ئه‌رێ دێ ئه‌زموونا رۆژئاڤا ل رۆژهه‌لاتێ كوردستانێ ژی دوباره بیت؟
گوهۆرینێن ئه‌ڤرۆكه ل كوردستانێ و رۆژهه‌لاتا ناڤین و كاریگه‌ریا وان ل سه‌ر رۆژهه‌لاتێ كوردستانێ رۆژ ب رۆژێ پتر ره‌نگێ خوه دیار دكه‌ن، ئاشكرایه كو ئیرانێ رۆله‌كێ سه‌ره‌كی د گوهۆرینێن ل ده‌ڤه‌رێ دا هه‌یه و ناخوازیت چو گوهۆرینه‌ك ل دژی به‌رژه‌وه‌ندیێن وێ دا دروست ببن، ژ به‌ر هندێ ژی ئیرانێ ب هه‌موو ره‌نگه‌كێ بزاڤ كر كو رژێما به‌شاری ژناڤ نه‌چیت و ئاڤاكرنا كانتۆنێن رۆژئاڤایێ كوردستانێ ژی تا راده‌یه‌كێ باش د به‌رژه‌وه‌ندیا ئیرانێ دا بوون و چه‌ندین جاران ژی به‌رپرسێن ئیرانێ پشته‌ڤانیا خوه بۆ وان كانتۆنان دیار كرن.
لێ نها ره‌وشه‌كا جودا ل رۆژهه‌لاتێ كوردستانێ هه‌یه، كاریگه‌ریا هزرا راگه‌هاندنا ده‌وله‌تا كوردی ل باشورێ كوردستانێ ل سه‌ر هه‌ر تاكه‌كێ رۆژهه‌لاتی هه‌یه، خالا دی دڤێت ژبیر نه‌كه‌ین كو هه‌ر ل ده‌مێ چوونا بارزانیێ نه‌مر بۆ مهابادێ و پاشی به‌رده‌وامیا شۆره‌شا باشورێ كوردستانێ ل رۆژهه‌لات و مانا پارتی دیموكرات كوردستان ل رۆژهه‌لاتێ كوردستانێ و خه‌باتا وان هه‌تا سه‌رهلدانا ٩١ هه‌موو كاریگه‌ریا خوه ل خه‌باتا رۆژهه‌لاتێ كوردستانێ كریه و ئه‌ز دشێم بێژم كو هه‌ر دو پارچێن كوردستانێ د گه‌له‌ك بیاڤان دا نێزیكی هه‌ڤدو نه.
یا دی دڤێت نه‌هێته ژبیر كرن كو دو پارتێن ب هێز ئه‌و ژی حزبا دیموكراتا كوردستانا ئیرانێ و كۆمه‌له ب سالان شه‌ر كرینه و خودانێ هزاران شه‌هیدانه، كه‌لتورێ نه‌ته‌وی و میراسا كو ئه‌ڤرۆكه ل رۆژهه‌لاتێ كوردستانێ هه‌یه گه‌له‌ك ب هێزه و ئه‌ز باوه‌ر ناكه‌م كو خه‌لكێ رۆژهه‌لاتێ كوردستانێ ب چو ره‌نگه‌كێ رێ بده‌ن پارته‌ك ژ پارچه‌كا دی یا كوردستانێ رابیت و سیسته‌مێ بۆ وان دانێت.
خالا دی دڤێت نه‌هێته ژبیر كرن كو رۆژهه‌لاتێ كوردستانێ ئه‌و جهه كو یه‌كه‌م قوتابخانا كوردی ل سه‌رده‌مێ سمكویێ شكاك لێ هاته ڤه‌كرن و هزرا نه‌ته‌وی ل وێرێ به‌لاڤ بوو. هه‌روه‌سا ئه‌و جهه كو كۆمارا كوردستانێ ل سه‌ر ده‌ستێ پێشه‌وا قازی محه‌مه‌د و ب پشكداریێ بارزانیێ نه‌مر و هه‌ڤالێن وی هاته راگه‌هاندن، روودانێن ل مهابادێ و ئه‌و ره‌وشا كو نها ل رۆژهه‌لاتێ كوردستانێ ده‌ستپێ كریه د راستی دا به‌رده‌وامیا وێ پرۆسێ یه. فاكته‌رێن گرنگ و كاریگه‌ر هه‌بووینه كو هه‌تا نها ل رۆژهه‌لاتێ كوردستانێ بزاڤا كوردی نه‌شیایه وه‌ك پارچێن دیتر ب كاریگه‌رتر بیت و ده‌نگێ خوه بلند بكه‌ت، لێ دڤێت سیاسه‌تا هنده‌ك پارتێن باشور و باكورێ كوردستانێ كو په‌یوه‌ندیێن باش ل گه‌ل كۆمارا ئیسلامی یا ئیرانێ هه‌نه نه‌هێته ژبیر كرن، لێ ئێدی ده‌م هاتیه كو تاكێ رۆژهه‌لاتێ كوردستانێ ژی ل سه‌ر بنه‌مایێ كه‌لتورێ خوه یێ دێرین و ل سه‌ر میراسێ شه‌هیدێن كورد و كوردستانێ ده‌ست ب قۆناغه‌كا نوو بكه‌ت و چریسكا وێ یه‌كێ ل مهابادێ هاته لێدان و ئالۆزیێن وێ دووماهیێ ل كێله‌شینێ ژی بۆ رێگری كرن ل خه‌باتا رۆژهه‌لاتێ كوردستانێ بوو، به‌س ئه‌و یه‌ك سه‌ر ناگریت.
ده‌مێ خالێن ل سه‌ری بده‌ینه به‌رچاڤ بۆ مه دیار دبیت كو خه‌لكێ رۆژهه‌لاتێ كوردستانێ خودان میراسه‌كه و پێدڤی ب هندێ نینه كو پارته‌كا سیاسی ل پارچه‌كا دی یا كوردستانێ رابیت و بۆ وان ستراتیژیه‌كێ دیار بكه‌ت، ئه‌ز دبێژم هه‌كه‌ر هنده‌ك پارتێن كوردی ژ به‌ر به‌رژه‌وه‌ندیێن خوه یێن ل گه‌ل كۆمارا ئیسلامی ده‌ستێوه‌ردانێ د ره‌وشا رۆژهه‌لاتێ كوردستانێ دا نه‌كه‌ن خه‌لكێ رۆژهه‌لاتێ هاریكاریا وان ژی نه‌ڤێت. ژ به‌ر هندێ ئه‌ز دبێژم بلا ره‌وشا رۆژهه‌لات ژی وه‌ك رۆژئاڤا لێ نه‌كه‌ن و بهێلن خه‌لك بخوه بریارێ ل سه‌ر پاشه‌رۆژا خوه بده‌ت و هێشتا چ تشته‌ك چێ نه‌بوویی هنده‌ك یێ هزرا به‌رژه‌وه‌ندیێن خوه ل وی پارچه‌یی دكه‌ن.
