ئەڤرۆ نیوز، ئێقبال عومەر:

ئیسماعیل مستەفا قایمقامێ قەزا ئامێدیێ بۆ روژناما ئەڤرۆ دیارکر ژ ئەنجامێ بومبەبارانکرنا فروکێن سوپایێ تورکیا بۆ سەر بارەگایێن چەکدارێن پارتیا کرێکارێن کوردستانێ (پ.ک.ک) ل دەڤەرێن سنوری یێن باشورێ کوردستانێ، زیانێن گیانی و مادی ب وەلاتیێن ھەرێما کوردستانێ کەفتینە و گۆت: (من وەکو قایمقامێ قەزا ئامێدیێ و پارێزگارێ دھۆکێ فورمێن وەلاتیێن زیان پێگەھشتی ب رێیا جێگرێ سەرۆکێ پەرلەمانێ عیراقێ رەوانەی بەغدا کرینە و داخواز ژ جێگرێ پەرلەمانێ عیراقێ کرینە کو وەلاتیێن سنورێ پارێزگەھا دھۆکێ ب تایبەتی یێن قەزا ئامێدیێ ژلایێ حوکمەتا بەغدا ڤە بھێنە قەرەبوکرن و ئەو وەلاتیێن ب دەستێن سوپایێ تورکیا و پەکەکێ ڤە ھاتینە شەھیدکرن ب رەنگەکێ فەرمی وەکو ھەمی شەھیدێن دی بھێنە وەرگرتن ژلایێ وەزارەتا شەھیدان ڤە و مووچە بۆ بھێتە دابینکرن).

ئەڤرۆ نیوز، سەباح زوھێر:

ئەڤرۆ ل ھۆلا کۆنفرانسا ل قەزا ئاکرێ ب ئامادەبوونا نوونەرێن پارێزگەھا دھوکێ و وەزارەتا ناڤخوە کونگرێ بزاڤا رەوشەنبیری ل ئاکرێ ھاتە گێران و دەستەکا نوو ھاتە دانان.

شەھاب یاسین کارگێرێ بزاڤا رەوشەنبیری ل ئاکرێ بۆ ئەڤرۆ نیوز ددەتە دیارکرن کو بزاڤا رەوشەنبیری ل ئاکرێ وەکو ئێکەم سەنتەرێ رەوشەنبیری ل سەر ئاستێ ھەرێما کوردستانێ ل رێککەفتی ١/٧/١٩٩١ ھاتیە دامەزراندن، د ڤی ژیێ خوە دا ھەر دو سالا کۆنگرێ خوە گێرایە، ئەڤرۆ ژی کۆنگرێ خوە یێ چاردێ گێرا کو دەستەکا نوو دھێتە دانان بنە بەرپرسێن بزاڤا رەوشەنبیری ل ئاکرێ.

ناڤھاتی زێدەتر گۆت دڤان چەند سالا کومەکا چالاکیێن (سیاسی و رەوشەنبیری و دیرۆکی و بوارێن جودا) ١٩٤ ئەندام د بزاڤا رەوشەنبیری دا ل ئاکرێ ھەنە، ئەڤرۆ ژی دەستەکا نوو بۆ بزاڤێ ھاتە دانان.

ئەڤرۆ نیوز، بارزان مزووری:

دلشاد محەمەد راگەھاندنکار ژ پشکا ھاتنوچوونا قەزا شێخان بۆ ئەڤرۆ نیوز ئاشکرا کر کو ئەڤرۆ دەمژمێر ١:٠٠ پشتی نیڤرۆ رێککەفتی ٢٠ کانونا ئێکێ ٢٠١٨ ل سەر رێیا سەرەکیا شێخان بۆ کومەلگەھا مەھەت ل نێزیک گوندێ بێتنار رویدانەک د ناڤبەرا ترۆمبێلەکا بارھەلگر ژ جورێ ترێلە مارسیدس و ترۆمبێلەکا تایبەت ژ جورێ سورینتو رویدا د ئەنجام دا کەسەک ب سەختی بریندار بوو و ھاتە ڤەگوھاستن بۆ نەخوەشخانا شێخان یا گشتی و نھا لبن چاڤدێریا نوژداران دایە.

ئەڤرۆ نیوز، نەوزاد ھلۆری:

عەبدولرەحمان تێلی ئێکە ژ خوەدان پێشەسازیێن شێلادزێ بۆ ئەڤرو نیوز گۆت: (ئەڤە پتری ١٠ سالانە ئەم دناڤ بازارێ شێلادزێ کارێ ئاسنگەریێ دکەین، کارێ مە دەنگەکێ نەخوەش ھەیە و بێزایا خەلکی دکەت، بەلێ ژ بەر کو حوکمەت و جھێن شولەژێ چوو ھاریکاریا مە نەکرینە، ئەم ژی نەشێن جھێن خوە ڤەگوھێزین).

وارشین بەرواری، رێڤەبەرێ ناحیا شێلادزێ بۆ ئەڤرۆ نیوز گۆت: (پێشەسازیا شێلادزێ د نوکە دا ھەموو لسەر بازارێ شێلادزێ ھاتیە دابەشکرن و دزڤرین بۆ چەند سالەکا بەری نوکە، ژ بەر کو ئەو بازار ب رێک و پێکی نەھاتیە چێکرن و سەر و سیمایێ شێلادزێ تێکدایە و بەرپیێن خەلکی و شوفێرا و شێلادزێ بەتەنگ کریە، کار دھێتەکرن کو ھەموو ئەو جھێن پێشەسازی و بازرگانی بۆ دەرڤەیی شێلادزێ بھێنە ڤەگوھاستن و تا رادەیەکێ ژی جھـ ھاتیە دیارکرن).

زێدەتر گۆت: (پێشەسازیا شێلادزێ نێزکێ ١٠٠ جھان بخوە ڤە دگریت، لسەر ھەموو جوران ھاتیە دابەشکرن، ئەگەر بچیتە ژ دەرڤەیی باژێری دێ شێلادزێ ب رەنگەکێ باشتر و جوانتر ھێتە پێش).