ئیران هۆشداریێ ددەتە دو وەلاتێن ئۆرۆپی
جێگرێ وەزیرێ دەرڤە یێ ئیرانێ دیار کر، دەرتەنگا هورمزێ دێ هەردەم ل ژێر کۆنترۆلا ئیرانێ دا بیت و رێ نادەین فرەنسا و بریتانیا هێزێن سەربازی ل دەرتەنگا هورمزێ بجه بکەن و هەکە هەر دو وەلاتێن ئۆرۆپی کارەک وەسا بکەن ئەو یەک دێ بیتە ئەگەرێ ئالۆزیێن مەزن و دڤێت هەر دو وەلات هشیار بن و نەبنە ئەگەرێ روودانا ئالۆزیێن نوو ل دەڤەرێ.
کازم غەریب ئابادی ئەو یەک ژی دیار کر، بەری نها ژ بۆ دەرتەنگا هورمزێ مە گەلەک شەرێ ئەمریکا کریە و نها ژی ب هەموو رەنگەکێ کار دکەین دا چو کاریگەریا ئەمریکا ل سەر دەرتەنگا هورمزێ نەمینیت و د دەمەکێ وەسا دا ب چو رەنگەکێ رێ نادەین دو وەلاتێن دی یێن ئۆرۆپی هێزێن سەربازی ب بەهانەیا ئارامیێ ل دەرتەنگا هورمزێ بجه بکەن، دڤێت هەر دو وەلات ژی دەست ژ کارەکێ وەسا بەردەن و دڤێت ئەو باش بزانن کۆنترۆل و رێڤەبرنا دەرتەنگا هورمزێ دێ هەردەم د دەستێ ئیرانێ دا بیت و چو وەلاتەکێ دی ماف نینە بەحسێ بجهکرنا هێزێن سەربازی ل دەرتەنگا هورمزێ بکەت.
ئەو یەک د دەمەکێ دایە کو بەری چەند رۆژان هەر دو وەلاتێن بریتانیا و فرەنسا دیار کربوون ئەو بەرهەڤن ژ بۆ ئارامیا گەمیێن بازرگانی ل دەرتەنگا هورمزێ هێزێن سەربازی ل وێرێ بجه بکەن، چونکی د رەوشا نها دا بابەتێ ئارامیا ل دەرتەنگا هورمزێ ژ بۆ گەمیێن بازرگانی بوویە بابەتەکا جیهانی و وەلاتێن دی ژی دشێن ژ بۆ ئارامیا هورمزێ هاریکار بن.
