ئالۆدەبوون دبیتە ئەگەرێ تێکچوونا تاکێن جڤاکی
زاخۆ، دلۆڤان هالۆ:
چارەسەرکارەکێ دەروونی دیار کر، بێکاری و نەبوونا دەرفەتێن کارکرنێ گەنجان بەرهەڤ دکەن بۆ تووشبوون ب جۆرێن جودایێن ئیدمانێ و گۆت؛ پشتگوهـ خستنا گەنجان جڤاکی تووشی تێکچوونێ دکەت.
چارەسەرکارێ دەروونی محەمەد ڕۆژبەیانی د دیدارەکێ دا بۆ ڕۆژنامەیا ئەڤرۆ دیار کر کو ژلایێ دەروونیڤە ئیدمان ب شێوەیەکێ ئێکسەر ل دەف کەسەکێ دروست نابیت و گۆت؛ بەلکو ب چەندین پێنگاڤان درست دبیت و ئەگەرێن سەرەکی یێن ئیدمانێ ژی ل دەف گەنجان د جڤاکی دا بێکاری و خرابیا ڕەوشا ئابوورییە.
ڕۆژبەیانی ئاماژە ب وێ چەندێ ژی کر کو ئیدمانێ چەندین جۆرێن خوە هەنە وەکو ئیدمانا ماددەیێن کحۆلێ و ئیدمانا مادەیێن بێهۆشکەر و چەندین جورێن دی و گۆت؛ دڤێت ئەم بزانین کو هەر دیاردەیەکا جڤاکی دبیتە ئاریشە و ئەڤ ئاریشە ژی دبنە ئیدمان و ئەڤ چەندە ژی دبیتە ئەگەرێ تێکچوونا تاکێن جڤاکی.
چارەسەرکارێ دەروونی دیار کر ژی، گەنج تەخەکا گرنگ یا هەر جڤاکەکێ نە، چونکی گەنجی هێز و شیانێن مەزن هەنە و پێدڤیە مفا ژ هێز و شیانێن گەنجی بهێنە وەرگرتن و گرنگی پێ بهێتە دان و گۆت؛چونکی ئەگەر گەنج بهێنە پشتگۆهـ هاڤێتن و د بێکار و ئارمانج بن و شیانێن پێکئینانا خێزانێ نەبن دێ تووشی هندەك جۆرێن ئیدمانێ بن.
محەمەد ڕوژبەیانی زێدەتر گۆت: حوکمەتێ و ڕێکخراوێن جڤاکێ مەدەنی و ڕاگەهاندنێ کاریگەری ل سەر کێمبوونا جۆرێن ئیدمانێ هەیە و دشێن هاریکار بن و گۆت؛ لەوڕا پێدڤیە گرنگیەکا زێدەتر ب ڤی بابەتی بهێتەدان داکو ئەم ببینە خودان جڤاکەکێ ساخلەم.
