پاراستنا شنگالێ ئەرکێ کوردستانێ یە
ئیدریس زۆزانی
دویڤچوونەکا هویر ل سەر داخۆیانیێن قەهرەمانێ زێندانا ئیمرالی عەبدولا ئۆجەلان دەربارەی پێدڤیا هەبوونا چەکدارێن P.K.K ل دەڤەرا شنگالێ د ئەڤێ قووناغێ دا وەکو دایە دیارکرن پێخەمەت پاراستنا جڤاکێ ئێزدی، هەر وەکو چەکدارێن پارتیا وی تەڤایا دەڤەرێن باکوری کوردستانێ رزگارکرینە و گەلێ وێ بەر ب ئازادیێ ڤە بریە و حوكمەت و سازیێن فەرمی لێ دامەزراندینە و دانوستاندنێ ل گەل حوكمەتا ترکیا ل گۆر بنەمایێن سیاسەتا براتیا گەلان کرینە ل سەر چارەنڤیسێ ئەوی پارچەیێ مەزن ژ ئاخا کوردستانێ و دیسا وەکو گەلێ کورد ژ نەهامەتەکا مەزن پاراستیە و سیاسەتا پارتیا وی بوویە چەترەک ژ بۆ ئارامیا تەڤایا گەلێ کورد، لەوا ئەوی ب فەر زانی جڤاكا ئیزدی و دەڤەرا شنگالێ ژی یا کو پارچەکی گرنگ ژ بەرجەستەیێ کوردستانا ئازاد بپارێزە.
دیسا ئەگەر ژ شاشیێن سیاسەتا پارتیا وی نەبایە و چەکدارێن وان مایتێکرنەکا خرابکار د ناڤ خەلکێ وێ دەڤەرێ دا نەکربا شنگال نەدبوو گۆرەپانەکا بەرفرەهـ ژ بۆ ململانێ یا سیاسی، نەخاسمە پشتی کو هەموو ئالاڤین رێکخۆشکرنێ ژلایێ حوكمەتا کوردستانێ ڤە ژ بۆ ڤەگەراندنا خەلکێ وێ هاتنە ئامادەکرن، پشتی کو فەرمان ب سەرێ وان دا هاتی ل سالا ٢٠١٤ و خەلکێ وێ هەموو دەربەدەر و ئاوارەبوویی کوردستانا ئازاد و کەڤتیە دبن چاڤدێریا بەردەوام یا حوكمەتا کوردستانێ دا و هاتیە پاراستن. کو هەر ل ئەوی دەمی لایەنگەر و چەگدارن پارتیا قەهرەمانێ زێندانا ئیمرالی رێگری ل ڤەگەراندنا خەلکێ وێ دکر و کێشە و ئاریشە بۆ وان دروست دکرن و رەوشا وان دهاتە تێکدان.
ب راستی ئەڤ جۆرێ داخۆیانیان جهێ حەیبەتیەکا مەزنە، بتایبەت کو ژلایێ شێرێ زێندانا ئیمرالی ڤە هاتیەدان، پشتی دوازدە سالێن ئاوارەبوونێ ژ نوی خۆ کریە خۆدانێ شنگالێ و داخوازا پاراستنا وی خەلکێ دکەت، بێگومان هەر کەسەکی رەوشا سیاسی یا دەڤەرێ ژ نێزیک شۆپاندی باش دزانە داخۆیانیا وی پێخەمەت تێکدانا رەوشا خەلکێ کوردستانا ئازاد بوویە و بتایبەت ژ بۆ دوژمناتیا پارتی دیموکراتی کوردستان و سەرکردایەتیا وێ یا خۆراگر.
مخابن ژ ئالیەکی ڤە سەرۆکێ PKK یێ زێندانکری عبدولا ئۆجەلان ل ئیمرالی داخوازا ڤیلە و ئاڤاهیێن مەزن دکەت و ژئالیێ دی ڤە داخوازێ ژ چەکدارێن پارتیا خۆ دکەت، رێککەڤتنا ل گەل ترکیا ئیمزا بکەن و دانوستاندنێ ل سەر دانانا چەکی و چاوانیا خۆ رادستکرنا حوكمەتا ترکیا بکەن، دا کو ترکیا بمینیت وەلاتەکی ئارام و کێشە بۆ گەلێ وێ دروست نەبن.
دی هەولدەین ئەگەرێن داخۆیانیێن سەرۆکێ P.K.K کو د ئەڤێ قووناغا هەستیار دا هاتیە دان ب چەند خالێن گرنگ بدەینە دیارکرن و راستیا ژ بۆ تەڤایا خەلکێ کوردستانێ بدەینە خویاکرن.
١- ئەگەر ژ هەبوونا چەکدارێن پارتیا وی ل شنگالێ چ بوویە و مەبەستا وی ب ئەڤێ پێنگاڤێ چیە و ئەوان چی بۆ شنگالێ کرینە ژ بلی وێرانکرنا وێ و مایتێکرنا د ناڤ جڤاک وی دا گەلۆ نا شنگال دەڤەرەکا سنووریە دگەل باکوری کوردستانێ کو دبیتە گۆرەپانا خەباتا پارتیین خەباتکەر ل ئەوێ دەڤەرێ.
٢- سەرێ دوازدە سالانە چەکدارێن P.K.K خەلکێ شنگالێ دئێشینن و پتریا وان ب رێکا بابەتێ ئۆلی ب سەردا دبەن و دوبەرکریەکا مەزن ئێخستینە د ناڤ تەڤایا پێکهاتەیێن وێ یێن جڤاکی دا.
٣- دوازدە سالن پارتیا ئۆجەلانی بازرگانیەکا نە یاسایی و یاریکرنێ ب چارەنڤیسێ خەلکێ شنگالێ دکەت ب مەهانەیا بابەتێ ئێزدیاتیێ و خواندنا ئۆلی و ددەنە خۆیاکرن کو ئەو بووینە خۆدان بۆ جڤاکێ ئێزدی و هەموو ژی پێخەمەت بەرژەوەندیێن خۆ یین سیاسی یێن تایبەت.
٤- کارێ چەکدارێن P.K.K بۆ خەلکێ شنگالێ کری ئەو بوویە کو ب سەدان کچ و کورێن شنگالی یێن سنێلە ژ همبێزا دایک و بابان رەڤاندن و پرانیا وان ب سەردابرن و هەتا نها ژی گەکەک ژ وان د بێ سەروشوین و وندانە.
٥- پشتی فەرمانا شنگالێ و هەولێن بەردەوام یێن سەرکردایەتیا پارتی ژ بۆ رزگارکرن و ڤەگەراندنا ب هەزاران کچ و ژنێن ئێزدی ژ دەستێ رێکخراوا تیرۆرستی یا داعش و ژ ناچاری ل کەمپێ نەورۆز ل وەلاتێ سووریا هاتینە ئاکنجیبوون، چەکدارێن P.K.K ئەو ب سەردابرن و بەر ب بارەگایێن خۆ یێن چیایێ قەندیلی ڤە برن و زۆربەیا وان هاتنە ونداکرن.
٦- پشتی کو ژ ئەگەرێ فەرمانێ پڕانیا خەلکێ شنگالێ دەربەدەر و ئاوارەبووی، چەکدارێن P.K.K ئەو چەندە ب دەلیڤەکا زیرین زانین و ئێکسەر دەست ب سەرداگرتنا زەڤیی و ملک و مالێ خەلکێ کرن و پێخەمەت بەرژەوەندیین خۆ یێن تایبەت بکارئینان.
٧- چەکدارێن PKK هەولێن بەردەوام ژ بۆ نە ئارامیا تەڤایا دەڤەرێن شنگالێ دکرن، پێخەمەت تێکدانا رەوشا خەلکێ و قایمکرنا هەبوونا هێزین خۆ ل شنگالێ.
٨- پەیداکرنا دوبەرکیا ئۆلی و هەڤڕکیا جڤاکی دناڤبەرا خەلکێ شنگالێ دا و ژێکڤەقەتاندنا براتیا د ناڤبەرا پێکهاتەیێن وێ دا.
٩- ونداکرن و کوشتنا ب دەهان کەسێن بێ گونەهـ ژ خەلکێ شنگالێ ب مەرەما ترساندن و بێدەنگکرنێ و ئارمانج ژێ پەیداکرنا دوبەرکیێ دناڤبەرا پێکهاتە و هۆز و مالباتێن شنگالێ دا.
١٠- هەڤپەیمانی و هەماهنگیا دگەل هێزێن حەشدا شەعبی و لایەنێن سیاسی یێن سەر ب ئیرانێ ڤە پێخەمەت رازیکرنا ئاغایێن خۆ و جێ ب جێکرنا پلانا کارێ وان ل دەڤەرا شنگالێ و ڤەکرنا سنووری دگەل سوریا.
١١. چەکدارێن پارتیا ئۆجەلانی دەڤەرا شنگال کرینە جهێ بازرگانیا مادەیێن بێهۆشکار و رەڤاندنا چەکێ قەدەغەکری دگەل سووریا و کۆلانا کون و کارێزین بن عەرد ل دەشت و چیایێن شنگال ب مەرەما خرابکاریێ.
12- مایتێکرنا چەکدارێن P.K.K د ناڤ کەمپان دا و تێکدانا رەوشا خەلکێ سڤیل یێ شنگالێ و سۆتاندنا ب سەدان خیڤەتێن ئاوارەیان، پێخەمەت تێکدانا رەوشا دەڤەرێ و دروستکرنا ئالۆزیان ل کوردستانێ.
ئەرێ پشتی ئەڤان راستیا هەمووان نوی سەرۆکێ P.K.K یێ زیندانی کری خۆ کریە خۆدانێ ئێزدیان ل شنگالێ و دلێ وی مایە ب خەلکێ شنگالێ ڤە و ڤیایە ئەوان ژ چی بپارێزیت و بۆچی د ئەڤێ قووناغا هەستیار دا، بتایبەت پشتی کو هێزێن ئەمریکا و هەڤپەیمانا ژ ئیراقێ دەرکەڤتین و هاتینە ڤەکێشان، ئەڤ داخۆیانیە هاتەدان و داخوازا مانا چەکدارێن پارتیا خۆ کر ژ بۆ پارازتنا خەلکێ ئێزدی ل شنگالێ یان ژی تێکدانا رەوشا کوردستانێ ئارمانجا ویە و چاڤێ وان ب ئارامیا ئەڤی پارچەیێ ئازاد رانابیت.
ل داویێ فەرە هەر کەسەک قەوارەیێ خۆ یێ دروست بزانیت و سیاسەتێ ژی بنەمایێن خۆ یێن تایبەت هەنە و شنگالێ ژی خودانێ خۆ هەیە و جڤاکێ ئێزدی ل ژێر چەترا پارتی دیموکراتی کوردستان و دادپەروەری و حیکمەتا جەنابێ سەرۆك بارزانی و سەرکردایەتیا پارتی دیموکراتی کوردستان و حکومەتا کوردستانێ یا پارازتیە و هەر دێ یا پارازتی مینیت و باشترە بۆ سەرۆکێ P.K.K خەما هەر بهۆستەکێ ژ خاکێ باکورێ کوردستانێ بخۆت و شنگالێ ژی بۆ شنگالیا و کوردستانیا ب جی بهێلیت و سنوورەکی بۆ مایتێکرنا چەکدارێن خۆ دانیت.
