ئه‌ز و جهـ
عارف حیتۆ
من عه‌شقا خوه كره دده‌ستێ قه‌ده‌رێ دا و
ل جهه‌كێ هێژ نه‌بووی گوند هاته چاندن
كانیكه‌كێ.. بیاڤێ دیتنا من دزی و
هه‌می شعرێن من ژ گوندان ڤه‌ڕه‌ڤاندن
په‌یڤ په‌یڤ زڤڕینه‌ڤه د من دا و بوونه رستك
ئه‌و رستكه، ب ستویێ كانیێ ڤه بۆ هه‌ڤسار
ئه‌و هه‌ڤسارێ په‌یڤان ئه‌ز بووم.
ئه‌زێ هه‌ڤسار به‌ره‌ف جهان ڤه ته‌نگه‌زار
مامه ل هیڤیا موعجیزه‌كێ…
كو من ل جهێ عه‌شقا من لێ، بكه‌ته دار
جه ب گیان و ژیانن، ل به‌ندا جانگی ب ژڤانن
ل به‌ر بای، پلیپتكانێ ب هه‌ستان دكه‌ن و
د له‌پێ ده‌می دا ئێخسیرن.
گورزێن ڕۆژێ.. له‌شێ ده‌می پڕ ڕاڤ دكه‌ن
مینا كوترێن تۆمك ل به‌ر، هه‌رده‌م ترسیایی و ب گومانن
ئه‌ز ب كانیكێ ڤه به‌ند و ژ جهێ عه‌شقا خوه خه‌ریبم
جه ژی وه‌كو مه مرۆڤان حه‌ز ژ خوه دكه‌ن و
ناخوازن كو بێن گوهه‌رتن!
ل به‌ر ئاوازێن ته‌نبۆره‌كا یارسانییان، هاویش دبن و
ل سه‌ر پێژنا سمێن هه‌سپان هشیار دبن.
وه‌ك هه‌ر جاندارێ مشت ژیان، دترسن و ژ تۆپان دره‌ڤن
ل شه‌هیانان خوه كار دكه‌ن و ل ڕۆژێن به‌هیێ،
ب دێمێ عه‌ردی ڤه ته‌ڤن
لێ ئه‌و جهێ من عه‌شقا خوه راده‌ست كری، دكره گری
چ جھ نه‌بوون ره‌شمالا خوه لێ داده‌ت و
دگه‌ل خه‌ونه‌كێ گوهنێلیێ بكه‌ت
جه ب چولان كه‌فت…
عه‌شقا من یا پێڤه نه‌په‌ن، ل چ ئاقاران نه‌بوو ئێتوین
ب كوریا ده‌می ڤه ئه‌قنانه، یا به‌نج كری
پێشبینی یا ژڤانه‌كی ب قه‌ده‌رێ ڤه دبیته با و
د چاڤێن جهی دا دنهیێت.
ئیشه‌ڤ هه‌یڤ دێ سیتاڤێن خوه هه‌لمژیت و
دێ جانه‌كی ژبۆ تبه‌ركێ ڤه‌كوژیت!
یارا من یا بێ جه و مال، د پاخلا من دا ڤه‌شاركری
ب پفه‌كێ.. ژ سینگێ من ده‌ركه‌فت و فڕی
من ناڤێ وێ ل ده‌ف چ كه‌سان نه‌ئینا بوو
لێ ناڤێ وێ “بشكوڕین” بوو…
ل سه‌ر لێڤێن ژنێن كاملان كه‌وچه‌رین بوو
هه‌ر ژنه‌كا دبه‌ر خه‌یالا من را بۆری بشكوڕین بوو.
هه‌كو رووباری بیره‌هی دادعویران و توخیب دبڕین
هه‌كو تیڕۆژكێن هه‌تاڤێ…
ژبه‌ر پنتكێن خوینا ل سه‌ر به‌فرێ دعنڕین
عه‌شقا من یا ل چ ئاقاران نه‌بووی ئێتوین
ب عه‌شوایی، زه‌ڤی یێن گه‌نمێ زه‌ر ددورین
خه‌ریبییه‌كێ بژیێن پێنگاڤێ گرتن و
ڤه‌گه‌ڕانده ئه‌وی جهێ من عه‌شقا خوه راده‌ست كری
خه‌مڕه‌ڤین بوو…!
جه ژی وه‌كو مه مرۆڤان حه‌ز ژ خوه دكه‌ن و
ناخوازن كو بێن گوهه‌رتن!
ل به‌ر ئاوازێن ته‌نبۆره‌كا یارسانییان، هاویش دبن و
ل سه‌ر پێژنا سمێن هه‌سپان هشیار دبن.
***
