ئەڤرۆ نیوز:
ل گۆر راپۆرتەکا تەلەفزیونا سی ئێن ئێن یا ئەمریکا سەرۆک وەزیرێن ئیسرائیلێ بنیامین نەتانیاھۆ بەرنامێ سەرەدانا خوە یا بۆ ئەمریکا و ھەڤدیتنێن ل گەل سەرۆکێ وی وەلاتی باراک ئۆبامای ھلوەشاندیە و د ڤێ دەربارێ دا ب فەرمی ژی چو داخۆیانی نەھاتینە دان و ئۆباما ئەو یەک ب رێیا دەزگەھێن راگەھاندنێ زانیە و ژ ھەلویستێ نەتانیاھۆی گەلەک دلگران بوویە.
د بەردەوامیا راپۆرتێ دا ھاتیە دیار کرن کو دڤیا سەرۆک وەزیرێن ئیسرائیلێ ب رێیا نوونەرێ خوە ل ئەمریکا ئەگەرێ ھلوەشاندنا ھەڤدیتنا ل گەل سەرۆکێ ئەمریکا گەھاندبا بەرپرسێن کۆچکا سپی و ب فەرمی ئەو ئاگەھدار کربان لێ ئەو یەک نەھاتیە کرن و راگەھاندنا ئیسرائیلێ تنێ دیار کرینە کو نەتانیاھۆ ل ھەڤدیتنا ١٨ ئادارێ ل ئەمریکا بەرھەڤ نابیت.
چاڤدێرێن سیاسی دیار دکەن کو سەرۆک وەزیرێن ئیسرائیلێ ژ بەر رێککەڤتنا د ناڤبەرا ئەمریکا و ئیرانێ دەربارێ بەرنامێ ئەتۆمی یێ وی وەلاتی گەلەک خەمگین بوویە و نەتانیاھۆ ئۆبامای وەک کەسێ ئێکێ دبینیت کو بوویە ئەگەر پێگەھێ ئیرانێ ل دەڤەرێ ب ھێز کەڤیت و ئەو یەک دێ مەترسیا خوە بۆ ئیسرائیلێ ھەبیت.
ل ئالیێ دی بەرپرسەکێ وەزارەتا دەرڤە یا ئیسرائیلێ ژی بۆ دەزگەھێن راگەھاندنێ دیار کریە کو بەر ھەوا ھەلبژارتنێن سەرۆکاتیێ ل ئەمریکا نەتانیاھۆی نەڤێت نھا سەرەدانا ئەمریکا بکەت.

ئەڤرۆ نیوز:

ئورۆپا ل ھەمبەر کریارێن ل دژی کوردان و ئاستەنگکرنا کارێن راگەھاندنا ئازاد رەخنەیێن دژوار ل دەستھەلاتدارێن تورکیا دگریت و د ڤێ چارچۆڤێ دا رۆژناما تایمز یا بریتانیا داخواز ژ ئێکەتیا ئورۆپا و ئەمریکا کر کو سنۆرەکێ بۆ بنپێکرنا مافێن مرۆڤان و زۆرداریا ل سەر راگەھاننێ داینن و ھۆشداری بدەنە تورکیا.
سەرۆک کۆمار و سەرۆک وەزیرێن تورکیا رۆژانە د رۆژەڤا دەزگەھێن راگەھاندنێن جیھانێ دانە و رۆژنامێن وەک زایدونگ یا ئەلمانیا، ئیل مانیفیستۆ یا ئیتالیا و تایمز یا بریتانیا د راپۆرتێن خوە دا سەرنج راکێشانە سەر رەوشا تورکیا و راگەھاندنا وی وەلاتی، چونکو ھەر چەندە تورکیا د ناڤ ھەڤپەیمانیا ئەتلانتیک (ناتۆ) دا جە دگریت لێ ب کریارێن خوە یێن دژوار ل دژی کوردان و دەزگەھێن راگەھاندنێ و رەوشەنبیران ژ بنەمایێن ناتۆ یێ دوور کەڤتیە و ئەردۆگان رۆژ ب رۆژێ ھەموو ئالی و کەسێن ئۆپۆزسیۆنێ ژناڤ دبەت و تورکیا بەر ب سیستەمێ دیکتاتۆریێ ڤە دبەت و بۆ ڤێ چەندێ دڤێت ئورۆپا سنورەکێ بۆ ئەردۆگانی و حوکمەتا تورکیا دانیت.
رۆژناما تایمز د راپۆرتەکێ دا بەحسێ رەوشا تورکیا و زۆرداریا ل دژی کوردان و دەزگەھێن راگەھاندنێ دکەت و دیار دکەت کو پەیوەندیێن تورکیا ل گەل داعشێ و کۆمێن سەر ب قاعیدە ڤە ھەنە و ئاشکرا دکەت کو ژ بەر بێدەنگیا ئەمریکا و ئورۆپا زۆرداریا ل دژی کوردان و ئالیێن ئۆپۆزسیۆنێ دژوارتر دبن و ءەردۆگان رۆژ ب رۆژێ دیمۆکراسیا تورکیا ژ ھۆلێ رادکەت و دخوازیت سیستەمێ تاکەکەسی بدەتە قەبوولکرن و بێدەنگیا وەلاتێن ئورۆپا ژی دەستێ ئەردۆگانی ب ھێزتر دکەت.
ھەر د ڤێ دەربارێ دا رۆژناما زایدونگ یا ئەلمانی ژی راگەھاندیە کو ھژمارەک زێدە رۆژنامەڤان و کەسایەتیێن سیاسی، رەوشەنبیر، مامۆستا و سەرۆکێن باژێرڤانیێن کوردان نھا د زیندانان دانە و سێ باژێرکێن کوردان ب تەمامی ھاتنە وێرانکرن و ب دەە ھزاران وەلاتیێن کورد کۆچبەر بووینە و مال و ژیانا وان ژ ئالیێ ھێزێن ئێمناھیێن تورکیا ڤە ھاتیە تالانکرن. د راپۆرتێ دا ژ ئورۆپا دھێتە خواستن کو ئێدی دەست ژ سیاسەتا دوور ژ راستیێ بەردەت و خوەدان ل بنەمایێن مافێن مرۆڤی و دیمۆکراسیێ دەرکەڤیت.
ھەر د ڤێ دەربارێ دا رۆژناما ئیل مانیفیستۆ یا ئیتالیا ژی د راپۆرتەکا بەرفرەە دا کو ل سەر رەوشا پەنابەرێن سووریێ، شەرێ ل دژی داعشێ و دوبارە دەستپێکرنا شەرێ کورد و تورکان دا ھاتیە نڤیساندن، راگەھاندیە کو پشتی دەستپێکرنا بھارا عەرەبی ئەردۆگانی و تورکیا وەسا باوەر دکرن کو دشێن گوۆرینێن ل رۆژھەلاتا ناڤین بکەنە ژێر کۆنترۆلا خوە و بەرژەوەندیێن خوە بجە بکەن و دوبارە ئیمپراتۆریا ئۆسمانیان زندی بکەن، لێ پلانا وان ب شکەستنا سیاسەتا دەرڤە و ناڤخوە ڤە گوھۆرینەکا مەزن ب خوە ڤە دیتیە و ئێدی ئەردۆگان دخوازیت دەستھەلاتا دادوەریێ، یا بجھکرنێ و برێڤەبرنێ ھەموویێ بکەتە ژێر کۆنترۆلا خوە و ل تورکیا ببیتە تاکە دەستھەلات.
رۆژناما ئیل مانیفیستۆ ژی وەک رۆژناما تایمز یا بریتانی د داویا راپۆرتا خوە دا داخواز ژ ئێکەتیا ئورۆپا و ئەمریکا و ناتۆ دکەت سنۆرەکێ بۆ تورکیا داینن و نەھێلن ئەردۆگان و حوکمەتا تورکیا زۆرداریێ ل کوردان و ئۆپۆزسیۆنێ بکەن.