ڕاوەستیانا چالاكییێن فدراسیۆنێ كارتێكرنا نەرێنی ل سەر ئاستێ یاریزانان دكەت
چاڤەڕێ بوو د وەرزێ ئەڤ سالە دا هەتا ڤێ مەهێ چار قووناغ ژ خولا ئیراقێ یا یارییا پایسكلان ل سەر ئاستێن جودا هاتبا نەكرن، لێ ژبەر ڕەوشا دارایی و ئەگەرێن جودا وەرزێ ئەڤ سالە یێ خولێ هاتە ڕاوەستاندن، ئەڤ چەندە بوو ئەگەر یاریزانێن هەرێما كوردستانێ و ئیراقێ بێ زاربن و داخوازا دانانا قارەمانییان بكەن، ل دۆر ڤێ یەكێ رۆژنامەیا ئەڤرۆ بۆچوونێن جودا وەرگرتینە و بڤی شێوەیی خوارێ بوویە.
ل دەستپێكێ حەمید عەلی ئەللاوەندی سەرۆكێ فدراسیۆنا پایسكلڤانان ل ئیراقێ گۆت: بڕیاربوو ل شوباتا بوری دەست ب هەڤڕكییان هاتباكرن ل سەر چار قووناغان و هەر قووناغەك ل باژێرەكی بوو ژ وانا باژێرێ دهۆكێ بوو، لێ ژبەر ئەگەرێن تەكنیكی بۆ مەها ئادارێ هاتە پاشئێخستن، لێ ژ نشكەكێ ڤە ئەو شەڕێ دناڤبەرا ئیران و ئیسرائل-ئەمریكا پەیدابوو ژڤانێ قارەمانیێ بو جارا دویێ هاتە پاشئێخستن بۆ دەمەكێ نەدیار، ل خزیرانا بۆری بڕیاربوو هاتبا كرن ژبەر ئەگەرێن كارگێری دوبارە هاتە پاشئێخستن، هەروەسان بڕیاربوو ل تەپاخێ هاتبا كرن ب شێوازەكێ جودا دیسان هاتە پاشئێخستن، لەوما نەچاربووین ژبەر كورتییا دەمێ خول یا چار قووناغان بهێتە هەلوەشاند و هزر د قارەمانیەكا ب شێوازەكێ جودا بكەین هەكە پشتەڤانییا دارایی هاتە كرن.
ژلایێ خوەڤە دۆمان رەجەب ئەندامێ فدراسیۆنا یارییا پایسكلان ل پارێزگەها دهۆكێ گۆت: چاڤەڕێ بوونەكا درێژ ژلایێ یانە و یاریزانان و ڕاهێنەران بۆ خولا ئیراقێ دهاتە كرن، دناڤبەرا هەرد چەند مەهەكا بڕیار دهاتە دان و دووڤدا د هاتە هەلوەشاندن، ئەڤێ چەندێ یاریزانێن مە بێزاركرن، ل كوردستانێ ب گشتی مە یاریزانێن خودان شیان هەنە و پرانییا وان دناڤ ڕێزێن هەلبژارتیێ ئیراقێ دانە ل سەر ئاستێ كوڕان و كچان، هەروەسان هەموو هیڤیێن وان ئەوبوو د وەرزێ ئەڤ سالە دا هەڤڕكیێ بكەن پێخەمەت پشكداریێن دەرڤە هەبیت.
هەروەسان ناڤهاتی گۆت: لدووڤ سیستەمێ سالانە یێ قارەمانیی هەتا مەها چریا دویێ هەرچار قووناغێن درێژ یێن خولا ئیراقێ ب دووماهی دهاتن و دەست ب بەرهەڤیێن هەلبژارتیێن ئیراقێ و كەمپێن ڕاهێنانێ دهاتنە كرن ژبۆ قارەمانیێن دەرڤە، لێ نە ئەنجامدانا هیچ قارەمانیەكا ئیراقێ كارتیكرنا نەرێنی ل سەر یاریزانان كر، ڕاستە بەردەوام ڕاهێنانێن خوە دكەن و ئاستێ خوە پێش دئێخن لێ هەكە چو قارەمانی نەبن بۆ هەڤڕكییان ڕاهێنەر نەشێت ئاستێ وان ب هەلسەنگینیت، مە ل دهۆكێ یاریزانێن خودان شیان هەنە تایبەت بۆ ژیێن تازەپێگەهشتی، لاوان و پێشكەڤتیان ل گەل هەلبژارتیێ ئیراقێ ژی پشكدارن.
