یانەیا پیرس دێ پشكداری د هەردو خولێن كوردستانێ و ئیراقێ دا كەت
شاهۆ فەرید:
ب فەرمی كارگێرییا یانەیا پیرس یا وەرزشی ڕاگەهاند بۆ وەرزێ نوو یێ چالاكیێن وەرزشی بڕیار هاتیە دان تیما وان یا فوتبۆلێ پشكداریێ د هەردو خولێن كوردستانێ و ئیراقێ دا بكەت، ئەڤچەندە ژی هات ل دووڤ بەرنامە و پلانا یانەیێ ژبۆ ڤەگەڕاندنا ناڤ و هێزا یانەیا پیرس د هەردو خولان دا.
ل دۆر ڤێ یەكێ و د داخویانیەكێ دا سەرۆكێ یانەیا پیرس د. بەهزاد سالح بۆ رۆژنامەیا ئەڤرۆ دیاركر: ب فەرمی بڕیار هاتیە دان تیما مە یا فوتبۆلێ پشكداری د وەرزێ نوو یا هەردو خولێن پلە دو یا ئیراقێ و خولا كوردستانێ دا بكەن و دێ بەرهەڤیێن باش هێنە كرن هەروەسان لایەنێ كوردستانی و ئیراقی ژی وەكو داخوازنامەیا پێدڤی ل سەر مە بۆ پشكداریێ، لەوما وەكو پلا ندێ ب هەمان یاریزانێن خوە یێن دناڤا ئەكادیمیێ دا و دگەل مە دا پشكدار دێ بۆ پێكهاتیێ تیمێ بەرهەڤكەین.
هەروەسان ناڤهاتی گۆت: هەكە یاریزان ژ یانەیێن دی یێن پارێزگەهێ هەبن و كادرێ راهێنانێ پێدڤی پێ هەبن دێ بزاڤێ كەین ئەوان كێماسیان ژی چارەسەربكەین، تایبەت ئەوان یاریزانێن مە یێن چووینە دناڤ رێزێن چەند یانەیێن مە یێن پارێزگەهێ، ژبەركو هەمان یاریزان ئەو بوون یێن پارسال پشكدار بووین و سەربور وەرگرتینە، هەردەم لاوان وتازەپشكداری هەر خول و قارەمانییەكێ بین، چونكۆ مە كرینە ئارمانج ب خوە بگەهینە ئاستێن باش ژ تیمێن لاوان و تازەپێگەهشتیان درۆست بكەین.
ژلایەكێ دیڤە سەرۆكێ یانەیا پیرس گۆت: پرۆتوكۆلا مە دگەل یانەیا دهۆك بەردەوامە چونكۆ یانەیا دایكە و هەردەمێ پێدڤی مە بن دێ هەڤكار و پشتەڤان بین، ئەگەر ژ پرۆتوكۆل ژی دناڤبەرا مە دا نەبیت دێ هەر هاریكار و پالپشت بین، یا پێدڤی خزمەتێ بۆ وەرزشا پارێزگەهێ ب گشتی و یانەیا دهۆك كەین، ئەم هەردو كارگێری گەلەك نێزیكی ئێكین دیارە ژی مە یاریگەها خوە ئێخستیە د خزمەتا راهێنانێن تیما وان یا فوتبۆلێ دا ئەوا پشكدار د خولا ستێرێن ئیراقێ دا، گرنگ پێشئێخستنا وەرزشێ یە ل پارێزگەها دهۆكێ و پشتەڤانییا گەنجێن باژێرێ مەنە.
