ب بەرهەڤبوونا سەربەست لەزگین پرتووكا شەهید عەبدولخالق سپینداری هاتە بەلاڤكرن
ب بەرهەڤبوونا سەربەست لەزگین، ئەندامێ مەكتەبا سیاسی و بەرپرسێ مەكتەبا رێكخستنا پارتی ل پارێزگەها دهـۆكێ و حەمید عەلی و سەباح بەیتوللا، هاریكارێن بەرپرسێ مەكتەبێ و هەژمارەكا بەرچاڤ یا كەسایەتیێن ئولی و جڤاكی یێن دەڤەرێ و مالباتا شەهیدی، ل رۆژا 30/9/2024 د رێورەسمەكێ ژ هە ژی دا سالڤەگەڕا شەهید عەبدولخالق مەلا حەسەن سپینداری ل هۆلا كۆنفرانسان ل زانكۆیا دهۆکێ كێ هاتە ساخكرن و پرتووكەك ل سەر ژیان و خەباتا شەهیدی هاتە بەلاڤكرن.
سەربەست لەزگین، بەرپرسێ مەكتەبا رێكخستنا پارتی ل پارێزگەها دهـۆكێ د رێورەسمێن بەلاڤكرنا پرتووكا شەهید عەبدولخالق مەلا حەسەن سپینداری دا پەیڤەك پێشكێش كر و تێدا بەحسێ خەبات و قوربانیدانا شەهید «عەبدولخالق مەلا حەسەن سپێداری» و مالباتا وی یا تێكۆشەڕ د ناڤ بزاڤا رزگاریخوازیا كوردستانێ دا كر و گۆت: «شەهید عەبدولخالق سپینداری هەر د ژییێ گەنجاتیێ دا رەنگڤەدان و زیرەكی و رحسڤكیا وی د ناڤ پێشمەرگەیی دا جهـێ خۆ گرتبوو، پێشمەرگەیەكێ گەلەكێ دیار و كاریگەر بوو، خەبات و دلسۆزیا وی و مالباتا وی نموونەیەك بوو ل دەڤەرا بەهدینان، دەما ناڤێ شەهیدێن ناڤدارێن كوردستانێ دهێن ناڤێ شەهید عەبدولخالق سپینداری د گەل دا دهێت «.
سەربەست لەزگین د پەیڤا خۆ دا ئاشكرا كر، خیانەتا ل سالا ١٩٦٦ دەستپێكری، هەتا ئەڤرۆ یا بەردەوامە و بوویە ئەگەرەكێ بهێز، كو چەندین سالە ئەوا د دلێ مە هەمیان دا نەهـاتیە جهـ و گۆت: «ئەم سەرێ رێزێ بۆ خۆڕاگریا مالباتا شەهید عەبدولخالق سپینداری و تەڤایا شەهیدێن كوردستانێ دچەمینین».
شەهید عەبدولخالق مەلا حەسەن سپینداری ل سالا 1941 ژ بنەمالەكا دیندار و كوردپەروەر ل گوندێ سپینداری ل دەڤەرا بەرواری ژێریا ژ داكبوویە. خواندنا خۆ یا سەرەتایی هەر ل گوندێ سپیندارێ تمامكریە، بۆ بەردەوامیدان ب خواندنێ قەستا باژێرێ دهۆكێ كریە و هەتا قووناغا سێیێ ناڤنجی خواندیە، پاشی چوویە د ناڤ رێزێن ئێكەتیا قوتابیێن كوردستانێ دا، ژ بەر هەستێ وی یێ نشتمان پەروەری پەیوەندی ب شۆڕەشێ كر و بوویە پێشمەرگە.
شەهید عەبدولخالق مەلا حەسەن سپینداری پێشمەرگەیەكێ دلسۆز و وێرەك و زیرەك بوو، لەو بوویە جهێ باوەریا بارزانیێ نەمر و ناسناڤێ زیرەك پێ بەخشی. شەهیدی هەڤالینیەكا باش ل گەل شەهید ئدریس بارزانی و سەرۆك مەسعود بارزانی هەبوو.
شەهید عەبدولخالق مەلا حەسەن سپینداری ل سالا 1966 ل دەڤەرا سەنگەسەر هاتیە شەهیدكرن و ب ئێكەم شەهیدێ قوتابی و لاوێن دیموكراتا كوردستانێ دهێتە دانان، پاشی برایێن وی بەردەوامی دایە رێبازا وی دەست ب خەباتێ كریە، دیسا دو برایێن وی یێن دی بناڤێ (ئەحمەد مەلا حەست سپێنداری و عەبدوللا مەلا حەسەن سپێنداری) شەهیدبووینە و هەتا نوكە ژی مالباتا وی ل سەر هەمان رێك و رێباز د ناڤ رێزێن پارتی دا یا بەردەوامە.
