UN په‌سنا رۆلێ سه‌رۆك بارزانى د شه‌رێ تیرۆرستێن داعشێ دكه‌ت
ئه‌ڤرۆ نیوز:
سه‌رۆك مه‌سعود بارزانى ئه‌ڤرۆ سێشه‌مبى 18/6/2019 پێشوازى ل كه‌ریم ئه‌سعه‌د ئه‌حمه‌دخان هاریكارێ شره‌تكارێ تایبه‌تێ سكرتێرێ گشتیێ رێكخراوا نه‌ته‌وێن ئێكگرتى بۆ ڤه‌كۆلینێ ل تاوانێن داعشێ وشاندكه‌كێ دگه‌لدا كر.
ل دیداره‌كێ دا شانددێ مێهڤان په‌سنا رۆلێ سه‌رۆك بارزانى د شه‌رێ تیرۆرستێن داعشێ كر وپێزانین هه‌بوون بۆ قه‌هره‌مانی وقوربانیدانا هێزا پێشمه‌رگه‌ى د شكاندنا تیرۆرستێن داعشێ دا.
هاریكارێ شیره‌تكارێ تایبه‌تێ سكرتێرێ گشتیێ نه‌ته‌وێن ئێكگرتى، سه‌رۆك بارزانى ل دۆر ئه‌رك وكارێ خوه ئاگه‌هداركر كو ژلایێ سكرتێترێ گشتیێ نه‌ته‌وێن ئێكگرتى پێ هاتیه راسپاردن بۆ ڤه‌كۆلینێ ل تاوانێن داعشێ وده‌ستپێكرنا پرۆسا دادگه‌هكرنا وان داعشێن ده‌ست د تاوانان دا هه‌بوو.
داخواز كر ژى كو لایه‌نێن په‌یوه‌ندیدار ل هه‌رێما كوردستانێ وعیراقێ هاریكاری تیما نه‌ته‌وێن ئێكگرتى بن، هه‌روه‌سا راگه‌هاند كو د وى ئه‌ركى دا پێدڤى ب شیره‌ت ورێنمایێن سه‌رۆك بارزانى یا هه‌ى.
ژ لایێ خوه‌ڤه سه‌رۆك بارزانى زێده‌بارى پێزانینێن خوه بۆ وێ بریارا نه‌ته‌وێن ئێكگرتى، ب ئه‌ركه‌كێ پیرۆز هژمارت وپشته‌ڤانیا خوه بۆ وێ گاڤێ راگه‌هاند ژبۆ دادگه‌هكرن وسزادانان تاوانبارێن داعش.
سه‌رۆك بارزانى ئاماژه ب قوربانیدانا گه‌لێ كوردستانێ وپێشمه‌رگه‌ى دا ل شه‌رێ دژى تیرۆرستان ودووپات كر كو سه‌ره‌راى هه‌موو وان نه‌هامه‌تیێن ب سه‌ر گه‌لێ كوردستانێ هاتین، گه‌لێ كوردستانێ ژ بۆ ڤه‌كرنا به‌رپه‌ره‌كێ نوو وئاشتیێ دا چو جاران په‌نا بۆ تولڤه‌كرنێ نه‌بریه.
هه‌روه‌سا سه‌رۆك بارزانى رۆناهى خسته سه‌ر گه‌فێن داعشێ وراگه‌هاند” راسته داعش ژ روویێ له‌شكرى ڤه هاتیه شكاندن، به‌لێ گه‌فێن داعشێ هه‌ر یێن ماین ووان گه‌فان هه‌موو جیهان كریه ئارمانج”.
گۆت ژى” ئارمانجا تیرۆرێ دروستكرنا ناكۆكیێ ودژایه‌تیێ د ناڤبه‌را ئاینایه، ئه‌وژى بابه‌ته‌كێ مه‌ترسیداره، له‌وما روو ب رووبوونا وێ گه‌فێ وبزاڤ وهه‌ماهه‌نگیا هه‌مه‌لایه‌نا نێڤده‌وله‌تى یا پێدڤیه”.
