UN و ئەمریکا: دڤێت روسیا و تورکیا ھێزێن خوە ژ لیبیا ڤەکێشن
ب، سەرجان مەحمود:
ئانتۆنیۆ گوتریش سکرتێرێ گشتی یێ نەتەوێن ئێکگرتی راگەھاند کو ھەبوونا ھێزێن بیانی و چەکدارێن کو ژ دەرڤە ھاتنە لیبیا سەدەمێ سەرەکی یێ بەردەوامیا ئالۆزیانن و دڤێت بێی مەرج ژ ئاخا لیبیا دەرکەڤن و گۆت: (د رەوشا نھا دا ل لیبیا ئاگربەست بەردەوام دکەت و ھەر دو ئالیێن لیبیا ب ھەڤکاری و ناڤبژیڤانیا ھێزێن نێڤدەولەتی ھەڤدیتنێن خوە برێڤە دبەن و رۆژ ب رۆژێ پتر نێزیکی ئاشتیێ دبن و نھا دەمێ ھندێ ھاتیە ھەموو ھێزێن بیانی و چەکدارێن ب پارە ژ ئاخا لیبیا دەرکەڤن و رێزێ ل سەروەریا لیبیا بگرن).
ناڤھاتی ھەروەسا راگەھاند ژی کو ئالیێن سیاسی یێن لیبیا د ڤان چەند مەھێن دەربازبوویی دا سەلماندن کو دشێن پرسگرێکێن خوە ب دیالۆگێ چارەسەر بکەن و گۆت: (جڤاتا ئێمناھیا نەتەوێن ئێکگرتی د روونشتنا خوە دا بریارەکا گرنگ دا و ئەڤ بریارە بۆ ئاشتی و پێکڤەژیانا گەلێن لیبیا رێک خوەش دکەت و د ڤان مەھێن دەربازبوویی دا ئالیێن سیاسی و ھەر دو دەستھەلاتێن لیبیا بۆ ھەموو جیھانێ سەلماندن ھەکە ھێزێن بیانی و چەکدارێن کو ژ دەرڤە ب پارە ھاتینە لیبیا بھێنە دەرخستن ئەو دشێن بێی شەر و ب دیالۆگێ پرسگرێکێن د ناڤبەرا خوە دا چارەسەر بکەن).
ھەر د ڤێ مژارێ دا ریچارد مالس بالیۆزێ ئەمریکا ل نەتەوێن ئێکگرتی بۆ رۆژنامەڤانان راگەھاند کو ئەو داخواز ژ روسیا، تورکیا، ئیماراتێ و ھەموو ھێزێن دی یێن بیانی دکەت کو ب لەز ژ ئاخا لیبیا دەرکەڤن و گۆت: (دەستێوەردانێن تورکیا، روسیا و ئیماراتێ سەدەمێ سەرەکی یێ ئالۆزیێن ل لیبیا نە و دڤێت ئێدی دەستێوەردانێ نەکەن و ھێزێن خوە ژ لیبیا دەرخینن و پشتەڤانیا دیالۆگا د ناڤبەرا حوکمەتێن ترابلوسێ و تۆبروکێ یێن لیبیا بکەن کو دخوازن ب دیالۆگێ پرسێن د ناڤبەرا خوە دا چارەسەر بکەن و ئێکگرتنا وەلاتێ خوە دروست بکەن).
وەزیرێ دەرڤە یێ مسرێ ژی راگەھاند کو بریارا نەتەوێن ئێکگرتی یا د دەربارێ دەرخستنا ھێزێن بیانی ژ لیبیا گەلەک گرنگە و د رەوشا نھا دا ھەڤدیتنێن د ناڤبەرا ھەر دو ئالیێن لیبیا ب رەنگەکی ئەرێنی بەردەوام دکەن و ب دەرکەڤتنا ھێزێن بیانی دێ قۆناغا دانوستاندنان ب رەنگەکێ باشتر برێڤە چیت و نھا چ ئالیەک ھەبوونا ھێزێن بیانی د ناڤ ئاخا لیبیا دا قەبوول ناکەت.
