پرسیار: ئـەز مەزنترم یـان تـو؟ یـان لایـەنـەكـێ سیاسـی؟ یـان كـوردسـتان؟
عەبدولعەزیز محسن بارزانی
وەكو هەڤوەلاتیەكێ كوردستانێ ژ نیڤا دلێ خۆ هەواردكەم و دبێژم: ئەرێ لایەنێن سیاسی هنگ دزانن ئەڤە نێزیكی (600) رۆژانە؛ هەلبژارتنێن پەرلەمانێ كوردستانێ هاتینەكرن؟ ل كیژان وەلاتی ئەڤە قەبوولە و د ناڤ كیژان جڤاكی ئەڤە هاتیە قەبوولكرن.
– ئەرێ هنگ دزانن ئەڤە زێدەترە ژ (١٠) سالان، كوردستان د شەڕ و ئالۆزی و قەیرانان دا دەربازدبیت و گەلێ كوردستانێ گەلەك و گەلەك وەستییا؟
– پرسیارەكا ژ دل، ئەرێ لایەنێن سیاسی هنگ هزرا ڤی گەلێ مەزلوم و زەحمەت دیتی و ماندی ناكەن؟
– ئەرێ لایەنێن سیاسی مانە هەوە خەبات كریە و شەهید داینە، داكو گەلێ كوردستانێ ببیتە خۆدان پەرلەمان و حوكمەت و ئەو ب خۆ حوكمی ل خۆ بكەت ب رەنگەكێ دیموكراسی؟
– ل دویڤ پێزانینان و ل دویڤ قانوونا حزبێن كوردستانێ، نێزیكێ (50) حزبان مولەت ل وەرەزارەتا ناڤخۆ وەرگرتینە، پرسیار باشە كانێنە ئەڤ (50) حزبە؟ بۆچی ناهێن پەرلەمانی كاڕا بكەن د خزمەتا خەلكی دا؟
– باشە بۆچی پاراستن و خزمەتكرنا گەلێ كوردستانێ بتنێ ل سەر ناڤێ پارتی هاتیە تاپۆكرن، پا كارێ هەوە چییە؟
– باشە دەمێ پارتی و جەنابێ سەرۆك بارزانی دەستپێشخەریان بۆ دەربازبوونا ژ ڤێ قەیرانا سیاسی دكەن، بۆچی هنگ پێشوازیێ ب پراكتیكی ل ڤێ دەستپێشخەریا پارتی ناكەن؟
– باشە ما هەوە سۆز نەداینە دەنگدەرێن خۆ، دێ ل پەرلەمانێ كوردستانێ بنە دەنگێ راستەقینە یێ وان، هنگ بۆچی ناچن پەرلەمانی كاڕا بكەنە ڤە؟.
-باشە مانە ل هەمی دونیایێ پەرلەمان جهێ هەڤڕكیێن سیاسینە، بۆچی هنگ پێكڤە ناكۆكیێن خۆ نابەنە پەرلەمانێ كوردستانێ؟.
– بەسە بلا بەس بیت مێژوو رەحمێ ب هیچ كەسەكێ نابەت، پەرلەمان بەرهەمێ خوین و خوه و زەحمەت و ماندیبوونا گەلێ كوردستانێ و قارەمانییا پێشمەرگەیە.
نەك مولكێ فلان لایەنی و فلان لایەنێ دی یە، پەرلەمان مولكێ گەلێ كوردستانێ یە و دڤێت هەمی لایەنێن سیاسی بۆ وان خەلك و پەرلەمان دگرنگ بن؟
– رۆژانە ب هزارا هەڤوەلاتیێن كورستانێ پرسیاران ژ ئێكودو دكەن و دبێژن وەسا دیارە هیچ لایەكێ سیاسی نیەتا رێكەفتن و كاڕاكرنا پەرلەمانێ كوردستانێ نینە.
– لایەنێن سیاسی دڤێت هنگ هەمی گەلەك باش بزانن مێژوویێ دو دەرگەهێن هەین:
١- دەرگەهێ گولدانێ.
٢- دەرگەهێ زبلدانێ.
لەورا هەر ئێك ژ هەوە د دەما گەلێ كوردستانێ و كاڕاكرنا پەرلەمانێ كوردستانێ دا نەبیت، پشتراستبن دێ چنە د دەرگەهێ زبلدانێ دا.
– لەورا گازی هەوە هەمیان دكەین، وەكو چاوا جەنابێ سەرۆك بارزانی د پەیاما جەژنێ دا گۆتی (بەسە ئەڤ ب خۆ خۆری یە) و ئەز ئەزۆكیێ بهێلین و حزبایەتیا بەرتەنگ نەكەن و بلا خەما مەزنا هەوە گەلێ كوردستانێ و قەوارێ دەستووری یێ هەرێما كوردستانێ و پاراستنا وێ بیت.
– گرنگە هەمی لایەن باش هزرا خۆ بكەن و ژ خەو راببن و دەستپێشخەریێ بكەن و بێژن (كوردستانێ ژ هەمی كەسەكێ و حزبەكێ و لایەنەكێ مەزنتر و پیرۆزتر و گرنگترە).
– دێ دوبارە بیرا هەمی لایەكێ ئینمەڤە، ئەڤە (600) رۆژ دەربازبوون، هێشتا هەوە هزرا خۆ نەكریە؟ دەڤەرا مە یا ل بن گوهۆرینێن مەزن دا، ئێكگرتنا لایەنێن سیاسی و كاڕاكرنا پەرلەمانێ كوردستانێ و پێكئینان و كابینەیا (10) پاراستنا گەلێ مە و دەستكەفتیێن مەیە و ئەڤا مە هەی دێ بۆ مە مینیت و ئەوا مە دڤێت ژی دێ ب دەستڤە هێت.
– بێهنا خەلكی تەنگ بوویە، ژبلی گەشتیارێن بیانی خەلكێ مە خۆشیێ ب جوانیا كوردستانێ نابەت، ژبەر پەرت و بەلاڤبوونا لایەنێن سیاسی و نە ئێكگرتنا وان ژ ڤێ رەوشا ئالۆز.
– بەردەوام مە گوهلێ بوویە ئێكگرتن هێڤێنێ هەمی سەركەفتنایە و ب كاڕاكرنا پەرلەمانێ كوردستانێ دێ دەرگەهێن خێرێ بۆ گەلەك كارێن دی ڤەبن.
– ل دوماهیێ دێ بێژم ئەرێ ئەز یان تۆ؟ یان لایەنەكێ سیاسی؟ یان كوردستان؟.. دڤێت بەرسڤا مە هەمیان ب دەنگێن بلند ئەو بیت ببێژین (كوردستان، كوردستان، كوردستان یان نەمان).
