ئاریشه‌یا ئێكگرتوویێن به‌هدینان ل گه‌ل یێن سلێمانیی
ل دور هه‌لویستێ جڤاتا سه‌ركردایه‌تیا ئێكگرتوو ل به‌هدینان و ده‌ست ژ كاركێشانا دیندار نه‌جمان دوسكی پشتی پشكداریا ئێكگرتوو د كومبوونا 23ێ خزیرانێ یا په‌رله‌مانێ كوردستانێ دا، هنده‌ك كه‌س و لایه‌نان شینا وێ چه‌ندێ كو به‌حسێ ناكوكیێن كویرێن ئێكگرتوویێن دهۆكێ و سلێمانیێ بكه‌ن، بزاڤا وێ چه‌ندێ كرن وه‌سا نیشا بده‌ن كو ئه‌ڤ هه‌لویستێ جڤاتا سه‌ركردایه‌تیا دهۆكێ و دیندار نه‌جمانی بتنێ بۆ پشته‌ڤانیا پارتی یه، لێ راستیا وێ ئێكگرتوو یێن به‌هدینان ده‌مه‌كه داخوازێ ژ مه‌كته‌با سیاسیا خو دكه‌ن كو ئێدی سه‌نگا به‌هدینان د بریارێن ستراتیژی یێن ئێكگرتوو دا ل به‌رچاڤ بهێته وه‌رگرتن و ئێدی بریار بریارێن ئێكلاكه‌ر و گرنگ د ده‌ستێ ده‌ڤه‌ره‌كێ بتنێ دا نه‌مینن.
ب حوكمێ كارێ خو یێ رۆژنامه‌ڤانی و وێ تێكه‌لیا من ل گه‌ل چه‌ند به‌رپرس و كادر و هه‌ڤاله‌كێن ئێكگرتوو ل به‌هدینان هه‌ی، ده‌مه‌كه گه‌هشتیمه وێ باوه‌ریێ كو ئێدی ئێكگرتوو ب ڤی ره‌نگی به‌رده‌وام نابیت.
به‌ری حه‌فت هه‌یڤان هه‌ڤاله‌كێ رۆژنه‌مه‌ڤان پرسیارا بۆچوونا من كر ل دوور پاشه‌رۆژا ئێكگرتوو ل به‌هدینان، ل وی ده‌می ئه‌ڤه به‌رسڤا من بوو: “ئه‌گه‌ر ئێكگرتوویێن به‌هدینان باشتر رۆلێ خو د دانانا سیاسه‌تا گشتی یا حزبێ دا نه‌بینن و ئێكگرتوو وه‌كو حزب ب ره‌نگه‌كێ گشتی ژ گۆڕان دوور نه‌كه‌ڤیت، ئێكگرتوویێن به‌هدینان دێ جودا بن. ”
نوكه ژی ل سه‌ر هه‌مان بۆچوونێ مه ب پشت به‌ستن ل سه‌ر ڤان خالێن خوارێ هاتینه رێزكرن.
١- د هه‌لبژارتنێن سالا ٢٠٠٥ یێن په‌رله‌مانێ عیراقێ دا، ئێكگرتوویێن به‌هدینان و به‌شه‌كێ هه‌ولێرێ ل گه‌ل هندێ نه‌بوون ئێكگرتوو ب لیسته‌كا سه‌ربه‌خو پشكداری هه‌لبژارتنان بیت د ده‌مه‌كی دا كو هه‌موو كورد ب ئێك لیست پشكدار بوون، لێ ب حوكمێ پرانیا ساده (٥٠+١) یا سه‌ركردێن سلێمانیێ د ناڤ ئێكگرتوو دا بریار هاته دان ب لیسته‌كا سه‌ربه‌خو پشكدار بن و د ئه‌نجام دا ئێكگرتوو یێن به‌هدینان بوونه قوربانی و باره‌گایێن وان هاتنه سوتن و كادرێن وان هاتنه كوشتن، ژ به‌ر كو سه‌ركردێن سلێمانیێ ژیوارێ دهۆكێ نه‌دزانی و گوهداریا بۆچوونێن سه‌ركردێن دهۆكێ ژی نه‌كر.
٢- د پێكئینانا كابینه‌یا شه‌شێ یا حكوومه‌تا كوردستانێ دا، دیسا پرانیا سه‌ركردێن ئێكگرتوویێن به‌هدینان و د گه‌ل دا چه‌ند سه‌ركرده‌كێن هه‌ولێرێ ژی كو ئێك ژ وان (محه‌مه‌د ره‌ئوف) كو د كونگرێ شه‌شێ دا ئێك به‌ربژێرێن ب هێز بوو ب بیته ئه‌میندارێ گشتی و نوكه سه‌رۆكێ جڤاتا سه‌ركردایه‌تیا ئێكگرتوویه د گه‌ل هندێ بوون ئێكگرتوو پشكداری حكوومه‌تێ بیت، لێ دیسا ب پرانیا ساده‌یا سه‌ركردێن ئێكگرتوو ل سلێمانیێ و ل ژێر كاریگه‌ریا گۆتارا توند یا گۆڕان جڤاتا سه‌ركردایه‌تیا ئێكگرتوو بریار دا پشكداری كابینه‌یا شه‌شێ نه‌كه‌ت یا كو ل وی ده‌می ب سه‌رۆكاتیا د. به‌رهه‌م سالح هاتیه پێكئینان.
٣- د خونیشادانێن 17ی شواتێ دا، سه‌ركردایه‌تیا ئێكگرتوو یا سلێمانیێ ب ره‌نگه‌كێ كه‌فته بن كارگه‌ریا ته‌ڤگه‌را گۆڕان و ل سه‌رایێ سلێمانیێ هنده‌ك گۆتارێن وه‌سا زڤر د دان كو ب چو ره‌نگان ل گه‌ل مه‌بادئێن ئێكگرتوو ل سه‌ر هاتیه ئاڤاكرن نه‌دگونجیا و هه‌روه‌سا ب چو ره‌نگان ل گه‌ل سرۆشتێ سه‌ركرده و كادرێن ئێكگرتوو یێن به‌هدینان نه‌دگونجیا كو گه‌له‌ك جاران د بوو ئه‌گه‌رێ ئیحراجێ بۆ وان.
٤- ل دووماهیا سالا ٢٠١١ ده‌مێ بۆ جارا دووێ باره‌گه‌هێن ئێكگرتوو ل به‌هدینان هاتینه سوتن، سه‌ركردێن ئێكگرتوو یێن به‌هدینان و یێن سلێمانیێ دو دیتنێن تمام ژێك جودا هه‌بوون بۆ وان روودانان، ب ره‌نگه‌كێ یێن دهۆكێ د داخویانی و لڤینێن خو دا بزاڤ دكر ره‌وشێ ئارام بكه‌ن د ده‌مه‌كی دا كو فشاره‌كا مه‌زن ل سه‌ر وان بوو، به‌رامبه‌ر وان سه‌ركردێن سلێمانیێ بزاڤ دكرن ره‌وشێ ئالۆزتر لێ بكه‌ن. چه‌ند رۆژه‌كان پشتی سۆتنا باره‌گه‌هان، ده‌مێ ره‌وش ئارام بووی سه‌ركرده‌كێ ئێكگرتوو ل دهۆكێ گۆته من هه‌كه مه گوهێ خو دا بوو رێنما و گۆتارێن سه‌ركردێن ئێكگرتوو ل سلێمانیێ و مه ژی وه‌كی وان ره‌فتار كر بوو، دا ل دهۆكێ خوین ل جوكا چیت!!!
5- د دابه‌شكرنا پۆستێن هه‌ر دو حكوومه‌تێن هه‌رێمێ و به‌غدا دا، پرانیا پۆستان به‌ر ب كادر و سه‌ركردێن سلێمانیێ كه‌فتینه و د بابه‌تێ وه‌رگرتنا پۆستێ وه‌زیرێ كوچ و كوچبه‌رێن عیراقێ دا ل كابینه‌یا عه‌بادی كو د هاته چاڤه‌رێكرن ب سه‌ركرده‌كێ به‌هدینان یێ ئێكگرتوو بهێته دان، د خوله‌كێن دووماهیێ دا ئه‌میندارێ گشتیێ ئێكگرتوو داگێران بۆ ته‌ڤگه‌را گۆڕان كر و ئه‌و پۆست ب وان هاته دان كو ل وی ده‌می هنده‌ك كادر و ئه‌ندامێن ئێكگرتوو د گۆت بتنێ كو به‌ربژار به‌هدینی بوو له‌وما ئه‌میندارێ ئێكگرتوو داگێران كریه.
6- ب مه‌ره‌ما وێ چه‌ندێ كو سیاسه‌تا گشتی یا ئێكگرتوو و هه‌لویستێن وێ د كێشێن هه‌رێمێ دا و هه‌روه‌سا د دانا بریارێن ستراتیجی دا ره‌نگڤه‌دانا بوچوونێن سه‌ركردێن سلێمانیێ بتنێ نه‌بیت، د كونگرێ شه‌شێ یێ ئێكگرتوو دا مادده‌ك هاته په‌سه‌ند كرن كو بریارێن جڤاتا سه‌ركردایه‌تیا ئێكگرتوو ب 3/2 بهێنه دان كو به‌ری كونگره‌ی ب ٥٠+١ د هاتنه دان. پشتی كونگره‌ی سه‌ركرده‌كێ ئێكگرتوو گۆته من پشتی ڤێ بریارێ ئه‌زێ گه‌شبینم كو ئێدی بۆچوونێن سلێمانیێ بتنێ د زال نابن به‌لكو دێ ئێكگرتوویێن به‌هدینان ژی رۆل د دارێشتنا سیاسه‌تا گشتی یا ئێكگرتوو دا هه‌بیت، لێ دیاره ئه‌و گه‌شبینی یا د جه دا نه‌بوو ژ به‌ر كو به‌ری حه‌فت هه‌یڤان سه‌ركردێن دهۆكێ یێن ئێكگرتوو نه‌رازیبوونه‌كا توند ل دژی مه‌كته‌با سیاسیا ئێكگرتوو و ئه‌میندارێ گشتی نیشان دا كو هه‌كه رێز ل ئیراده و رێژه‌ییا ده‌نگێن ئێكگرتوویێن دهۆكێ نه‌هێته گرتن، ئه‌و دێ هه‌لویستی وه‌رگرن، وی ده‌می سه‌ركردایه‌تیا ئێكگرتوو كومبوو و سۆزدا كو رێژه‌یا دهۆكێ پێش چاڤ بهێته وه‌رگرتن و ئێدی بریارێن گرنگ و ستراتیجی یێن ئێكگرتوو ب لهه‌ڤهاتن یان ژی ب 3/2 ده‌ربچن، لێ د كومبوونا 23ی خزیرانێ یا په‌رله‌مانی دا ده‌ركه‌فت كو ئه‌و سۆز نه‌هاته بجهئینان و ل بن كاریگه‌ریا گۆتارا گۆڕان و گڤاشتنێن وان په‌رله‌مانتارێن ئێكگرتوو پشكداری كومبوونا په‌رله‌مانی بوون بێی كو رێزێ ل ئیرادا ده‌نگده‌ر و سه‌ركردێن ئێكگرتوو یێن ده‌ڤه‌را به‌هدینان بگرن كو به‌ری وه‌خت سۆز پێ هاتبوو دان بریارێن گرنگ و ستراتیجی ب لهه‌ڤهاتنێ (سازانێ) د ناڤ جڤاتا سه‌ركردایه‌تیا ئێكگرتوو دا بهێنه دان.
ئه‌ڤا ل سه‌ری هاتیه رێزكرن وێ چه‌ندێ نیشا د ده‌ت كو كێشه‌یا ئێكگرتوویێن دهۆكێ ل گه‌ل یێن سلێمانیێ نه‌یا دوهی و ئه‌ڤرۆ یه و نه‌ژی بتنێ گرێدای كومبوونا په‌رله‌مانێ كوردستانێ یه، به‌لكو ده‌مه‌كه سه‌ركردێن به‌هدینان وێ گازندێ دكه‌ن.
ل دور ده‌ست ژ كار كێشانا دیندار نه‌جمان دوسكی ژی، راسته دیندار یێ توره‌یه ژ بالا ده‌ستیا سلێمانیان ل سه‌ر بریارێن ئێكگرتوویا ئیسلامی، لێ د گه‌ل وێ چه‌ندێ دا دیندار گه‌له‌ك جودایێن بنه‌ره‌تی یێن دی ژی هه‌نه و وی گه‌له‌ك گازنده ل شێوازێ كارێ ئێكگرتوو هه‌نه ب تایبه‌تی د بابه‌تێ جوداكرنا ده‌عوێ و سیاسه‌تێ دا و وه‌كی من ژ وی گوه لێبووی حه‌تا ئه‌و د گه‌ل هندێ دا نینه پاشگرێ ئیسلامی ژی ب ناڤێ ئێكگرتوو ڤه بمینیت.
ناكوكیێن سه‌ركردێن ئێكگرتوو یێن به‌هدینان ل گه‌ل یێن سلێمانیێ ناكوكیێن جدی نه و پشكه‌كا وێ گرێدای جوداهیا ژینگه‌ها دهۆكێ یه ل گه‌ل ژینگه‌ها سلێمانیێ كو ره‌نگه دو ئیداره‌ییا زه‌ر و كه‌سك كاریگه‌ریه‌كا باش ل سه‌ر ڤێ چه‌ندێ هه‌بیت، لێ هه‌كه ڤێ جارێ ژی ئه‌ڤ ئالۆزیه هاتبیته ده‌ربازكرن، ئه‌گه‌ر ل پاشه‌رۆژێ چاره‌سه‌ریه‌كا راسته‌قینه بۆ ڤێ ئاریشێ نه‌هێته دیتن، جودابوونا ئێكگرتوویێن به‌هدینان یا دوور نابیت.
