PKK: چو پرسگرێک د ناڤبەرا مە و پارتیێ دا نینن
بەرپرسەکی PKK راگەھاند کو چ پرسگرێک د ناڤبەرا وان و PDK دا نینن و دیار کر کو گەلەک ئاساییە د بەرنامە و فەلسەفە و دیتنا پارتێن کوردستانی دا جوداھی ھەبیت و ئەڤ ژی تشتەکی گەلەک ئاساییە و گۆت: (ئەم ب چاڤەکی براتی ل ھەمو پارتێن کوردی دنێرین و دوبارە ژی دکەم کو ژ ئالیێ مە ڤە چو ھزرەکی نە باش ل دژی پارتی دیموکراتی کوردستان و پارتێن دی یێن کوردی نینن).
ئەڤرۆ:
پشتی سەرەدانا شاندێ پارتا دیمۆکراسیا گەلان HDP بۆ قەندیلێ ئدریس بالوکەن ئەندامێ شاندێ د داخۆیانیەکی تایبەت دا بۆ رۆژناما ئەڤرۆ راگەھاند کو ل گەل سەرکردەیێن PKK ل قەندیلێ ل سەر رەوشا گشتی یا کوردستانێ، قۆناغا ئاشتیێ و بەرخوەدانا ل کۆبانێ و شنگالێ ئاخڤینە و گۆت: (بەرپرسێن کۆما جڤاکێن کوردستانێ یانکۆ پارتا کارکەرێن کوردستانێ ئاشکرا کرن کو ئەو ل دووڤ نەخشەرێیا ئۆجەلانی کار دکەن و بۆ وێ چەندێ ب رەنگەکی گەلەک ھەستیار نێزیکی قۆناغێ دبن لێ حوکمەتا تورکیا رژدە د پێنگاڤ نە ئاڤێتنێ دا و ئەڤ ژی دبیتە سەدەمێ ئالۆزیان و دبیتە ئاستەنگ ل ھەمبەر چارەکرنا پرسا کوردی و سەرکەڤتنا قۆناغا ئاشتیێ دا).
سەبارەت ب روودانێن ل جزیرێ ژی ناڤھاتی راگەھاند کو ھەکە حوکمەتا تورکیا بەرپرسیارێن کوشتنا زارۆیێن کورد ئاشکرا نەکەت ئەو دێ حوکمەتێ وەک بەرپرسێ کوشتنان ببینن و گۆت: (گەلێ کورد ب ھشیاری نێزیکی قۆناغا ئاشتیێ دبیت لێ حوکمەتا تورکیا ب کریارێن خوە یێن دوور ژ قۆناغا ئاشتیێ ڤە ئالۆزیان دروست دکەت و ئەڤە ژی خزمەتا پێشڤەچوونا قۆناغا ئاشتیێ ناکەت و ژ بەر ڤێ چەندێ دڤێت د زووترین دەم دا کوشتارێن زارۆیێن کورد بھێنە ئاشکرا کرن و ئۆپەراسیۆنێن گرتنا لاوێن کورد بھێتە راوەستاندن و پێنگاڤ بھێتە ئاڤێتن).
د ڤان رۆژێن داوی دا ب دەستپێشخەریا دەولەتێن تورکیا، ئیران و وەلاتێن عەرەب د راگەھاندنێن وان وەلاتان دا نووچەیێن وەسا دھێنە بەلاڤکرن کو گۆیا PKK و PDK دۆژمنێن ھەڤدو نە، د ڤێ دەربارێ دا ل سەر پەیوەندیێن PKK و PDK ژی ئدریس بالوکەن دیار کر کو بەرپرسێن PKK راگەھاندن کو دەزگەھێن راگەھاندنێن تورکیا، ئیرانێ و یێن عەرەبی ب زانەبوون دخوازن پارتێن کوردی وەک دۆژمنێن ھەڤدو نیشا بدەن و گۆت: (چو پرسگرێک د ناڤبەرا مە و PDK دا نینن و گەلەک ئاساییە ھزر و دیتنێن مە و خواندنا مە د دەربارێ روودان و پاشەرۆژێ دا ژ ھەڤ جودا بن و ئەڤ ناھێتە واتەیا کو ئەم ل دژی ھەڤدو نە و جارەکا دی دوپات دکەم کو چ پرسگرێکا مە ل گەل چو پارتەکا کوردستانی نینە).
ئدریس بالوکەن ئەندامێ پەرلەمانێ تورکیا دیار ژی کر کو ل سەر رەوشا کۆبانێ و شنگالێ ژی سەرکردەیێن PKK ل قەندیلێ راگەھاندینە بەرخوەدانا گەلێ کورد ل دژی تیرۆرستێن داعشێ بەرخوەدان و قەھرەمانیەکا دیرۆکیە و دڤێت زێدەتر د ناڤبەرا ھێزێن کوردی ھەماھەنگی ھەبیت و گۆت: (ژ کەرکووکێ ھەتا شنگال و کۆبانێ لاوێن شەرڤان و پێشمەرگەیێن کورد د یەک سەنگەری دانە و دەمێ وێ یەکێ ھاتیە ھێزەکا مەزنا نەتەوی یا ھەڤپشک بۆ پاراستنا کوردستانێ بھێتە دروستکرن و ھێرشێن داعشێ و نێزیکبوونێن دەولەتێن داگیرکەر ڤێ یەکێ دسەلمینن کو ئێدی دەم دەمێ ئاڤاکرنا ھێزا سەربازی یا نەتەوییە).
ئدریس بالوکەن د دووماھیا ئاخڤتنا خوە دا ژی راگەھاند کو ئەو دێ د دەمەکی نێزیک دا جارەکا دی سەرەدانا زیندانا ئیمرالی بکەن و ل گەل سەرۆکێ PKK ھەڤدیتنەکی ساز بکەن و گۆت: (د ڤان رۆژان دا ئەم دێ ھەم ل گەل بەرپرسێن حوکمەتێ و ھەم ژی ل گەل ھندەک سازیێن سڤیل ل سەر نەخشەرێیا چارەکرنا پرسا کوردی گەنگەشە بکەین و پاشی ژی ئەنجامێن وان ھەڤدیتنا ل گەل ئۆجەلان ب ئاخڤین و ھزرا وی بۆ پێشکەڤتن و سەرکەڤتنا قۆناغێ وەربگرین و بگەھیننە جھێن پەیوەندیدار).
