ لامەرکەزی بۆ پاشەرۆژا سووریێ ژی رەتکر و راگەهاند کو ئارمانجا هندەک وەلاتان ژ سیستەمێ لامەرکەزی بۆ لاوازکرنا سووریێ یە و ئەم ڤێ یەکێ ب توندی رەت دکەین.