ئافرەتێن دهۆكێ چاڤ ل پشكدارییەكا سەرفەرازن
قەیس وەیس:
د داخویانیەكێ دا ئەنیس خالد سەرپەرشتێ تیما فوتبۆلا یانەیا ئافرەتێن دهۆكێ ب سپاسی ڤە پشتی ڕازیبوونا د. عەلی تەتەر مە بڕیار دایە تیما خوە یا یاریگەهێن مەزن پشكداریێ د خولا نایابا ئیراقێ ل سەر ئاستێ كچان دا بكەین ئەوا دهێتە چاڤەڕێ كرن ل حەفتییا ئێكێ یا مەها بهێت دەستپێبكەت و هەتا نوكە تیما مە 95% پێكهاتیێ وێ ب دووماهی هاتییە.
زێدەتر ناڤهاتی گۆت: پشتی ڤەقەتیانەكا درێژ ژ چالاكیێن فوتبۆلا ئیراقێ كو دبیتە جارا ئێكێ ئەم تیما خوە ل سەر ئاستێ 11 یاریزانی پشكداری د خولا نایابا ئیراقێ دا بكەین بۆ وەرزێ ئەڤ سالە، ب سپاسی ڤە بەرێز د. عەلی تەتەر ڕازیبووی پشتەڤانییا تیما مە بكەت، لەوما ژی هەرزوو مە دەست ب دانوستاندنان كرن ژبۆ پێكئینانا تیما خوە بۆ وەرزێ نوو، ئێكەم پێنگاڤ نووكرنا باوەریێ ل گەل كادرێ خوە یێ ڕاهێنانێ ب سەرپەرشتییا ئاراز سالح، دووڤدا مە چەندین یاریزانان ئیناینە دناڤ ڕێزێن تیمێ دا كو ڕێژەیا 95% تیم ب دووماهی هاتییە.
هەروەسان ئەنیس خالد گۆت: ژبەركو خولا نایابا ئیراقێ یە و دێ هەڤڕكییەكا ب هێز هەبیت، مە ژی دڤێت ئەم پشكدارییەكا سەرفەراز و سەركەڤتی بكەین، هەرزوو مە یاریزانێن خوە یێن خودان شیان دوبارە گرێبەستێن وان نووكرن، هەروەسان سێ یاریزانێن پیشەكار ژ وەلاتێ ئیرانێ پەیوەندی پێ كر و ئیناینە دناڤ ڕێزێن تیمێ، دگەل چەند یاریزانێن هەولێرا پایتەخت، هەروەسان ل حەفتییا بۆری خرڤەبوونا هەموو یاریزانان ب شێوەیێ ڕاهێنانێن دەستپێكی بۆ ماوەیێ 12 رۆژان بەردەوامبوویە.
ژلایەكێ دووڤە سەرپەرشتێ تیمێ گۆت: وەرزێ ئەڤ سالە بۆ مە یا نوویە هەروەسان سیستەمێ پیشەكاریێ و ڕێپێدانا ئاسیایی یە، لەوما ژی دبیت زەحمەتەك هەبیت لێ ئەم ڕژدین باشترین شێوە و بەرنامەیێن ڕێكخستی ژلایێ هونەری، تەكنیكی كار بكەین پێخەمەت كاروانەكێ سەرفەراز، ئەم چاڤەڕێ فدراسیۆنێ نە ژبۆ ئێكلاكرنا تیمێن پشكدارن و دانانا ژڤانێ وەرزێ نوو بۆ خولێ.
ل دووماهیێ ئەنیسی دڤیا سپاسییێن خوە بگەهینیت و گۆت: ل دەستپێكێ سپاس بۆ پارتا مە پارتی دیموكراتی كوردستان ژ ڕێكخستنا پارتی ل بەهدینان، لەقا ئێك یا تێكوشەر، پارێزگارێ دهۆكێ دیسان لژنەیا ئۆلمپییا دهۆكێ و ڕێڤەبەریا وەرزشی كو بەردەوام هەڤكار و پشتەڤانێن ڤێ یانەیێ و كچێن وەرزشڤانن.
ژلایێ خوەڤە ئاواز یونس گەشبینییا خوە دیاركر كو تیما وان شیانێن هەین هەڤڕكیێ ل سەر ڕێزێن پێشیێ بكەت و گۆت: بەرهەڤیێن تیما مە نە بتنێ بۆ پشكداریێ نە بەلكو بزاڤ ژبۆ هەڤڕكیێ ل سەر ڕێزێن پێشیێ، پێنەڤێت ئەڤچەندە ژی ب گۆتن تنێ ناچێبتی بەلكو ب كارەكێ كۆم، وەكو ئەز دبینم هەتا نوكە كارەكێ هەڤگرتی دهێتە كرن دناڤبەرا كارگێری، كادرێ ڕاهێنانێ و هەموو یاریزانان، دیارە ژی هیڤیێن مە هەمییان نەبتنێ پشكدارییە بەلكو هەڤڕكییە ل سەر ڕێزێن پێشیێ، سەرباری هەتا نوكە ئەو تیمێن هاتینە زانین دێ پشكدارن خودان یاریزانێن پیشەكار و زیرەك هەنە لێ مە ژی تیمەكا ب هێز و خودان شیان هەیە و دێ شەڕی بۆ ڕێزبەندیێن ئێكێ كەین.
ل دووماهیێ یاریزانا یانەیا ئافرەتێن دهۆكێ گۆت: ل گەل یانەیێ مە بیرەوەریەكا خۆش هەیە ئەو ب دەستڤە ئینانا ناسناڤێ خولا فوتسالا كوردستانێ یە، لەوما ژی گەشبینم و ب هیڤی مە بۆ خولا نایابا ئیراقێ ژی هەمان دەستكەفت هەبیت ئەو ژی ناسناڤێ خولا ئیراقێ و ئەڤە ژی هیڤییەكا ب ماف دزانین، من باوەری هەیە تیما مە دێ بیتە ئێك ژ هەڤڕكێن خولێ.
بۆ زانین یانەیا ئافرەتێن دهۆكێ تاكە یانەیا تایبەتە ب وەرزشا كچان ڤە ئەوا ل سالا 2007ێ ل سەر دەستێ كۆمەكا كچێن وەرزشڤان هاتییە دامەزراندن، سێ ناسناڤێن كوردستانی ل سەر ئاستێ فوتسالێ ب دەستڤە ئیناینە، ناسناڤەكێ ئیراقێ بۆ شەش یاریزانی و ناسناڤێ قارەمانییا پارێزگەهێ ی فوتسالێ ژی ب دەستڤە ئینایە دگەل چەندین ناسناڤێن دی یێن یاریێن جودا ژ وانا تیكۆنجتسۆ و سكەی.
