ئادار… قورسترین وه‌رزێ ڤیانێ
[5]
د. عارف حیتۆ
ل ئادارێ…
پێنگاڤا من كۆرانگه‌هه، گه‌رم دبیته‌ڤه
سه‌متا گولله و ده‌نگێ تۆپان
تلیلینه و د ڕێكا من دا ڤه‌دده‌نه‌ڤه!
*
بۆ بێهنه‌كێ.. بێهنه‌كا سه‌یر
ب ده‌شتا شه‌هره‌زوور وه‌ربوو، یێ پشتڕاستم، نه گولاڤه!
گه‌رمه‌كێ ئاخ، ئێخسته دۆخێ كه‌لینێ و
دویكێله‌كا سپی ژێ ده‌ر بوو، من دزانی، نه حه‌تاڤه!
دارهنارێن ل ده‌رێ گه‌لی، پێ قمیان و هنار په‌قین
ژنێن دوجان ژ به‌ر ژبه‌رچوونێ له‌رزین
هه‌ر تشته‌كێ عه‌شق پێڤه بۆ ته‌مه‌دی و
شویرهێن ئاسمانی ده‌رزین
“ئینانا”یێ قامچییه‌كا ڤێ دوه‌شینیت
پشتا عه‌وران خوینه‌لۆیه و ساكۆیێ “كی” پێ دهورزمیت.
من پالوه‌رێن ل پشت ڕه‌پبوویی نه‌دیتن
لێ من خوین دیت.. رووباره‌كه
زارۆك تێدا دخه‌ندقین و هنار دپه‌قین
دندك كت كت ب ته‌كوه‌ری بژاله بوون
ل سه‌ر ده‌همه‌نا ده‌شتا داخدایی ڤاژۆله بوون
ئه‌و زنجیرێن ب پیێ منڤه، ل به‌ر بارانێ نه ڕزین
ڕۆندكێن چیای، ب ئاله‌كان دا دهاتنه خوار و دبوونه جۆبار
“ئێنكی” ب ئاڤێ ڤه گرفتار
چ ترارێن نه كون نه‌بوون، ئاڤێ بكه‌تێ و
به‌رده‌ته سه‌ر وان برینێن ب ژان و زامدار
یان ژی ل دووڤ، مشه‌ختبوونا مه ب ڕێژیت.
هه‌كو ڕۆژ هێشتا خوه‌سه‌ر و گیای یاری ب بای دكرن
ده‌ر بۆ تیرۆژكان ڤه‌دكرن
د هه‌مبێزا چیمه‌نان دا، ئه‌م نالیك بووین!
وه‌لێ پشتی ڕۆژ ب چویڤی زیندان بوویی و
هه‌یڤ فیلار بووی
نهالێن كوور بوونه جهۆر، ئه‌م ئالیك بووین!
و گرێ یا من یا ده‌روونی؛ هه‌له‌پچه!
ل خواندنگه‌هێ، زارۆكا من به‌رپه‌ڕێ دیرۆكێ ڤه‌كر
هه‌ر كۆمه‌ك سالان مه‌هدییه‌ك دادده‌ته سه‌ر
رێكا حه‌ریری و دكه‌ته پر
هه‌ڤڕانێ كاروانی دویدده‌ت، سالیسكی و ڤڕ
دناڤبه‌را كه‌ن و گریێ دا هه‌ر دخواند:
كرمێ دارێن دێرین بڤر
عه‌زازیلێ سێلماندنێ، خوینا چڤر
و ستێرا سبه‌ها گه‌ش
ل ئاسمانی سرووده‌كه.. ساخ یان نه‌مر
هه‌له‌پچه.!
*
هیڤی یێن بریندار، ل هه‌سپێ شه‌مبۆزێ خه‌ونێ سویار، ب ڕێكا هاتوباتێ ڤه لیلاق و دناڤ چاڤێن خه‌ریبیێ دا ڤین و ڤێنیار. هه‌ر پێكۆلا بێ ڕا و ڕادار، دا هونینا كۆلكێ شێدار بكه‌ته بڕیار، دناڤ هه‌ڤۆكێن شعرا من دا دبیت كرێدار. ئه‌ڤان په‌یڤێن من ژ فه‌رهه‌نگان دزین و د گه‌ورییا خوه‌دا حه‌واندین، ژ خه‌مێن پیربوویی ڕاچاندین و ب گه‌رمییا عه‌شقێ كه‌واندین، من یێن ژ مزگه‌فتێ ستاندین و ب درۆزه‌یان په‌ژراندین. هه‌ر ئه‌ون یێن من ژ لڤین و كه‌دێن هنگۆ هه‌لاندین و ب ڕه‌نگێ گولان، ژ كه‌ڤرێن ره‌ق ڤه‌زه‌لاندین. و هه‌ر ب هنگۆ و خوینا هنگۆ، ل سه‌ر ئاگرێ چاڤه‌ڕێبوونێ قه‌لاندین. ئه‌ڤ په‌یڤێن هه، هه‌ر ئه‌و په‌یڤن یێن ب كاما دلێ خوه یێ سه‌وداسه‌ر حه‌باندین، ب ته‌علیشكێ بوهژاندین و ب وه‌غه‌را وه.. هه‌ڕماندین. ئه‌ڤه بۆ جارا سیهێ یه ل كۆمبوونێ جاراندین و كه‌سه‌كێ نه عه‌جباندین.
هوون نه هوون بوون، لێ ل ئادارێ هوون هوونن.!
