ئۆپۆزسیۆنا تورکیا ل هه‌مبه‌ر ئه‌ردۆغانی یا لاواز دبیت
سەرجان مەحمود:
مه‌رال ئاکشه‌نه‌ر سه‌رۆکا پارتا (ئی) یا تورکیا د کۆمبوونا ده‌ستنیشانکرنا بەربژارێ ئۆپۆزسیۆنێ بۆ سەرۆکاتیا تورکیا ل دژی به‌ربژاریا که‌مال کلچدار ئوغلۆی ده‌رکه‌ت و خوا‌ست، کو سه‌رۆکێ باژێرڤانیا سته‌نبۆلێ ئه‌کره‌م ئیمام ئوغلۆ یان ژی سه‌رۆکێ باژێرڤانیا ئه‌نقه‌ره مەنسور یاواش وه‌ک به‌ربژار بۆ پۆستێ سه‌رۆک کۆماریا تورکا بهێنه ده‌ستنیشان کرن، هەر پێنج پارتێن دی یێن ئۆپۆزسیۆنێ پێشنیازا مه‌رال ئاکشه‌نه‌رێ رەتکرن و ئاکشه‌نه‌ر ژی ل هه‌مبه‌ر دا پارتا خوه ژناڤ رێزێن ئۆپۆزسیۆنێ ڤه‌کێشا، ئه‌و یه‌ک ئالۆزیه‌کا مه‌زن د ناڤ ئۆپۆزسیۆنێ دا دروست کریه. مه‌رال ئاکشه‌نه‌ر به‌ری ئاڤاکرنا پارتا خوه یه‌ک ژ سه‌رکردێن کاریگەر یا پارتا بزاڤا نه‌ته‌وپه‌ره‌ست یا تورکیا بوو.
د ڤێ دەربارێ دا چاڤدێرێن سیاسی یێن تورکیا دیار دکەن، بەری هەر تشتەکێ ڤەکێشانا ئاکشەنەرێ دێ کاریگەریا خۆ ل پێگەهێ ئۆپۆزسیۆنا تورکیا کەت، دێ دەنگێن ئۆپۆزسیۆنێ کێمتر لێ هێت، یا نها ل تورکیا روی ددەت ب تەمامی د بەرژوەندیا ئەردۆغانی دایە، چونکی هەر شەش پارتێن ئۆپۆزسیۆنێ دشیان پێکڤە بەرەیەکێ بهێز د هەلبژارتنان دا دروست بکەن، لێ ڤەکێشانا سەرۆکا پارتا (ئی) دێ بیتە ئەگەرێ لاوازبوونا ئۆپۆزسیۆنێ، ژ بەر هندێ ژی هەکە نها هەلبژارتن بهێنە کرن دێ رێژەیا دەنگێن هەڤپەیمانیا ئاکپارتیێ و پارتا بزاڤا نەتەوەپەرەست زێدەتر لێ هێت.
هندەک ژ چاڤدێرێن سیاسی ڤەکێشانا مەرال ئاکشەنەرێ وەکو پیلانەکا پشت پەردەی ژ ئالیێ ئاکپارتیێ ڤە دبینن، ل گۆر باوەریا وان بەری نها کار ل سەر هندێ هاتیە کرن و دبیت پارتا (ئی) پشتەڤانیێ ل ئەردۆغانی بکەت و ل هەمبەر دا ئەردۆغان ژی پۆستێن گرنگ بدەتە وێ پارتیێ.
لێ رۆژنامه‌ڤان محەمەد ئالتان ب رەنگەکێ دی بەرێ خۆ ددەتە بابەتی و بۆ مالپه‌رێ ئارتی گه‌رچه‌ک راگه‌هاند، کو وی بەری نها پێشبینی کربوو دێ مه‌رال ئاکشه‌نه‌ر خۆ ژناڤ رێزێن ئۆپۆزسیۆنێ ڤەکێشیت و گۆت: (مه‌رال ئاکشه‌نه‌ر ب خۆ ڤه‌کێشانا ژناڤ ئۆپۆزسیۆنێ رێ بۆ ئالیێن دیموکراتیک ڤه‌کر دا کو خۆ نێزیکی پارتا کۆماریا گه‌ل CHP بکه‌ن، ژ بۆ تورکیا خۆ‌ڤه‌کێشانا مه‌رال ئاکشه‌نه‌رێ ژناڤ رێزێن ئۆپۆزسیۆنێ پێنگاڤه‌کا باشە، ل دووڤ هزرا من دێ ئۆپۆزسیۆنا تورکا ب سه‌رکێشیا که‌مال کلچدار ئوغلۆی شێت د هه‌لبژارتنێن بهێت دا سه‌رکه‌ڤتنێ بده‌ستڤە بینیت، لێ پێدڤیا وان ب پشته‌ڤانیا HDP و کوردان هه‌یه، نها دەلیڤەکا باش بۆ هەدەپێ هاتیە پێش خۆ نێزیکی پارتێن دی یێن ئۆپۆزسیۆنێ بکەت.
