ئه‌ز و ئه‌ز
د. عارف حیتۆ
دلێ من.. په‌لاتینكه‌كا دووره ژ ئاگری، ڤه‌مری چرایێ
ژبۆ هه‌مبێزا گه‌رم دگری، ده‌ردۆره‌كا دوورپێچكری،
ل من خوڕی و ناڤێ من یێ ژ ناسناما من ڤه‌كری.
ئه‌زه‌ك بێناڤ و نه‌مری ژ ئه‌زێ فڕی،
ما دێ ب چ روو به‌رسڤا عه‌شقێ ده‌م و عه‌شق..
زه‌ڤیه‌ك مشتانه‌كری ل سه‌رێ گری!
هه‌ستا من.. قازی قولنگه، بێده‌لنگه ل ئاسمانێ به‌ردڕیاییێ
بوویه دنگه، شه‌به‌نگه مالا گه‌هینێ و قه‌باره‌یێ وێ ب
سه‌نگه. ما دێ ب چ روو به‌ر ب ئۆردیا سه‌ركه‌فتی ڤه
هێم و سترانا بێریێ بێم.. دێم هه‌مه‌ڕه‌نگه و شه‌نگه
رووبارێ هیڤیێ. هه‌ر سۆزه‌كا د تووركی دا مای، به‌نگه
ب مژانكا رۆژێ ڤه و ل سه‌ر په‌ڕێ گولێ هه‌نگه!
چاڤێ من.. تیره تیره‌كا ئیرانیه ل سینگێ دمدم چه‌قیه،
فڕیه ژ كڤانێ ده‌می و د گه‌ل باهۆزێ نڤستیه، ڤه‌بیه
ژ ئه‌نیا ستێره‌كێ و ل ئاهه‌نگا ژ دایكبوونا گیایێ كه‌سك
تووتیه، خوێڕیه ل به‌ر ده‌رێ مه‌زن سه‌مایێ دكه‌ت،
سه‌مایه‌كا دوجان ب شادی و شیلانێ.. سێویه!
ده‌ستێ من.. نافۆره‌یه و ژ ئاڤێ تۆڕه‌یه، ئاڤ ناڤێ من دده‌ته
بای و كۆله‌یه ل به‌ر شاخێ گای. سیدۆری نه ل هیڤیا
مه‌یه! ده‌رگه‌هێ خوه قفلدا و په‌نجه‌ركا وێ مشت په‌رده‌یه.
ته‌رمێ ئه‌نكیدۆی ل پشتا من، بێهن كه‌فتێ و ته‌یران ل سه‌ر
كه‌له‌خێ وی نۆبه‌یه، ده‌ریایه‌كا ل پێشیا منه و ده‌ریا ستاره‌یه!
پێنگاڤا من.. رێكه‌كا ب چه‌پ و چویڕه، دووره چیایێ مه‌ره‌مێ و
ئه‌و كوتركا من هنارتیه هشكاتیێ ویڕه، زویڕه پێلا ل پێلێ
سیار، پاپۆره‌كا پلاستیكی دبن خه‌مان ڤه كه‌سیره و بێ ته‌كبیره،
خه‌تیره هزرا رێژگه‌هێ و د ناڤ ده‌ستێن بۆسایدۆن دا دبیت
نه‌دیره. من نه‌دڤیا د باوه‌شا گۆڕه‌كیدا ببم ئێخسیره و ئه‌ڤ
پێكۆله سترانه‌كا ئه‌زه‌لیا كه‌ڤن و پیره!
دیتنا من.. عه‌ڤره‌كێ سپیێ بێ بارانه، زه‌مانه كو ئه‌و باخچه‌یێ
من تو لێ دیتی له‌یلانه، گۆمانه عه‌شق ل سه‌رده‌مێ بێ
عه‌شقیێ ل بازاڕانه.. ما گونه‌ها من چ بوو كو من حه‌ز
ژ ته كری و ئه‌ڤینا ته ب له‌شێ منڤه له‌رزوتانه! یێ دبێژن
ئێشه‌ك گرانه ئه‌ڤینی.. ستریه‌كێ بژیێن رێكانه!
نزا بۆچی هه‌كو تو د خه‌یالا من دا دنهیێیی…
ژ دیتنا خوه دده‌گرم و ل كۆگایێ وه‌كو متایه‌كێ ستۆك دهه‌لگرم
ئه‌ز و ئه‌ز ب هه‌ڤڕا بووین، ده‌مێ ب دیتنا من ڤه فڕین
به‌ره‌ف فه‌زایه‌ك دوور فڕین..
دا گوله‌كێ ژ باغێ ئیره‌مێ ڤه‌كه‌م و ب پرچا ته‌ڤه كه‌م
یان دا تۆلا خوه ژ خوه ڤه‌كه‌م!
كو رۆژه‌كێ من وه دانای دێ خوه ژ عه‌شقا ته ڤه‌دزم
داكو داخێن دلێ داخدایی پێ نۆژكه‌م و ئه‌ڤ عه‌مرێ مای
ژ هه‌ر غاردانێ قه‌رمیی پڕ تیرۆژ كه‌م..
هه‌می ئه‌وێن به‌ری من چووین ئوتونوپشتم زڤڕاندن
ئه‌ز و ئه‌ز ژی ب هه‌ڤڕا بووین، پێكڤه زڤڕین!…
***
