ئەوقافا دهۆكێ بەلاڤكرنا شریناهیان د دەمێ بەهیان دا قەدەغە دكەت
دهۆك، دلۆڤان ئاكرەیی:
رێڤەبەرێ گشتی یێ ئەوقافا پارێزگەها دهۆكێ دیاركر، بەلاڤكرنا بەقلاوە، قەهوێ و خورمایێ د دەمێ ب رێڤەچوونا بەهیان دا ل سنۆرێ پارێزگەها دهۆكێ قەدەغەیە.
مامۆستا سەرمەد ئالیخان، رێڤەبەرێ گشتی یێ ئەوقاف و كاروبارێن ئایینی ل پارێزگەها دهۆكێ بۆ رۆژنامەیا ئەڤرۆ گۆت: «ب چو ئاوایەكی رێك ناهێتەدان، خودانێن بەهیان ستافان بگرن بۆ وێ چەندێ، كو ل هۆلێن تازیان شریناهیان بەلاڤ بكەن، ژبلی ئاڤێ چو تشتێ دی ناهێتە بەلاڤكرن».
گۆت ژی: «مە هۆشداری دایە شیرینیخانەیان، كو ستافان نەهنێرنە هۆلێن بەهیان و شریناهیان بەلاڤ نەكەن، چونكو مزگەفت جهەكێ پیرۆزە بۆ پەرستنێ، پێدڤییە بەهی ژی ل دووڤ ڕێورەسم و دابونەریتێن ئایینی و جڤاكی بن، نەك ببنە ئەگەرێ بارگرانیێ ل سەر خودانێن بەهیان».
