تازەپێگەهشتیێن پیرس هیڤییەك مایە بۆ یارییا دووماهیێ
شاهۆ فەرید:
چاڤەڕێ دهێتە كرن ل پێنج شەمبییا بهێت تیما تازەپێگەهشتێن یانەیا پیرس د دووماهی دەلیڤەیا خوە دا یارییا دویی بەرانبەر یانەیا پیشەسازی بكەت ژبۆ دەربازبوون بەر ب یارییا دووماهییا خولا كوردستانێ ل بن 17 سالی دا، ئەوا دێ ل ژ چارچووڤەیێ قۆناغا چارگۆشەیا زێرین ل یاریگەها خوە ئەنجامدەت.
یادگار یونس راهێنەرێ تیما پیرس بۆ رۆژنامەیا ئەڤرۆ دیاركر یارییا بهێت یا رۆژا پێنج شەمبیێ ئێكلاكەرە بۆ دەربازبوون بەر ب یارییا دووماهییا خولا كوردستانێ، د یارییا ئێكێ یا هاتنێ دگەل پێشەسازی ئەم ب دو گۆلان بێ بەرانبەر تووشی خوسارەتیێ بووین، بۆ ڤێ یاریێ دڤێت زێدەتر سێ گۆلان سەركەفتنێ بینن و ئەو چ گۆلان نەكەن، لەوما ژی پلانەكا دارێشتی دانایە كو هەموو یاریزان بۆ ڤێ یاریێ بەرهەڤبن، د یارییا بۆری دا یاریزانێن مە د رۆژا خوە دا نەبوون و ئەوا دەستەكا كادرێ راهێنانێ ژێ دڤیایی دەستڤە نە هات، هەرچەندە تیما مە ئاستەكێ باش نیشان دا لێ كێماسی د ناڤ یاریگەهێ دا پەیدابوون.
هەروەسان ناڤهاتی گۆت: یا گرنگ و د پلانا مە دا بەری یاریێ ئەم كار ل سەر دكەین ئەو ژی ئارامكرنا دەروونی یا یاریزانایە لەوما ژی دێ ب شێوەكێ جودا بەرهەڤیێن خوە كەین و ئەو شاشیێن د یارییا بۆری دا بۆ یارییا بهێت دۆبارە نەبیت و كار ل سەر خالێن لاوازییا تیما بەرانبەر بكەین و ب كەینە دەلیڤە بۆ سەركەفتنێ، ئەم بێ هیڤی نە بووینە و هێشتا 90 خولەكێن دی یێن یاریێ ماینە و مە باوەرییەكا باش ب شیانێن یاریزانێن خوە هەنە بشێن ئەنجامی ب گوهۆڕین و یاریزانێن مە شیانێن باش هەنە و دێ شێن پلێتا دەربازبوونێ ب دەستڤە ئینن.
