WHO ل ديدارا نێچيرڤان بارزانى په‌سنا ساخله‌ميا دهۆكێ دكه‌ت
ئه‌ڤرۆ نيوز:
رێڤه‌به‌رێ گشتيێ رێكخراوا ساخله‌ميا جيهانى WHO راگه‌هاند كو رێڤه‌به‌ريا گشتيا ساخله‌ميا پارێزگه‌ها دهۆكێ شيايه د سه‌ر وان كاودانێن دژوار يێن ل سه‌ر ملێ وان دا، ب ره‌نگه‌كێ رێك و پێك خزمه‌تگۆزاريێن نوشدارى پێشكێشى ئاواران و په‌نابه‌ران ل كه‌مپێن وه‌لاتيان ب ره‌نگه‌كێ گشتى بكه‌ت.
به‌رى نيڤرۆيا ئه‌ڤرۆ ئێكشه‌مبى رێكه‌فتى 15\3\2015، نێچيرڤان بارزانى، سه‌رۆكێ حوكمه‌تا هه‌رێما كوردستانێ، پێشوازى ل رێڤه‌به‌رێ گشتيێ رێكخراوا جيهانى يا ساخله‌ميێ WHO د. عه‌لاء عه‌لوان و شانده‌كێ ل گه‌ل دا كر.
د ديداره‌كێ دا رێڤه‌به‌رێ گشتيێ WHO هه‌لسه‌نگانده‌ك دا كاودانێن ساخله‌ميێ ل هه‌رێما كوردستانێ و ئاماژه ب كار و بزاڤێن وه‌زاره‌تا ساخله‌ميێ ب گشتى و رێڤه‌به‌ريا گشتيا ساخله‌ميا پارێزگه‌ها دهۆكێ ب تايبه‌تى كر و رۆلێ وه‌زاره‌ت و رێڤه‌به‌ريا گشتيا ساخله‌ميا دهۆكێ بلند وه‌سفكر كو د سه‌ر وان كاودانێن دژوار يێن ل سه‌ر ملێ وان، شياينه ب ره‌نگه‌كێ رێك و پێك و د هه‌مان ده‌م دا خزمه‌تگۆزاريێن نوشدارى پێشكێشى ئاواران و په‌نابه‌ران ل كه‌مپێن وه‌لاتيان ب ره‌نگه‌كێ گشتى بكه‌ن.
رێڤه‌به‌رێ گشتيێ WHO هه‌ر وه‌سا رونى خسته سه‌ر وان بزاڤێن به‌رده‌وام يێن ئه‌و دكه‌ن ژ بوو ب ده‌ستڤه‌ئينان و پێشكێشكرنا ژێده‌رێن زێده‌تر يێن هاريكاريان بۆ هه‌رێما كوردستانێ د وارێ ساخله‌ميێ دا و رون ژى كر كو د ديدار و كۆمبوونێن خوه دا ل گه حوكمه‌تا فيدرالا عيراقێ دا به‌حس ل كار و چالاكيێن حوكمه‌تا هه‌رێما كوردستانێ و وه‌زاره‌تا ساخله‌ميێ هاتيه كرن كو بێ جوداهى خزمه‌تێ ب هه‌موو لايان دگه‌هينن و ته‌كست ل سه‌ر وێ چه‌ندێ دكه‌ن كو هه‌رێما كوردستانێ پێدڤى ب هاريكارييێن زێده‌تره و داخواز ژ حوكمه‌تا فيدرال كريه هاريكاريا زێده‌ترا ساخله‌مى و نوشدارى پێشكێشى هه‌رێما كوردستانێ بكه‌ن.
ژ لايێ خوه ڤه، سه‌رۆكێ حوكمه‌تا هه‌رێما كوردستانێ سۆپاسيا سه‌ره‌دانا رێڤه‌به‌رێ گشتيێ WHO كر و سۆپاسيا هه‌لسه‌نگاندنا وان بۆ كار و چالاكيێن وه‌زاره‌تا ساخله‌ميێ و رێڤه‌به‌ريا گشتيا ساخله‌ميا پارێزگه‌ها دهۆك كرى، كو د بزاڤێن به‌رده‌وام دانه بۆ پێشكێشكرنا خزمه‌تگۆزاريێن ساخله‌مى و نوشدارى بۆ ئاواره و په‌نابه‌ران ل كه‌مپێن سه‌رانسه‌رى پارێزگه‌ها دهۆكێ و به‌رده‌وام دڤێت ب ره‌نگه‌كێ رێك و پێك هاريكاريێن باشتر و زێده‌تر بكه‌ن.
ديسا نێچيرڤان بارزانى سۆپاسيا رێكخراوا WHO كر بۆ وێ هه‌ڤكارى و هه‌ماهه‌نگيا ل گه‌ل ده‌زگه‌هێن په‌يوه‌نديدار د وارێن ساخله‌مى و نوشدارى دا ل هه‌رێما كوردستانێ پێشكێش كرى.
