ئۆپۆزسیۆنا توركیا چاڤه‌رێی بریارا ئه‌ردۆغانی یه
ب، سه‌رجان مه‌حمود:
رۆژنامه‌ڤان خه‌یری ده‌میر ل رۆژناما ئارتی گه‌رچه‌ك یا توركیا راگه‌هاند كو د ناڤ ئاكپارتیێ دا گه‌نگه‌شه ل سه‌ر هه‌لبژارتنێن پێشوه‌خت دهێنه كرن و گۆت: (سه‌رۆك كۆمار ئه‌ردۆغان د كۆمبوونا ل گه‌ل به‌رپرسێن لقێن پارتا خوه دا داخواز ژ وان كر كو ژ نها ڤه خوه بۆ هه‌لبژارتنێن پێشوه‌خت ئاماده بكه‌ن و ده‌ست ب خه‌باته‌كا بله‌ز بكه‌ن و ئه‌و یه‌ك ژی نیشا دده‌ت كو ئه‌ردۆغانی دڤێت به‌رێ ئۆپۆزسیۆنێ د ره‌وشه‌كا نه چاڤه‌رێكری دا بده‌ته هه‌لبژارتنان و هنده‌ك به‌رپرسێن ئاكپارتیێ ژی وه‌سا دبینن كو ئه‌ردۆغان دێ 15 تیرمه‌ها ئه‌ڤساله ژ په‌رله‌مانی بخوازیت بریارێ لدۆر ئه‌نجامدانا هه‌لبژارتنان بده‌ت).
چاڤدێرێن سیاسی ل توركیا ژی دیار دكه‌ن كو پارتێن ئۆپۆزسیۆنێ كو پارتا گه‌ل یا كۆماری سه‌ركێشیا وێ دكه‌ت، گه‌نگه‌شێ ل سه‌ر به‌ربژاره‌كێ بۆ پۆستێ سه‌رۆك كۆماریێ دكه‌ن و گۆت: (هه‌تا نها نه پارتێن ئۆپۆزسیۆنێ و نه ژی ده‌ستهه‌لاتێ به‌ربژارێن خوه بۆ پۆستێ سه‌رۆك كۆماریێ ده‌ستنیشان نه‌كرینه و هه‌تا نها دیار نینه كا دێ ئه‌ردۆغان جاره‌كا دی خوه بۆ پۆستێ سه‌رۆك كۆماریێ به‌ربژار كه‌ت یان نه).
