ئیران: دانوستاندنێن مه ل گه‌ل ئورۆپا ب ره‌نگه‌كێ باش برێڤه دچن
ئه‌ڤرۆ:
وه‌زیرێ ده‌رڤه یێ ئیرانێ راگه‌هاند كو دانوستاندنێن وان ل گه‌ل ئێكه‌تیا ئورۆپا ب ره‌نگه‌كێ باش برێڤه دچن و ئیرانێ دڤێت ل گه‌ل ئورۆپا چاره‌سه‌ریه‌كا گونجای بۆ بابه‌تێ به‌رنامێ ئه‌تۆمی یێ ئیرانێ په‌یدا بكه‌ت، چونكو نها هه‌لوه‌ستێ ئورۆپا ل هه‌مبه‌ر ئیرانێ ب ره‌نگه‌كێ باش هاتیه گوهۆرین و دڤێت ئه‌مریكا ژی ده‌ست ژ گه‌فێن خوه به‌رده‌ت و وه‌كو ئێكه‌تیا ئورۆپا به‌رهه‌ڤیا خوه بۆ دانوستاندنان دیار بكه‌ت.
حسێن ئه‌میر عه‌بدوللاهیان ئه‌و یه‌ك ژی دیار كر كو به‌ری نها ئه‌مریكا خوه ژ رێككه‌فتنا ئه‌تۆمی ڤه‌كێشا و ده‌ست ب سزادانا ئیرانێ ژی كر، نها دڤێت ئه‌مریكا هه‌موو سزایێن كو د سه‌رده‌مێ ئیدارا ترامپی دا لسه‌ر ئیرانێ هاتینه سه‌پاندن راكه‌ت، هه‌روه‌سا دڤێت ئه‌مریكا چو مه‌رجه‌كێ ژی دیار نه‌كه‌ت، چونكو بۆ ئه‌مریكا ژی ئاشكرا بوویه دڤێت رێزێ ل ئیرادا خه‌لكێ ئیرانێ بگریت و ئیران نه‌چار نینه هه‌موو داخوازیێن ئه‌مریكا قه‌بوول بكه‌ت.
وه‌زیرێ ده‌رڤه یێ ئیرانێ ئه‌و یه‌ك ژی نه‌ڤه‌شارت كو ژ به‌ر سزایێن ئابووری یێن كو ئه‌مریكا ل سه‌ر ئیرانێ سه‌پاندینه ره‌وشا ئیرانێ ژی ئالۆز بوویه، ژ به‌ر هندێ ژی هه‌كه ئه‌مریكا بڤێت نیه‌تا خوه یا باش بۆ ده‌ستپێكرنا دانوستاندنان دیار بكه‌ت دڤێت به‌ری هه‌ر تشته‌كێ سزایێن ل سه‌ر ئیرانێ راكه‌ت.
