ئه‌ڤ ساله 530 وه‌لاتیان ب روودانێن هاتنوچوونێ گیانێ خوه ژ ده‌ست داینه
هه‌ولێر، قائید میرۆ:
ل گوره‌ی ئاماره‌كا هاتنوچوونا هه‌رێما كوردستانێ ئه‌ڤ ساله روودانێن هاتنوچوونێ ژ سالا بۆری زێده‌تر بووینه و په‌یڤدارێ هاتنوچوونا هه‌رێما كوردستانێ ژی ئاشكرا كر، دو ملیۆن تڕۆمبێل ل هه‌رێما كوردستانێ هاتینه تۆماركرن و زێده‌بوونا هه‌ژمارا تڕۆمبێلان كاریگه‌ری ل سه‌ر زێده‌بوونا روودانێن هاتنوچوونێ هه‌بوویه.
عه‌مید ئه‌سعه‌د مه‌لا كه‌ریم، په‌یڤدارێ هاتنوچوونا هه‌رێما كوردستانێ بۆ رۆژناما ئه‌ڤرۆ دیار كر، هه‌رێما كوردستانێ رۆژا قوربانیێن هاتنوچوونێ ساخ دكه‌ت ب مه‌ره‌ما هشیاركرنا وه‌لاتیان ژ روودانێن هاتنوچوونێ، چونكو ئه‌ڤ ساله روودانێن هاتنوچوونێ گه‌له‌ك ژ سالا بۆری زێده‌تر بووینه و گۆت: “مخابن ئه‌ڤ ساله ژ ئه‌گه‌رێ روودانێن هاتنوچوونێ ل هه‌رێما كوردستانێ سێ هزار و 500 روودانێن هاتنوچوونێ هاتینه تۆماركرن و 530 وه‌لاتیان ژی ژ ئه‌گه‌رێ وان روودانێن هاتنوچوونێ گیانێ خوه ژ ده‌ستدایه، هه‌روه‌سا زێده‌تری شه‌ش هزار كه‌سان ژی بریندار بووینه”.
عه‌مید ئه‌سعه‌د مه‌لا كه‌ریم گۆتژی: “زێده‌بوونا روودانێن هاتنوچوونێ ئه‌گه‌رێن خوه هه‌نه ژ وان ژی زێده‌بوونا هه‌ژمارا تڕۆمبێلان و پێگری نه‌كرنا وه‌لاتیان ب رێنمایێن هاتنوچوونێ، ل هه‌رێما كوردستانێ دو ملیۆن تڕۆمبێل هه‌نه و پێدڤیه رێ و جهێن رژد بگرینه به‌ر هه‌تا روودانێن هاتنوچوونێ بهێنه كێمكرن و خه‌لك زێده‌تر نه‌بیته قوربانی روودانێن هاتنوچوونێ”.
