ئـەنفال و كـۆمكـوژی بـەردەوامە
دلـۆڤـان ئـاكـرەیـی
ئەنفال و كۆمكوژی ب دووماهی نەهاتینە، شێواز و ڕەنگ گوهۆڕینە، لێ ئارمانج ئێكە! ئەگەر دیرۆكا نەخۆش و پڕ ژ قوربانیا گەلی كورد بژمێرین، ئەم دبینین كو كۆمەڵكوژی، جینۆساید و شالاوێن ئەنفالێن ڕەش ب تنێ ل سالێن دەربازبووی و ب كۆمكوژییا بارزانییان یان كیمیابارانكرنا هەلەبجەی ب دیماهیك ناهێن؛ بەلكو ئەڤ سیاسەتا ڕەگەزپەرست و تێكدەرە هەتا نوكە ژی ب شێواز، ڕەنگ و ڕێبازێن جودا و ب رێكا فشارێن سیاسی، ئابووری، دەستووری و ئەمنی ل دژی هەرێما كوردستانێ و خەلكێ وێ یێ بێتاوان بەردەوامە.
كۆمەلكوژیا نوكە یا ل دژی هەرێما كوردستانێ هێتەكرن، نە ب تنێ فیشەك و تۆپ بارانە، بەلكو كومكۆژیا ب پلە و بەندا ئابووری، بڕینا لق و پۆپێن ژیانێ و دەست ب سەرداگرتنا مافێن رەوا یێن خەلكێ كوردستانێ یە.
بەردەوامیدان ب رێگری كرن و قەدەغەكرنا ڤەگەڕانا خەلكێ ڤەگوهاستی و ستەملێكری بۆ دەڤەرێن خۆ یێن ڕەسەن، و ڕێگریكرن لە ئاڤەدانكرنا وان جهێن دیرۆكی.
پشتگوه ـ خستن و ڕەتكرنا جێبەجێكرنا ماددەیا ١٤٠ یا دەستووری، یا كو بوویە فاكتەرەكێ سەرەكی بۆ هەلاویستن و پاشخستن و دەست ب سەر داگرتنا مافێن دیرۆكی یێن دەڤەرێن كوردستانیێن دەرڤەی ئیدارەیا هەرێمێ.
پێگیرنەبوون ب پڕەنسیپێن فیدرالی و دروستكرنا توڕ و ئاستەنگان ل ڕێیا پێشڤەبرن و فرۆتنا پەترۆل و سامانێن سروشتی یێن هەرێما كوردستانێ. سزایێن ئابووری و سیستەماتیك ب كێمكرن، پاشخستن و نەهنارتنا پشكا بودجە و شایستەیێن مالی یێن هەرێما كوردستانێ ژ بەغدا ڤە، كو باندۆرەكا نەرێنی ل سەر هەمی كەرتێ گشتی هەی.
بەردەوام بكارئینانا مووچەی و ژیان و گوزەرانا مووچەخۆر، فەرمانبەر و خانەنشینێن هەرێمێ وەكو كارتەكا فشارا سیاسی و یاریپێكرنێ ل دژی قەوارەیا دەستوورییا هەرێمێ.
تێكدانا سەقامگیرییا ئەمنی و هەرێمی ب رێكا هنارتنا درۆن، مووشەك و گرۆپێن تێكدەر بۆ ڤێ دەڤەرا ئاراما هەرێمێ، د پێناڤی ژناڤبرنا ژێرخانا ئابووری و وێرانكرنا ئارامیا وەلاتییان دا.
نەدانا پشكا هەرێمێ وەك پارێزگەهێن دی یێن ئیراقێ ژ پەتڕۆل، غاز و سۆتەمەنییێ ب بهایێ پالپشتیكری و جیاكارییا ڕوویار ل دژی وەلاتییێن هەرێمێ.
بێبەشكرنا گەنج و دەرچوویێن زانكۆ و پەیمانگەهێن كوردستانێ ژ مافێ دامەزراندنێ ل سەر ئاستێ دەزگەهێن فیدرالی ب ڕێژەیەكا دادپەروەرانە و ل گۆرەی هەژمارا ئاكنجێیان.
نەهنارتن، پاشخستن و ڕاگرتنا پارە و شایستەیێن مالی یێن گەنمێ جۆتیارێن هەرێما كوردستانێ، یێن كو سال بە سال ماندووبوونا وان دهێتە پشتگوە خستن و ئابوورێ جووتیاران تووشی زیانێن مەزن دبن. ئەڤە و دەهان ئاریشە و كێشەیێن هەلاویستیێن دی نیشاددەن كو سیاسەتا برسیكرن، ژناڤبرن و ستەمكاریا ل دژی هەرێما كوردستانێ نەهاتیە راوەستاندن و هەتا نوكە ژی بەردەوامە. لێ ب هەبوونا خۆڕاگری، ئیرادەیا پولایین و هشیاریا خەلكێ كوردستانێ، هەرێما مە دێ هەردەم سەربەرز بیت و ژ ڤان تاقیبوون و فشارێن مەزن سەركەفتی دەردكەڤیت.
