ئاوارە ژ نێزیكبوونا ژڤانێ دائێخستنا كەمپان دلگران بووینە
لەزگین جوقی:
ئاوارێن شنگال دناڤ كەمپان دا ژ بریارا دائێخستنا كەمپێن ئاواران دلگرانبووینە ودبێژن: وەزارەتا كۆچ و كۆچبەرێن ئیراقێ فشارەكا مەزن ل ئاوارە دكەت بۆ دائێخستنا كەمپان و هێشتا رەوشا شنگال یا باش نینە و گەلەك گرۆپێن چەكدار دناڤ شنگالێ دا هەنە.
فەرحان، ئێكە ژ ئاوارێن شنگال ل كەمپا شاریا دژیت بۆ رۆژناما ئەڤرۆ دیاركر «ژ ترسا دائێخستنا كەمپان وزارەتا كۆچ و كۆچبەرێن بریار دایە ل دووماهیا ڤێ هەیڤێ كەمپ نەمینن و بهێنە گرتن، ئەم نەچاربووینە ناڤێن خۆ بۆ زڤرینا شنگالێ تۆماربكەین. ب گوژمێ چوار ملیۆن دیناران نەشێن خانی ئاڤا بكەین، دەمێ ئەم زڤرینە شنگال ژی چو خزمەت بۆ مە ناهێنە كرن و دێ مینن بێ خزمەتگوزاری».
خال حسێن، ئاوارە شنگالێ یە ل شاریا ئاكنجیی یە بۆ رۆژناما ئەڤرۆ دیاركر:» ئاوارە گەلەك ژ بریارا وەزارەتا كۆچ و كۆچبەرێن ئیراقێ دلگرانبووینە، ژبەركو ئەو خێزانێن دزڤرنە شنگال تووشی ئاریشەیان دبن، ژبەر نەبوونا تەناهی و پرۆژان، ب راستی ژی وەزارەتا كۆچ و كۆچبەرێن ئیراقێ گەلەك فشاران ل ئاواران دكەن كەمپان بجهبهێلن و كەمپ بهێنە دائێخستن».
حەسەن قاسم، موختارێ گوندێ حەردان ل قەزا شنگال راگەهاند، گەلەك جاران مە داخواز ژ حوكمەتا ئیراقێ ب تایبەتی ئیدارا نەینەوا كریە، پرۆژەیێن خزمەتگوزاری ل حەردان بهێنە بجهئینان، دا كو ئاوارە بشێن ڤەگەرن و هەتا نوكە داخوازیێن مە نەچووینە د وارێ بجهئینانێدا و پرۆژە ناهێنە چێكرن، لەورا ئاوارە نەشێن ڤەگەرن، خەلك د رەوشەكا نەباشدایە ب ئەگەرێ نەبوونا پرۆژان».
پیر دەیان، رێڤەبەرێ كۆچ و كۆچبەر و بەرسڤدانا قەیرانان ل پارێزگەها دهۆكێ بۆ ئەڤرۆ راگەهاند، 15 كەمپێن ئاواران ل پارێزگەها دهۆكێ و ئیدارا سەربەخۆیا زاخۆ هەنە و چو كەمپ ناهێنە دائێخستن، حوكمەتا هەرێما كوردستانێ هەڤكاریا هەموو كەمپێن ئاواران ل دهۆكێ دكەت و دێ هاریكاری و پشتەڤانیا حوكمەتا هەرێما كوردستانێ بۆ ئاواران یا بەردەوام بیت و چو كەمپ ناهێنە دائێخستن».
