ئه‌ڤ شه‌ڕه یێ ئاڤاكرنا ده‌وله‌تا كوردستانێ یه
یا دیاره كو ل ڤێ قووناغێ دا كورد وه‌كو ملله‌ت و وه‌لات یێ كه‌ڤتیه به‌رامبه‌ر مه‌زنترین گه‌ف و پیلانێن ناسیۆنالیزما عه‌ره‌بی و ئیسلاما سه‌له‌فیا توندره‌و كو ئه‌ڤه دوژمنێن مرۆڤاتیێنه و ئه‌ڤرۆ ئه‌ڤ پیلانه ژی هه‌ره‌شه‌نه ل سه‌ر هه‌بوونا مه وه‌كو ملله‌ت، ئه‌ڤ شه‌ڕه شه‌ڕێ به‌رژه‌وه‌ندیانه و ئه‌ڤرۆ ژی كوردان به‌رژه‌وه‌ندی هه‌نه د كێشه‌یێن سیاسی یێن ده‌ڤه‌را رۆژهه‌لاتا ناڤه‌راست دا ژی هه‌رێما كوردستانێ ژی وه‌كو پارچه‌یه‌ك ژ عیراقێ لێ تایبه‌تمه‌ندیا خوه هه‌یه و یاریكه‌ره‌كێ كارا و زانایه كو ده‌سته‌كێ ب هێز یێ هه‌ی د ئاڤاكرنا ئاینده‌یه‌كێ گه‌ش دا بۆ ملله‌تێ كورد كو ئه‌و ژی پرۆژێ (مه‌سعود بارزانی) یه، بۆ راگه‌هاندنا ده‌وله‌تا كوردستانێ، یا ئاشكه‌رایه د دیرۆكێ دا كه‌لتورێ مێشكێ عه‌ره‌بێن شۆفینی و سه‌له‌فیێن قوتابخانا ئیسلاما سیاسیا توندره‌ر شیانا وه‌رگرتنا پرسا ده‌وله‌تا سه‌ربه‌خوه‌یا كوردستانێ نینه، له‌ورا خودانێن ڤی َ هزركرنا هشك و كه‌لتوورێ پاشڤه‌مای یێ عه‌ره‌بێن شۆفینی ب هه‌موو شیانێن خوه كه‌فتنه كارێ دانانا پلانان و خرڤه‌كرنا هزركه‌رێن رێبازا تاریێ و ژ هه‌موو جیهانێ ئینانه ڤێ ده‌ڤه‌رێ وه پرچه‌ك و تفاقكرن و ئاراستا ڤێ هێزا درنده ژ به‌غدا گوهۆری به‌ر ب كوردستانێ و بوونه ئه‌گه‌رێ هه‌لكرنا شه‌ڕه‌كێ نه‌چاڤه‌رێكری و بێ بنه‌ما ب رێیا درنده‌ترین رێكخراوا تیرۆرستیا جیهانی ب ناڤێ (داعش)، د ئه‌نجام دا وان بخوه دانپێدان كر كو شه‌ڕێ ل گه‌ل كوردان سه‌رێ خوه ل كه‌ڤری دا.
ئه‌ڤرۆ ب دیكیۆمێنت ئاشكه‌رابوو د دیرۆكا كڤن و یا هه‌ڤچه‌رخ دا كو هه‌ر خودانێن ڤانَ هزروبیر و مێشكێن گه‌نی بوون ل ده‌ما دووماهیا سالێن هه‌شتێیا خه‌لكێ كوردستانێ كیمیا باران و ئه‌نفالكری ل بن ناڤێ ئایه‌تێن قورئانا پیرۆز هه‌روه‌سا كورد تووشی مه‌زنترین هه‌وا قركرنێ و جینۆسایدێ كری و ب هزاره‌ها گوند و ب سه‌ده‌ها مزگه‌فت و دێر و په‌رستگه‌ه روخاندن و وێرانكرن و هه‌تا ئه‌ڤرۆ ژی هه‌ر ئه‌ڤ توخمه مرۆڤه د به‌رده‌وامن ل سه‌ر كارێ په‌قاندنا مزگه‌فت و دێر و پیرۆزیێن ئایینی و قه‌برێن پێغه‌مبه‌ران و ئه‌گه‌ر ب زڤرینه سه‌رده‌مێ (به‌ری و پشتی) هاتنا ئاینێ ئیسلاما پیرۆز بۆ نموونه ده‌ما قه‌بیله‌كا عه‌ره‌با یا ب هێزبا دا هێرشێ به‌ته سه‌ر قه‌بیلا بێ هێز و هه‌موو مال و حێشتر و په‌ز و كچ و ژنێن وان دا ب سه‌ر خوه‌دا پارڤه دكه‌ن و حه‌لال دكه‌ن، ئه‌ڤه كه‌لتوره‌كه و هه‌ر هه‌یه و ناهێته هێلان د ناڤ ملله‌تێ عه‌ره‌با دا چونكو خودانێن وێ عه‌قلیه‌تێ نه، ژ به‌ر هه‌تا ئه‌ڤرۆ ژی هه‌ر وه‌كو ل ڤێ دووماهیێ ل شنگالێ و كۆبانێ و ل گه‌له‌ك ده‌ڤه‌رێن دی ب سه‌رێ خه‌لكێ كوردستانێ دا ئیناین. ئه‌ڤرۆ ژی هێرشێن تیرۆرستان بۆ سه‌ر ده‌ڤه‌رێن كوردستانێ هه‌موو جیهانا ئازاد هشیار و ئاگه‌هداركرن و بۆ وان هاته سه‌لماندن كو هێشتا هه‌ره‌شه‌یا ژ ناڤبرنێ و جینۆسایدێ ل سه‌ر گه‌لێ كورد یا مای، له‌ورا سیاسه‌تمه‌دار و شرۆڤه‌كار و دپلۆماتكارێن جیهانا پێشكه‌فتی گڤاشتنێ ل سه‌ر ئیدارا ئه‌مریكا دكه‌ن، دا كو ئاراسته‌یا هزرا سیاسه‌تا عیراقا ئێككرتی بگوهۆریت و ده‌ست ژێ به‌رده‌ت، چونكو ل سه‌ر ئه‌ردی عیراق یا دابه‌شبووی و خه‌لكێ دیموكراتخوازێ ڤی وه‌لاتی ل هیڤیا بریاره‌كا سیاسیه دا كو ژ جڤاكێ ناڤده‌وله‌تی ب ده‌ركه‌ڤیت، ژ به‌ر كو عیراق نه‌مایه وه‌كو ده‌وله‌ت یا هه‌لوه‌شیای، له‌وما پشتی ڤێ قووناغێ یا دیاره پێكهاتێن عیراقێ نه‌شێن پێكڤه بژین د ڤی وه‌لاتی دا و ئه‌ڤرۆ ده‌وله‌تێن بریار ب ده‌ستێن جیهانێ ژی نه‌چارن ب رژدتر هزرێ د چاره‌سه‌ریه‌كا بنگه‌هین دا بكه‌ن بۆ كێشه‌یێن عیراقێ و دۆزا كوردی، یا ئاشكه‌رایه كو ئاراسته‌یا ره‌نگێ كه‌سك بۆ گه‌لێ كوردستانێ یا هاتیه هه‌لكرن ژ لایێ هنده‌ك ژ ده‌وله‌تێن جیهانا ئازاد ڤه، له‌ورا ل ده‌مێ سه‌ره‌دانا وه‌زیرێ ده‌رڤه‌یێ ئه‌مریكا (جۆن كێری) ل رێكه‌فتی (256 2014) بۆ هه‌ڤلێرێ و كۆمبووی ل گه‌ل (سه‌رۆك بارزانی) و دكۆمبوونێ دا سه‌رۆكێ هه‌رێما كوردستانێ زۆر ب ئاشكرای بۆچوونا خوه دیاركر ل سه‌ر بابه‌تێ پرۆسێسا سه‌ربه‌خوه‌یا ده‌وله‌تا كوردستانێ و كو به‌رنامه یێ دانایه ب ئێكجاره‌كی ژ عیراقێ جودا ببن و پشتی (جۆن كیرَی) ژ هه‌ڤلێرێ گه‌هشتیه (برۆكسل) ل (26 /6/2014) هه‌ر ئێكسه‌ر كۆمبوو ل گه‌ل وه‌زیرێن ده‌رڤه‌یێن (سعودی و قه‌ته‌ر و ئوردن و مسرێ) و پێشنیازا دابه‌شكرنا عیراقێ بۆ سێ كۆنفیدرالیان دانا به‌ر سینگێ وان، ئه‌ڤرۆ بزاڤ و سه‌ره‌دانێن دبلوماسی و شه‌ڕێ به‌رژه‌وه‌ندیان د زێده‌بوونێ دایه ل كوردستانێ و هه‌ڤلێرێ یا بوویه ناڤه‌نده‌كا جهێ پرسیار ژێكرنێ و بریاردانێ و سه‌ركردایه‌تیا سیاسیا كوردستانێ ژی ب تایبه‌تی سیاسه‌تا سه‌ركه‌فتیا سه‌رۆكێ هه‌رێما كوردستانێ یا بوویه جهێ باوه‌ریا هه‌موو جیهانا ئازاد و پێشكه‌فتی، له‌ورا ل دووڤ شرۆڤه‌كرنا شرۆڤه‌كاران و گۆتنێن چاڤدێرێن سیاسی پرۆژه‌یێ وی یێ ئاڤاكرنا ده‌وله‌تا كوردستانێ دێ یێ سه‌ركه‌فتی بیت ژ هه‌موو روویان ڤه.
