ئاكپارتی: بلا كه‌س به‌حسێ پرسا كوردی ل توركیا نه‌كه‌ت
ئه‌ڤرۆ:
سه‌رۆكێ فراكسیۆنا ئاكپارتیێ ل په‌رله‌مانێ توركیا راگه‌هاند كو پرسا كوردی ل توركیا نینه، ئاكپارتیێ شیا د ده‌مێن بۆری دا گه‌له‌ك گوهۆرینان بكه‌ت و ئاسته‌نگیێن ل هه‌مبه‌ر زمان و كه‌لتورێ كوردی ل توركیا نه‌ماینه، یێن نها به‌حسێ پرسا كوردی دكه‌ن وان دڤێت ئاكپارتیێ لاواز بكه‌ن، چونكو ل توركیا پرسا كوردی نینه و پرسا تیرۆرێ هه‌یه و دڤێت ب رێیێن سه‌ربازی بهێته چاره‌سه‌ركرن.
ئه‌مین ئاكباش ئوغلۆ ئه‌و یه‌ك ژی دیار كر كو نها هنده‌ك هێز ل توركیا ژ به‌ر هه‌لبژارتنان جاره‌كا دی باسێ پرسا كوردی دكه‌ن و وان دڤێت ب ڤی ره‌نگی ده‌نگێن كوردان بده‌ستڤه بینن، لێ بۆ هه‌ر كه‌سه‌كێ ئاشكرایه كو ئاكپارتیێ پرسا كوردی چاره‌سه‌ر كریه و نها پرسا تیرۆرێ ل توركیا هه‌یه.
ل هه‌مبه‌ر داخۆیانیا سه‌رۆكێ فراكسیۆنا ئاكپارتیێ په‌روین بولدان هه‌ڤسه‌رۆكا هه‌ده‌پێ ژی راگه‌هاند كو ئاكپارتیێ دڤێت وه‌كو ده‌ستهه‌لاتێن به‌ری نها ل توركیا ب رێیا سه‌ربازی ل گۆر خوه پرسا كوردی چاره‌سه‌ر بكه‌ت لێ كا چاوا ده‌ستهه‌لاتێن به‌ری نها نه‌شیان ب رێیا سه‌ربازی پرسا كوردی چاره‌سه‌ر بكه‌ن نها ئاكپارتی ژی نه‌شێت و ژ به‌ر هندێ ژی دڤێت ئاكپارتی راستیا هه‌ی قه‌بوول بكه‌ت، چونكو ل توركیا پرسا كوردی هه‌یه و نه‌هاتیه چاره‌سه‌ركرن و ئاكپارتی نه‌شێت پرسا كوردی ژی چاره‌سه‌ر بكه‌ت، چونكو نها ئاكپارتی وه‌كو پارتا بزاڤا نه‌ته‌وه‌په‌رست یا توركیا سه‌ره‌ده‌ریێ ل گه‌ل پرسا كوردی و پرسێن دی یێن توركیا دكه‌ت و ژ به‌ر هندێ ژی ره‌وشا ناڤخوه‌یی یا توركیا گه‌له‌ك ئالۆزه و ده‌ستهه‌لاتێ ژی چو پرۆژه بۆ چاره‌سه‌ریێ نینن.
ئه‌و یه‌ك د ده‌مه‌كێ دایه كو به‌ری نها سه‌رۆكێ گشتی یێ پارتا كۆماریا گه‌ل راگه‌هاند كو وان دڤێت پرسا كوردی ل په‌رله‌مانێ توركیا و ل گه‌ل هه‌ده‌پێ چاره‌سه‌ر بكه‌ن، چونكو هه‌ده‌په پارته‌كا قانوونی یه و ب ده‌نگێن خه‌لكی چوویه په‌رله‌مانی و دڤێت ل گه‌ل هه‌ده‌پێ پرسا كوردی بهێته چاره‌سه‌ركرن، پارتێن دی یێن ئۆپۆزسیۆنا توركیا ژی پشته‌ڤانیێ ل هه‌لوه‌ستێ پارتا كۆماریا گه‌ل دكه‌ن و دخوازن پرسا كوردی ل په‌رله‌مانی بهێته چاره‌سه‌ركرن، لێ ئاكپارتی ده‌مه‌كه دبێژیت كو وان پرسا كوردی چاره‌سه‌ر كریه و پارتا كۆماری ژ به‌ر هه‌لبژارتنان به‌حسێ پرسا كوردی دكه‌ت.
