CIA هوشداريێ دده‌ته قاسم سلێمانى
ئه‌ڤرۆ نيۆز:
رێڤه‌به‌رێ ئاژانسا هه‌والگيريا ناڤه‌ندى يا ئه‌مريكى CIA ئاشكراكر كو وى نامه‌كا بۆ فه‌رماندێ له‌شكرێ قودس يێ ئيرانى قاسم سلێمانى هنارتيه وتێدا به‌حسێ زێده‌بوونا گه‌فێن ئيرانێ ل عيراقێ دكه‌ت.
مايك بومبيۆ، رێڤه‌به‌رێ ئاژانسا هه‌والگيريا ناڤه‌ندى يا ئه‌مريكى CIA، دچارچۆڤێ سميناره‌كێ دا ل كوربه‌ندا ريگان يا به‌رگريێ يا سالانه ل باشوورێ ويلايه‌تا كاليفۆرنيا دياركر كو وى ئه‌و نامه بۆ سلێمانى هنارت، پشتى ئاخڤتنا فه‌رمانده‌كێ مه‌زن يێ له‌شكرێ ئيرانێ كو به‌حس ل وێ چه‌ندێ كربوو ئه‌و دێ فه‌رمانێ ده‌ته هێزێن خوه كو هێرشى هێزێن ئه‌مريكى ل عيراقێ بكه‌ن، بێ كو ژڤانه‌كى دياربكه‌ت.
مايكى گۆت ژى، دوێ نامێ دا مه بۆ سلێمانى دياركريه كو به‌رپرسياره‌تيا هه‌ر هێرشه‌كا ل سه‌ر به‌رژه‌وه‌نديێن ئه‌مريكى ل عيراقێ دهێته كرن ژلايێ هێزێن دبن فه‌رمانێن ئيرانێ ڤه، دێ ئێخينه ستوويێ ئيرانێ وقاسم سلێمانى.
دياركر، مه ب وێ نامێ خوازت سلێمانى وئيران وێ چه‌ندێ ب باشى وب رۆهنى وه‌كو رۆناهيا تاڤێ تێبگه‌هن.
به‌لێ رێڤه‌به‌رێ ئاژانسا هه‌والگيريا ناڤه‌ندى يا ئه‌مريكى CIA ئاماژه دا كو قاسم سلێمانى قه‌بوول نه‌كر ناما وى ڤه‌كه‌ت وبخوينيت.
خوياكر ژى، بزاڤێن ئيرانى دهه‌فتيێن بۆرى دا بۆ به‌رفره‌هكرنا ده‌ستهه‌لاتا خوه ل باكوورێ عيراقێ وده‌ڤه‌رێن دى، وي چه‌ندێ دووپات دكه‌ت كو ئيران دخوازيت ييته هێزا ده‌ستهه‌لاتدار ل رۆژهه‌لاتا ناڤين.
