کورد دێ بنە هەڤپشکێ سەرەکی یێ دەولەتا سووریێ
بەرپرسەکێ کورد ل سووریێ راگەهاند رێککەفتنا وان و شامێ ب ناڤبژیڤانیا ئەمریکا، فرەنسا و وەلاتێن ئۆرۆپی هاتیە کرن و ئێدی کورد دێ بنە هەڤپشکێ سەرەکی یێ دەولەتا سووریێ و دێ هەموو مافێن گەلێ کورد ژ د دستوورێ نوو دا هێنە گەرەنتی کرن.
سالح موسلیم پەیڤدارێ پەیوەندیێن دەرڤە یێن پەیەدێ د داخۆیانیەکێ دا راگەهاند، رێککەفتنا هێزێن سووریا دیموکرات و شامێ ژ بۆ کوردێن سووریێ دهێتە واتەیا دەستپێکەکا نوو و گەلەک گرنگ و گۆت: (یا هاتیە کرن ژ بۆ کوردان گەلەک گرنگە، چونکی گەلەک مەترسی ل سەر رۆژئاڤایێ کوردستانێ هەبوون و ب ڤێ رێککەفتنێ دێ د پێنگاڤا ئێکێ دا شەڕ ژ کوردان دوور کەڤیت، نها ئەو گرۆپێن چەکدار یێن سەر ب تورکیا کو بەردەوام ئێرشی کوردان دکەن دێ ل دژی وان ژی یا پێدڤی هێتە کرن، وەکو دەولەتا نوو یا سووریێ دێ سنورەک بۆ وان هێتە دانان).
ناڤهاتی ئەو یەک ژی دیار کر، ل گۆر رێککەفتنا نوو دڤێت هەموو ئاوارەیێن سووریێ ڤەگەرنە ڤە دەڤەرێن خو، ئانکۆ دڤێت د دەمەکێ نێزیک دا خەلکێ مە یێ عەفرینێ ژی ڤەگەرنە ڤە سەر جهێن خوە، هەروەسا دەڤەرێن دی ژی و دڤێت گرۆپێن چەکدار یێن سەر ب تورکیا وان دەڤەران هەموویێ چۆل بکەن، بێگومان ئەو یەک گەلەک گرنگە، وەکو کورد ل رۆژئاڤایێ کوردستانێ پشتی رێککەفتنێ ئەو دەست ب قۆناغەکا نوو کەن و دڤێت کورد پتر ژ جاران کار بکەن دا بشێن پێگەهێ خوە هەم د ناڤ سووریێ دا و هەم ژی د ئاستێ رۆژهەلاتا ناڤین دا بهێز بکەن و گۆت: (ب ڤێ رێککەفتنێ دێ کوردێن سووریێ بنە هەڤپشکێ سەرەکی یێ دەولەتا نوو یا سووریێ، د هەموو بیاڤێن سەربازی و سیاسی دا کورد دێ بنە خوەدان رۆل و پێگەه، ئەو یەک ژی گەلەک گرنگە و بێگومان هەم ئەمریکا و فرەنسا هەم ژی وەلاتێن دی یێن ئۆرۆپی و دۆستێن کوردان رۆلەکێ گرنگ گێران).
سالح موسلیم ئەو یەک ژی دیار کر، بەری رێککەفتن بهێتە ئیمزا کرن وان چەندین کۆمبوون ساز کرینە و د کۆمبوونان دا بەحسێ هەموو خالێن رێککەفتنێ هاتینە کرن، ئانکو ئەو ئاگەهداری هەموو خالێن رێککەفتنێ بووینە و بۆ قۆناغا نها رێککەفتنەکا گەلەک باشە و دێ کاریگەریا خوە یا باش بۆ رۆژئاڤایێ کوردستانێ هەبیت.
