ئـەرێ نڤیسكار، پەیڤ، رستە و قەلەم ژ هەژی رێزلێنانێنە؟
عەبدولعەزیز محسن بارزانی
دێ هەولدەم؛ بەلكی بشێم د ناڤەرۆكا بابەتی دا بەرسڤا مانشێتی بدەم، چونكو بەرسڤدانا ڤی بابەتی بەرپرسیارەتیەكا ئێكجار مەزنە.
ئەز دبێژم بەلێ پڕانی نڤیسكارێن ژهەژی و پڕانی پەیڤ و رستە و قەلەمێن خزمەتا مرۆڤایەتیێ و نیشتمانپەروەریێ دكەن؛ ژ هەژی رێزلێنانێن هەژینە؛ ژبەركو كارتێكرنەكا مەزن ل سەر ژیانا تاك و جڤاكا مرۆڤایەتیێ ب گشتی هەیە.
– پەیڤ: ئەگەرێ ڤەگوهاستنا هزر و هەست و پێزانینایە.
پەیڤێن باش دشێن دلی خۆش بكەت و ئاریشەیان چارەسەر بكەت.
– رستە: پەیڤان د چارچووڤەیێ راماندار دا رێك دئێخیت و هزر و پەیامێ ب رۆهنی دگەهینیت.
– قەلەم: نیشانا زانست و نڤیسین و پاراستنا مێژوو و كولتووری یە، گەلەك گوهۆرینێن مەزن د مێژوویێ دا ب هێزا قەلەمی دەستپێكرینە، هەروەسا د كولتوورێ كوردی دا و گەلەك كولتوورێن دی دا قەلەم و پەیڤ مینا ئالاڤێ زانایی و رەوشەنبیریا ب بها دهێنە زانین.
دیسا من دڤێت بێژم نڤیسكار ژ هەژی رێزلێنانێ یە؟
بێ دودلی و بێ هزركرن دێ بەرسڤێ دەم و بێژم بەلێ نڤیسكار ژ هەژی هەمی جۆرێن رێزلێنانێ یە، چونكو ژ ئەگەرێ (هزركرنا باش – پێشكەشكرنا پێزانینان – ئەزموون و شیانێن نڤیسینێ كو خزمەتێ ب جڤاكێ دكەت).
لێ چێنابیت رێزلێنان ب ئەگەرێ ناڤونیشانێن نڤیسكاری ڤە بیت؛ بەلكو دڤێت پەیوەندی ب:
– راستگۆیی و ئەمانەتداریا نڤیسینێ ڤە بیت.
– خزمەتكرن ب زانست و كولتوور و هشیاریا جڤاكی ڤە هەبیت.
– رێزگرتن ل راستی و مافێن خەلكی ڤە هەبیت.
– بەرپرسیارەتی ل بەرانبەر پەیڤ و هزرێن خۆ هەبیت.
نڤیسكار دشێت كارتێكرنەكا گەلەك باش یان خراب ل سەر جڤاكی هەبیت، ژبەر هندێ دڤێت رێزلێنان گرێدایی بیت ب كارێن باشێن نڤیسكاری ڤە.
لەورا رێز ل وی نڤیسكاری بهێتەگرتن؛ ئەوێ خۆدان شیان و دانا و بها و خۆدانێ هزرێن داهێنەری و مرۆڤەكێ ماندیبوویی د خزمەتا جڤاكا و مرۆڤایەتیێ دا.
· رێزلێنان ل نڤیسكاری چ رامانەكێ ددەتە جڤاكێ؟
د بەرسڤا ڤێ پرسیارێ دا؛ دەمێ رێز ل نڤیسكارەكێ دهێتەگرتن چەند پەیامەكێن راماندار و گرنگ هەنە؛ ئەوژی:
– بهایێ زانست و هزركرنێ نیشا ددەت، كو جڤاك زانست و خویندنێ و هزركرنێ ب بها دزانیت.
– پشتەڤانی ل ئازادیا رادەربرینێ، ئانكو رێزگرتن ل نڤیسكاری واتە رێزگرتنە ل مافێن خەلكی بۆ دەربرینا بیر و بۆچوونان.
– هاندانا داهێنانێ و بەرهەمئینانێ دەمێ رێز ل نڤیسكاران دهێتەگرتن كەسێن دی ژی هان ددەن بۆ ڤەخویندن و نڤیسینێ.
– پاراستنا كولتوور و زمانی نڤیسكاران گەلەك جاران پارێزەرێن زمان و میراتێ هزریا گەلێ خۆنە.
– ئاڤاكرنا جڤاكەكێ هشیارتر هزر و نڤیسین هاریكاریا خەلكی دكەت، كو پرسیار بكەن و فێرببن و باشتر بریارێ بدەن دەمێ رێز ل نڤیسكاری دهێتە گرتن نیشانا هندێ یە كو جڤاك رێزێ ل (هێزا هزرێ) و قەلەم ب باشتر دزانیت ل (هێزا توندوتیژیێ).
دەمێ رێز ل نڤیسكاری دهێتە گرتن ناڤهاتی چ هەستەك بۆ دروست دبیت؟
رەنگە بەرسڤا ڤێ پرسیارێ هندەك یا ب زەحمەت بیت، لێ ئەز ژی دێ ب ڤی رەنگی بەرسڤێ دەم.
دەمێ رێزلێنان پێشكەشی نڤیسكارەكێ دهێتەكرن هندەك هەستێن ئەرێنی ل دەف دروست دبن ئەوژی:
– دلخۆشی و خۆشحالی، چونكو هەست دكەت بەرهەمێ زەحمەت و ماندیبوونا كارێ خۆ دیت كو چەندێ ب بهایە.
– باوەری ب خۆ، چونكو پشتراست دبیت ل هندێ كو بەرهەم و هزرێن وی یان وێ كارتێكرن هەیە.
– هەستێ بەرپرسیارەتیێ زێدەتر، چونكو دزانیت چاڤەرێی لێ دهێتەكرن كو بەرهەمێن باشتر پێشكەش بكەت.
– هاندان بۆ بەردەوامبوونێ ل نڤیسین و داهێنانێ دا.
– سوپاسگوزاری بەرانبەر وان كەسێن كار و هەولێن وی ب بها زانینە.
هەلبەتە هەر ئێك ژ ڤان خالان هویركارێن دی هەنە كو ئەگەر پێدڤی بوو ئەز دشێم گەلەك ب باشی ل سەر باخڤم.
· مەرەما من یا سەرەكی ل ڤێ نڤیسینی ئەوە كو ئەڤە دەمەكە بەشێ رەوشەنبیری و راگەهاندنا مەكتەبا سیاسیا پارتی دیموكراتی كوردستان، رێورەسمێن ژ هەژی ل نڤیسكار و پەیڤ و رستە و قەلەمێن خۆدان شیان دگریت ل سەرانسەری كوردستانێ نەخاسمە دەڤەرا بەهدینان.
بۆ نموونە هندی ئەز د وان رێورەسمان دا بەرهەڤبوویم؛ ئەوژی رێورەسمێن رێزلێنانێ بۆ نڤیسكاران (بەدرخان سندی، عەبدولرەحمان مزووری و محسن قۆچان). دوماهیك جار ل باخچەیێ ئێكەتیا نڤیسەرێن دهۆكێ، رێورەسمەكێ ب بها بۆ نڤیسكار و خۆدانێ (١٧) پەرتووكان (محسن قۆچان) هاتەدانان؛ بەرێز (دكتۆر سالار عوسمان) د پەیڤا خۆ دا ب رەنگەكێ و ب هەستەكێ، مرۆڤایەتی هندەك پەیڤ گۆتن سەرنجا بەرهەڤبوویان راكێشا و دیسا د پەنەلێ نڤیسكارێ مەزن (موئەیەد تەیب) دا وەسا بەحسێ محسن قۆچانی كر، ڤیانا مە هێشتا زێدەتر لێهات و سترانبێژی پەیڤێن وی ل گەل ئامیرێ مۆزیكێ تێكهەلكرن و گۆتن ئەم هەمی برینە جیهانەكا دی.
لێ ئەوا جهێ دلخۆشیێ و دەستخۆشیی، پشتی رێورەسمان من هەستكر ئارامیەكا دەروونی د ناڤ كۆما نڤیسكاران دا پەیدابوویە و هەر ئێك ڤان رێورەسمان و رێزلێنانێ بخۆ دزانیت. من پرسیار ل نڤیسكارێ مەزن (فازلێ عەمەری) كر و من گۆتێ: ئەز ئەڤرۆكە گەلەكێ دلشادم و بەرسڤا من دا و گۆت: ئەز بۆ دو كەنالێن راگەهاندنێ ئاخفتیمە و من یا گۆتی ئەڤ رێزلێنانە بۆ هەمی نڤیسكارانە و ئەم هەمی د ئارام و بەختەوەرین. لەورا ئەز شانازیێ دكەم كو كادرێ پارتیمە و حزبا من ئەڤ باوەریە هەیە كو دڤێت رێز ل نڤیسكار و هزرمەندو پەیڤ و رستە و خۆدان قەلەمێن نیشتمانپەروەر بهێتەگرتن دەستخۆشیێن بێ سنوور بۆ هەڤال (سالار عوسمان) بەرپرسێ بەشێ رەوشەنبیری و راگەهاندنا پارتی و ستافێ وان بۆ هزر و دیدگا و پەیڤ و گۆتار و چالاكیێن ب ڤی رەنگی.
ل داویێ دێ بێژم راستە هەمی مرۆڤ پێدڤی ب رێزگرتنێنە، لێ هندەك ئانكو نوخبە پێدڤی ب رێزلێنانێنە.
