ئه‌ڤرۆ دێ حاجيێن كوردستانێ ڤه‌گه‌رن
ئه‌ڤرۆ نيوز، نيوار محه‌مه‌د سه‌ليم:
به‌رپرسێ راگه‌هاندنا وه‌زاره‌تا ئه‌وقاف و كاروبارێن ئاينى ل حوكمه‌تا هه‌رێما كوردستانێ راگه‌هاند كو ئه‌ڤ شه‌ڤه گه‌را ئێكێ يا حه‌جيێن كوردستانێ دێ ب رێيا فرۆكخانا جه‌ده گه‌هيته هه‌ردو فرۆكخانێن هه‌ولێر و سلێمانى و ئه‌ڤ پرۆسه دێ 10 رۆژان يا به‌رده‌وام بيت.
مه‌ريوان نه‌قشه‌به‌ندى به‌رپرسێ راگه‌هاندنا وه‌زاره‌تا ئه‌وقاف و كاروبارێن ئاينى ل حوكمه‌تا هه‌رێما كوردستانێ ل سه‌ر تۆرا كۆمه‌لايه‌تى يا فه‌يسبۆكێ د نامه‌كا ڤه‌كرى دا بۆ كه‌سوكارێن حه‌جيان ديار دكه‌ت كو ئه‌ڤرۆ رێكه‌فتى 9\10\2014 ب شه‌ڤ بڕياره گه‌را ئێكێ يا حه‌جيێن كوردستانێ ب رێيا فرۆكخانا جه‌ده بگه‌هنه هه‌ردو فرۆكخانێن هه‌ولێر و سلێمانيێ.
نه‌قشه‌به‌ندى داخوازێ ژ وه‌لاتيان دكه‌ت كو د رێ و ره‌سمێن ڤه‌گه‌ريانا حه‌جيان دا نه‌كه‌نه قه‌ربالغ و ب گه‌له‌ك ترۆمبێلان نه‌چنه پێشوازيا حه‌جيان ب مه‌ره‌ما وێ چه‌ندێ نه‌بيته قه‌ربالغ و حه‌جى بشێن ب زووترين ده‌م كه‌لۆپه‌لێن خوه وه‌ربگرن و گڤاشتن نه‌كه‌ڤيته سه‌ر ئيدارا فرۆكخانێ.
به‌رپرسێ راگه‌هاندنا وه‌زاره‌تا ئه‌وقاف و كاروبارێن ئاينى ل حوكمه‌تا هه‌رێما كوردستانێ ئاماژه ب وێ چه‌ندێ ژى كريه كو رێژا حه‌جيێن كوردستانێ سێ هزار و 651 كه‌سن و بڕياره ب 10 رۆژان هه‌موو بگه‌هنه كوردستانێ.
