ئەحمەد خەلەف: دڤێت یاریزان ل خوە بزڤڕن و دبەرپرسیارەتیێ ب گەهن
د پرێسكۆنفرانسێ رۆژنامەڤانی یێ پشتی یارییا تیما یانەیا دهۆك دگەل یانەیا ئەمانەت بەغدا ئەوا تیما دهۆكێ تووشی خوسارەتیێ بووی ب 2-1 گۆلان، ڕاهێنەرێ تیمێ ئەحمەد خەلەف ژ یاریزانێن خوە توورەیە و هەڤدەم دا نەبوونا چەنسی ئەگەرێ ڤی ئەنجامی دا دیاركرن.
زێدەتر ئەحمەد خەلەفی گۆت: ل دەستپێكێ داخوازا لێبۆرینێ ژ پشتەڤانێن یانەیێ دكەین تایبەت ئەوێن هاتینە بەغدا، خوسارەتیەكا دل ئێشە، سەرباری تیما مە كۆنترۆلا یاریێ كربوو د ماوەیێ هەردو نیڤان دا لێ نەبوونا چەنسی ژی ئەگەرەك بوو سەركەڤتنێ ژ دەست بدەین، دبەرانبەر دا ب شاشیێن هێلا بەرەڤانیێ گۆل ل سەر تیما مە هاتە تۆماركرن.
ژلایەكێ دووڤە ناڤهاتی گۆت: ژ ئاستێ یاریزانێن خوە د ڕازی نینن و هندەك كێماسی هەنە دێ هەموو بزاڤان كەین چارەسەر بكەین، لێ یا گرنگ دڤێت یاریزان ل خوە بزڤریت و بەرپرسیارەتیا خوە ب زانیت دناڤ یاریگەهێ دا ژبۆ ڤەگەڕاندنا سەركەڤتنان، یارییا بهێت دێ بزاڤێ كەین باشترین شێوە بەرهەڤبین ژبۆ ڤەگەراندنا ڕێزبەندیەكا باش.
بۆ زانین پشتی بۆرینا گەرا 28ێ دا ژ هەڤڕكیێن خولێ تیما یانەیا دهۆك ل ڕێزا 12ێ دهێت ب شێوەیێ بەروەخت ب كۆمكرنا 37 خالان ژ 10 سەركەڤتن، حەفت وەكهەڤی و 11 خوسارەتی هەنە، یاریزانێن وێ 29 گۆل تۆماركرینە لێ 30 گۆل ل سەر هاتینە تۆماركرن
