گوهۆڕین د رێڤه‌به‌ریێن نوو یێن گشتی ل زاخۆ دێ هێته كرن
زاخۆ، عه‌لی حاجی:
د رێوره‌سمه‌كێ تایبه‌ت دا ب ئاماده‌بوونا گوهدار شێخۆ، سه‌رپه‌رشتێ ئیداره‌یا سه‌ربخوه یا زاخۆ پۆستێ سه‌رۆكێ باژێرڤانیا زاخۆ هاته گوهۆڕین و یونس محه‌مه‌د ل جهێ وه‌لات سه‌عدی هاته دانان.
گوهدار شێخۆ، سه‌رپه‌رشتێ ئیداره‌یا سه‌ربخوه یا زاخۆ د كۆنفرانسه‌كێ رۆژنامه‌ڤانی دا دیار كر، بڕیاره د ده‌مه‌كێ نێزیك دا گوهۆڕین د وان رێڤه‌به‌ریان دا بهێنه كرن، ئه‌وێن ژ نوو بووینه رێڤه‌به‌ریێن گشتی و رێڤه‌به‌ریێن نوو ل ئیداره‌یا سه‌ربخوه یا زاخۆ هاتینه دانان بهێنه كرن و گۆت: “باژێرڤانیا زاخۆ بۆ مه ئێك ژ گرنگترین رێڤه‌به‌ریایه، ژ به‌ركو راسته‌وخوه ب خه‌لكێ ڤه گرێدایه، گوهۆڕینا سه‌رۆكێ باژێرڤانیێ ل سه‌ر وێ چه‌ندێ بوو، پشتی چه‌ندین هه‌لسه‌نگاندن هاتینه كرن، دیار بوو یونس محه‌مه‌د كه‌سه‌كێ سه‌ركه‌ڤتی بوو د رێڤه‌برنا رێڤه‌به‌ریێ دا، له‌و مه ل جهێ كاك وه‌لات سه‌عدی دانا”.
گۆتژی: “هنده‌ك كه‌سێن نوو، كو ژ نوو دێ بنه رێڤه‌به‌ر و دگه‌نجن ل زاخۆ وه‌كو رێڤه‌به‌ر دێ هێنه دانان و هنده‌ك ژی دكه‌ڤنن، ئارمانجا مه یا سه‌ره‌كی ژگوهۆڕینان ئه‌وه، زێده‌تر خزمه‌تا خه‌لكی بهێته كرن و ئاستێ خزمه‌تگوزاریان باشتر لێبهێت”.
ناڤبری زێده‌تر گۆت: “ده‌مه‌كه ئه‌م ل گه‌ل وه‌زیرێ ناڤخوه ل سه‌ر خه‌تین، داكو بشێین باتێلێ بێخینه سه‌ر ب ئیداره‌یا سه‌ربخوه یا زاخۆ ڤه، بڕیار ل سه‌ر هاتیه دان، كو بكه‌ڤیته سه‌ر ب زاخۆ ڤه و ب تنێ هنده‌ك كارێن ئیداریێن بچووك ماینه و د ده‌مه‌ك نێزیك دا باتێل دێ كه‌ڤیته سه‌ر ب ئیداره‌یا سه‌ربخوه یا زاخۆ ڤه”.
