ژ ئه‌گه‌رێ جینۆسایدا شنگالێ هزار و 293 كه‌س شه‌هید بووینه
دهۆك، له‌زگین جوقی:
به‌رپرسێ نڤیسینگه‌ها رزگاركرنا ره‌ڤاندیێن ئێزدی دیار كر، ژ سه‌رجه‌مێ سێ هزار و 548 كچ و ژن و زارۆیێن ئێزدی یێن ژ لایێ تیرۆرستێن داعشێ ڤه ل ساله 2014ێ هاتینه ره‌ڤاندن، هه‌تا نوكه هزار و 207 كچ و ژن و زارۆ هاتینه رزگاركرن و دو هزار و 869 زه‌لام ژی هاتبوونه ره‌ڤاندن و بێ سه‌روشوونكرن، ژ وان ژی هه‌تا نوكه 339 زه‌لام رزگاربووینه.
حسێن قائیدی، به‌رپرسێ نڤیسینگه‌ها رزگاركرنا ره‌ڤاندیێن ئێزدی بۆ رۆژناما ئه‌ڤرۆ گۆت: ” د ده‌مێ جینۆسایدا شنگالێ دا ل ساله 2014ێ پتر ژ شه‌ش هزار و 417 كه‌سێن ئێزدی ژ هه‌ردو ره‌گه‌زان و زارۆ و مه‌زنان هاتبوونه ره‌ڤاندن، ژ وانا ژی سێ هزار و 548 كچ و ژن و زارۆ بوون و دو هزار و 869 ژی زه‌لام بوون، هه‌تا نوكه سێ هزار و 553 كه‌س ژ هه‌ردو ره‌گه‌زان هاتینه رزگاركرن ژ وانا ژی هزار و 207 كچ و ژنن و 339 زه‌لامن، دیسا هزار و 51 زارۆیێن كچن و 956 زارۆیێن كوڕن و 146 ره‌ڤاندیێن ئێزدی ژی هاتینه شه‌هیدكرن، دیسا هه‌تا نوكه چاره‌نڤیسێ دو هزار و 718 كه‌سان یێ دیار نینه، ژ وانا ژی هزار و 273 كچ و ژنن و هزار و 445 زه‌لامن”.
ئاشكرا ژی كر، 29 كه‌سێن ئێزدی ژ ناڤ گۆڕێن ب كۆم ب ساخی رزگاربووینه و 68 مه‌زارگه‌هێن ئێزدیان ژی هاتبوونه په‌قاندن، دیسا ژ ئه‌نجامێ جینۆسایدا شنگالێ هه‌تا 100 هزار كه‌سێن ئێزدی چووینه ژ ده‌رڤه‌ی وه‌لاتی.
ناڤهاتی گۆت: “ژ ئه‌گه‌رێ جینۆسایدا شنگالێ هزار و 293 كه‌س شه‌هیدبووینه و دو هزار و 745 زارۆك بووینه ئێتیم، هه‌تا نوكه لێگه‌ڕیان ل سه‌ر رزگاركرنا ره‌ڤاندیێن ئێزدی یا به‌رده‌وامه، دیسا هه‌تا نوكه ل شنگالێ 83 گۆڕێن ب كۆم یێن هاتینه دیتن و ب ده‌هان گۆڕێن تاكه كه‌سی ژی هاتینه دیتن”.
